Lihaa joñ li nla ba maséé

1, 2. Lelaa Yéhôva a ngwés le mahaa ma ba?

YÉHÔVA DJOB nyen a bi at libii li bisu. Bibel i nkal bés le a bi heg muda nu bisu, “a lona nye yak mut.” Adam a bi kon maséé ngandak, jon a bi kal le: “Hés i bihés gwem ini, yak nsôn u minsôn nwem.” (Bibôdle 2:22, 23) Hala a niiga bés le Yéhôva a ngwés le babiina ba ba maséé.

² Ngandak bôt i mah ngi niñ ikété lihaa li li yé maséé. Hala a yé ngoo, ndi Bibel i nti ngandak matiñ ma ma nla hôla bôt ba lihaa bobasôna i niñ ntôñ ikété maséé.​—Lukas 11:28.

KII DJOB A MBAT LE BALÔM BA BOÑ?

3, 4. (a) Lelaa munlôm a nlama bôñgôl nwaa wé? (b) Inyuki i yé mahee le nwaa bo nlôm ba nwéhlana?

³ Bibel i nkal le loñge nlôm a nlama bôñgôl nwaa ikété gwéha ni lipém. Soho añ Efésô 5:25-29. Hiki ngéda, munlôm a nlama unda nwaa wé le a ngwés nye. A nlama ki sôñ nwaa wé, a tôñôk ki nye. A’ boñ bé ki to nye jam jo ki jo li li yé béba.

⁴ Ndi kii munlôm a nlama boñ ngéda nwaa a mboñ mahôha? Bibel i nkal balôm le: “Ni waa bañ gwés baa banan, ni bana bañ bo miñem mi njôñlô.” (Kôlôsé 3:19, MN) A munlôm, u hôiga bañ le yak we u mboñ mahôha. Ndi, yi ki le ibale u ngwés le Djob a nwéhél we, yak we u nlama nwéhél nwaa woñ. (Matéô 6:12, 14, 15) Ngéda nwaa bo nlôm ba yé bebee i nwéhlana, hala a ga hôla bo i ba maséé mu libii jap.

5. Inyuki munlôm a nlama diihe nwaa wé?

⁵ Yéhôva a mbem le munlôm a diihe nwaa wé. Munlôm a nlama yoñ ngéda i ti nwaa wé mam ma yé toi nye nseñ. Hala a yé mahee kiyaga. Ibale munlôm a ntééda bé nwaa wé loñge, Yéhôva a nla tjél emble masoohe mé. (1 Pétrô 3:7) Ngéda bôt ba ngwés Yéhôva, ha nyen yak Yéhôva a ndiihe bo. Djob a ngwés bé bôlôm iloo bôda.

6. Nwaa bo nlôm ba yé ndigi “nsôn wada.” Hala a nkobla le kii?

⁶ Yésu a bi toñol le nwaa bo nlôm “ba ta ha bé iba, ndik nsôn wada.” (Matéô 19:6) Ba nlama téñbe wada ni nuu, to wada a nlama bé ke ndéñg. (Bingéngén 5:15-21; Lôk Héber 13:4) Ngéda munlôm a yéñ lal ni nwaa, hiki wada wap a nlama ndigi bé tôñ nyemede, ndi a nlama yéñ yak yéñe i nu numpe. (1 Korintô 7:3-5) Munlôm a nlama bigda le “mut nye ki nye a mah oo bé minsôn nwé nyemede kekikel, ndigi le a jéhak nwo, a tôñglak ki nwo.” Jon munlôm a nlama gwés, a diihe ki nwaa wé. Iloo mam ma momasôna, muda a ngwés le nlô wé a unda nye loñgeñem ni gwéha.​—Efésô 5:29.

KII DJOB A MBAT LE BÔDA BA BOÑ?

