Yigil 8

Niñ i lihaa i i nlémél Djob

I mbe tel munlôm a gwé ikété lihaa? (1)

Lelaa munlôm a nlama tééda nwaa wé? (2)

Ki i yé mbege isañ lihaa? (3)

Ki i yé tel muda ikété ndab lihaa? (4)

Ki Djob a mbat bagwal ni bon bap? (5)

Lelaa Bibel i ntehe mbagla libii ni mabos? (6, 7)

1. Bibel i nkal le munlôm nyen a yé ño u ndab yé lihaa. (1 Korintô 11:3) Munlôm a nlama ndik bana nwaa wada. Ba nlama biina kiki mbén i nkal.—1 Timôtéô 3:2; Titô 3:1.

2. Munlôm a nlama gwés nwaa wé kii a ngwés nyemede. A nlama tééda nye kii Yésu a ba tééda banigil bé. (Efésô 5:25, 28, 29) A nlama bé bép nwaa wé to tééñga nye nya yo ki yo. Ndi a nlama ti nye lipém ni diihe nye.—Kôlôsé 3:19; 1 Pétrô 3:7.

3. Isañ mbai a nlama sal ni ngui inyu tééda ndab yé lihaa. A nlama ti nwaa wé ni bon bé bijek, ni mambot, ni liyééne. Isañ mbai a nlama ki ti lihaa jé bijek bi mbuu. (1 Timôtéô 5:8) Nyen a yé ño i hôla mbai yé i yi njee a yé Djob ni yi bitééne Gwé.—Ndiimba Mbén 6:4-9; Efésô 6:4.

4. Muda a nlama ba loñge nhôla i pañ nlôm. (Bibôdle 2:18). A nlama hôla nlôm i niiga ni hôlôs bon bap. (Bingéngén 1:8) Yéhôva a mbat muda libii le a tééda mbai yé ni gwéha. (Bingéngén 31:10, 15, 26, 27; Titô 2:4, 5) A nlama ti nlôm ngandak lipém.—Efésô 5:22, 23, 33.

5. Djob a mbat le boñge ba nôgôl bagwal bap. (Efésô 6:1-3) A mbem le bagwal ba niiga ni le ba kodol bon bap. Bagwal ba nlama tégbaha ngéda ni nigil Bibel ni bon bap, ba yônhag njômbi yab i mbuu ni i mahoñol. (Ndiimba Mbén 11:18, 19; Bingéngén 22:6, 15) Bagwal ba nlama bé kodol bon bap to ti bo bikogse bi nloo héga.—Kôlôsé 3:21.

6. Ibale ngimanôgla i mpam i pôla babiina, ba nlama yéñ njel i nôñôl maéba ma Bibel. Bibel i mbat le di bana gwéha ni le di ba bebee i nwéhél. (Kôlôsé 3:12-14) Bañga Djob i nti bé babiina makénd le ba bagla inyu ndék mahop. Ndi muda a nla pohol le a nyodi yag nlôm ibale (1) nlôm a nai le a ntééda bé lihaa jé, (2) a nai ni ndééñga i nya i yé le muda a nla nimis mbôô wé to niñ yé, tole (3) a nlôôha ni ngolba nya i yé le muda a nla bé gwélél Yéhôva.—1 Korintô 7:12, 13.

7. Ndéñg i nlama bé lébna i pôla babiina. Ndéñg i yé béba i kolba ni Djob ni i kolba ni nso mbiina. (Lôk Héber 13:4) Ndéñg yotama yon Bitilna bi nti kunde mabos ni tiimba biiba. (Matéô 19:​6-9; Rôma 7:2, 3) Yéhôva a ñoo ngéda mut a mbos ngi kunde Bitilna ndi a témb a biiba.—Malaki 2:14-16.

[Bititii i mapep 16, 17]

Djob a mbem le bagwal ba niiga ni kodol bon bap

[Titii i lipep 17]

Isañ nu gwéha a nti lihaa jé mam ma minsôn ni ma mbuu