Yigil 11
Biniigana ni bilem bi loñ bi bi mbébél Djob
Mimbe mintén mi biniigana ni bilem bi loñ bi yé bibe? (1)
Ba bikristen bi nlama hémle le Djob a yé Trinitas? (2)
Inyuki bañga bikristen i mbégés bé Kristak, to Paska, to hilo hi ligwéé? (3, 4)
Ba bawoga ba nla boñ bayômi béba? (5)
Ba Yésu a bi wél i ngi mbasa? (6)
Umbe nseñ di gwé i lémél Djob? (7)
1. Ha biniigana to bilem bi loñ gwobisô bé gwon bi yé bibe. Ndi Djob a neebe bé gwo ibale bi nlôl i base bitembee tole ibale bi nkolba biniigana bi Bibel.—Matéô 15:6.
2. Trinitas: Ba Yéhôva a yé Trinitas—bôt baa ikété Djob jada? Heni! Yéhôva, Tata, a yé “mpom Djob u maliga”. (Yôhanes 17:3; Markô 12:29) Yésu a yé Man wé nu bisu, a yé ki i si Djob. (1 Korintô 11:3) Isañ a nloo Man. (Yôhanes 14:28) Mbuu mpubi u ta bé mut; u yé ngui Djob a mbôñôl mam.—Bibôdle 1:2; Minson mi baôma 2:18.
3. Kristak ni Paska: Yésu a bi gwééne bé i hilo 25 hi sôñ jôm ni ba. A gwééne bebe ni hilo hi bisu hi sôñ jôm, i ngéda ñwi i yon batat bilém ba ba tédél bilém gwap i mbédgé juu. (Lukas 2:8-12) Yésu a ti bé bikristen oda le ba bégés ligwéé jé to kel to yada. Yom a kal banigil bé le ba bigdaga i yé ndik nyemb yé. (Lukas 22:19, 20) Kristak ni mam bôt ba mboñ i kel i ma nlôl minlômbi mi bibase bi bitembee. Nlélém jam ni mam bôt ba mboñ i Paska, kii bo ligwélél matjee, ni diséé di bakana. Bikristen bi bisu bi ba bégés bé Kristak to Paska, to bañga bikristen i len i mbégés bé gwo.
4. Mangand ma ligwéé: Mangand ma ligwéé ma Bibel i mpôdôl ma bôña ni bôt ba ba ba bégés bé Yéhôva. (Bibôdle 40:20-22; Markô 6:21, 22, 24-27) Bikristen bi bisu bi ba bégés bé mangand ma ligwéé. I lem i bégés mangand ma ligwéé i, i nlôl i minlômbi mi bibase bi bitembee. To imbe ngéda ikété nwii, bikristen bi maliga bi ntina makébla, ba bomnaga ki mangéda mahogi i kon masé.
5. Woñi bawoga: Bawoga ba nla bé boñ to nog jam jo ki jo. Di nla bé hôla bo, to bo ba nla bé boñ bés béba. (Tjémbi 146:4; Ñañal 9:5, 10) Mbuu u nwo; u nkônde bé niñ i mbus nyemb. (Ezékiel 18:4) Ndi mangéda mahogi bibéba bi biañgel, bi bi nsébla le mimbuu mimbe, bi ngwés lôg bôt le bi yé mimbuu mi bawoga. Hi kiki lem i loñ i i gwéé maada ni woñi to ni libégés bawoga i yé be.—Yésaya 8:19.
6. Mbasa: Yésu a bi wél bé i ngi mbasa. A bi wél i ngi mbiñ tole jél. Bug i hop grikia i i bikoblana i Bibel i hogi le “mbasa” i bé kobla le “kidik i kék”. Yimbne mbasa i nlôl minlômbi mi bibase bi bitembee. Bikristen bi bisu bi ba bôñôl bé mbasa to bégés yo. Inyu hala ni, ba u nhoñol le i yé le i ba loñge i bôñôl mbasa inyu bégés Djob?—Ndiimba Mbén 7:26; 1 Korintô 10:14.
7. I nla ba nledeg jam ngandak i ñwas ngim biniigana ni ngim mabôñôl ini. Mahaa ni mawanda ma nla yéñ nyuge we le u nwas bañ mam u bi bôg hémle. Ndi i yé we nseñ i lémél Djob iloo bôt ba binam.—Bingéngén 29:25; Matéô 10:36, 37.
[Titii i lipep 22]
Djob a ta bé Trinitas
[Titii i lipep 23]
Kristak ni Paska bi nlôl minlômbi mi bibase bi bitembee
[Titii i lipep 23]
Di gwé bé njom yo ki yo i bégés bawoga to kon bo woñi