7. Inyuki lihaa li gwé ngôñ ni ño?

⁷ Hiki ndap lihaa i gwé ngôñ ni ño, i ban-ga ngôñ ni mut nu a ñéga lihaa, a hôlga ki jo i sal loñge ikété adna. I kaat 1 Korintô 11:3, Bibel i nkal le: “Kristô a yé ño hi munlôm, munlôm ki a yé ño muda, ndi Nyambe a yé ño Kristô.”

8. Lelaa muda a nla ti nlô wé njôôñ lipém?

⁸ Hiki munlôm a mboñ mahôha. Ndi ngéda muda a nit makidik ma nlô wé, a bak ki bebee i nôgôl nye, lihaa jolisôna li nkôhna bisai. (1 Pétrô 3:1-6) Bibel i nkal le: “Nwaa a ti nlôm njôôñ lipém.” (Efésô 5:33, MN) Lelaa muda a nlama boñ ibale nlô wé a ta bé kristen? To hala, a nlama ti nye njôôñ lipém. Bibel i nkal le: “A bôda, suhlana bébomede isi balôm banan, le to ibale bahogi ba nôgôl bé bañga i Nyambe, wee bihiumul bi baa bap bi yoña bo ibabé bañga i Nyambe, lakii ba ntehe bihiumul binan bi gwé bé nsohi ni bi njôôñ lipém.” (1 Pétrô 3:1, 2, MN) Loñge ndémbél i muda i nla hôla nlô wé i nok nye ni i ti hémle yé lipém.

9. (a) Kii muda a nlama boñ ibale a nôgla bé ni nlô wé? (b) Mambe maéba kaat Titô 2:4, 5 i nti bôda ba yé mbiibaga?

⁹ Kii muda a nla boñ ibale a nôgla bé ni nlô wé? A nlama ti mahoñol mé, ndi i nya i mbabaa bé nlôm. Kii héga, ngéda Sara a bi pot jam li li bi bébél nlô wé, Yéhôva a bi kal Abraham le: “Nôgôl kiñ Sara.” (Bibôdle 21:9-12) Libim li mangéda, makidik ma munlôm ma nkolba bé jam Bibel i nkal, jon nwaa wé a nlama nit nye. (Minson mi baôma 5:29; Efésô 5:24) Bañga muda i ntééda lihaa jé loñge. (Añ Titô 2:4, 5.) I ngéda nlô wé ni bon bé ba ntehe lelaa a nsal ni ñem wé wonsôna inyu yap, ba ga kônde ki gwés nye, ba diihege ki nye.​—Bingéngén 31:10, 28.

10. Kii Bibel i nkal inyu i bagla, ni inyu mabos?

¹⁰ Mangéda mahogi, babiina ba mpala yoñ makidik i bagla tole i bos. Ndi Bibel i nkal le “nwaa a bagla bañ ni nlô wé” ni le “nlôm a héa bañ nwaa wé [hala wee a bagla bañ ni nwaa wé].” (1 Korintô 7:10, 11) Mangéda mape, mindañ mi yé mi pam ngim likala, kayéle babiina ba nla kit le ba mbagla. Ndi ba nlama tibil hek pék ilole ba nyoñ makidik ma. Kii di nla kal inyu mabos? Bibel i ñunda le njom inyu bos i yé ndik yada: I yé ngéda munlôm tole muda a ke ndéñg ni mut nu a ta bé nlô wé tole nwaa wé.​—Matéô 19:9.

KII DJOB A MBAT LE BAGWAL BA BOÑ?

11. Kii boñge ba gwé ngôñ iloo mam momasôna?

¹¹ A bagwal, ni tégbaha ngandak ngéda ni bon banan. Iloo mam momasôna, bon banan ba gwé ngôñ ni bé. Ba gwé ki ngôñ le ni niiga bo mam inyu Yéhôva.​—Ndiimba Mbén 6:4-9.

12. Kii bagwal ba nlama boñ inyu sôñ bon bap?

¹² Nkoñ isi u Satan u nke ndik ni bisu i boñ béba. Bôt bahogi ba yé, ba ba nla boñ bon banan béba, ba nla ki ôbôs bo. I yé maliga le ngandak bagwal i nwo nyuu i pôdôs bon bap inyu mam ma bôlôm ni bôda. Ndi bagwal ba nlama béhe bon bap, ba niiga ki bo i keñgle bôt ba ñôbôs boñge. A bagwal, ni nlama sôñ bon banan.a​—1 Pétrô 5:8.

13. Lelaa bagwal ba nlama niiga bon bap?

¹³ Bagwal bon ba gwé mbegee ikeñi i niiga bon bap lelaa ba nlama boñ inyu bana maboñog malam. Lelaa u nla niiga bon boñ? Boñge ba gwé ngôñ le u niiga bo. Ndi ngéda u nkodol bo, u boñog bañ hala ikété hiun. (Yérémia 30:11) Jon u kodol bañ bon boñ ni liyot. U nwas bañ le bibuk gwoñ bi ba kiki “pansoñ” inyu babaa bo. (Bingéngén 12:18) Niiga bon boñ le ba nok inyuki ba nlama ba manôgla.​—Efésô 6:4; Lôk Héber 12:9-11; béñge Ndoñi 30, i mamélél ma kaat.

KII DJOB A MBAT LE BOÑGE BA BOÑ?

14, 15. Inyuki boñge ba nlama nôgôl bagwal bap?

¹⁴ Yésu a bé nôgôl Isañ hiki ngéda, yak ngéda hala a bé a nlet. (Lukas 22:42; Yôhanes 8:28, 29) Yéhôva a mbem le boñge ba nôgôl bagwal bap.​—Efésô 6:1-3.

¹⁵ A boñge, to ibale ni nôgda le hala a nlédél bé i nôgôl bagwal banan, ni hoñol le ngéda ni yé manôgla, Yéhôva ni bagwal banan ba nôgôl bé maséé.b​—Bingéngén 1:8; 6:20; 23:22-25.

16. (a) Lelaa Satan a noode tinde boñge i boñ béba? (b) Inyuki hala a yé nseñ i pohol mawanda ma ma ngwés Yéhôva?

¹⁶ Nsohop a nla gwélél mawanda ni boñge bape le ba noode tinde we i boñ béba. A nyi le i kolba nya manoodana i, i ta bé isii jam. Kii héga, man Yakôb nu muda le Dina a bééna mawanda ma ma bé gwés bé Djob. Hala a bi lona nye ndutu keñi, nye ni lihaa jé. (Bibôdle 34:1, 2) Ibale mawanda moñ ma ngwés bé Yéhôva, ma nla tinde we i boñ ngim mam Yéhôva a ñoo. Hala a ga lona we, lihaa joñ, ni Yéhôva, ndutu keñi. (Bingéngén 17:21, 25) Inyu hala nyen i yé we nseñ le u bana mawanda ma ma ngwés Yéhôva.​—1 Korintô 15:33.

LIHAA JOÑ LI NLA BA MASÉÉ

17. Hiki mut ikété ndap lihaa a bééga imbe mbegee?

¹⁷ Ngéda hiki mut ikété lihaa a noñ mambén ma Djob, lihaa li nkeñgle ngandak mandutu. Jon ibale u yé munlôm nu a yé mbiibaga, gwés nwaa woñ, u bôñglak nye ni gwéha. Ibale u yé muda nu a yé mbiibaga, suhus wemede isi nlô woñ, u tinak nye lipém. Yéñ kôna ndémbél i muda nu kaat Bingéngén 31:10-31. Ibale u yé ngwal bon, niiga bon boñ i gwés Djob. (Bingéngén 22:6) Ibale u yé isañ, éga lihaa joñ i nya i yé “loñge.” (1 Timôtéô 3:4, 5; 5:8) A boñge, ni nôgôl bagwal banan. (Kôlôsé 3:20) U hôiga bañ le hiki mut ikété ndap lihaa a nla boñ mahôha, jon ba mut suhulnyu, u badak bape nwéhél. Ñ, Bibel i gwé maéba ma Yéhôva inyu hiki mut ikété ndap lihaa.