Yigil 13

Lelaa u nla léba base i maliga?

Ba bibase gwobisô bi nlémél Djob, tole yada ndigi? (1)

Inyuki ngandak bibase i nkatba le bi yé kristen? (2)

Lelaa u nla yimbe bañga bikristen? (3-7)

1. Yésu a bot bañga base kristô yada. Jon i len ini i nlama ba mpom likoda wada, mpom ntôñ, u bañga babégés Yéhôva Djob. (Yôhanes 4:23, 24; Efésô 4:4, 5) Bibel i niiga le ndik ndég bôt yon i yé i hipagda hi njel hi nkena i niñ.—Matéô 7:13, 14.

2. Bibel i bôg kal le i mbus nyemb baôma, biniigana bi bitembee ni maboñog ma ma ta bé ma kristen m’a jôb ndég ni ndég ikété ntôñ bikristen. Bôt ba ga ôt bahémle le ba noñ bo mbus ndi ha Yésu Kristô bé. (Matéô 7:15, 21-23; Minson mi baôma 20:29, 30) Inyu hala nyen di ntehe ngandak bibase bi bi nkatba le bi yé kristen. Lelaa di nla yimbe bañga bikristen?

3. Yimbne i bañga bikristen i i nlôôha nene yo ini le ba gwé bañga gwéha i pôla yab. (Yôhanes 13:34, 35) Ba niiga bé bo le ba hoñol le ba nloo matén mape tole bikôgôô bipe. Ba niiga bé to bo le ba oo bôt ba biloñ bipe. (Minson mi baôma 10:34, 35) Jon ba nyoñ bé ngaba i gwét. Bañga bikristen bi nyoñna kii linyañ li bôt.—1 Yôhanes 4:20, 21.

4. Yimbne ipe i base i maliga i yé le bijô gwé bi ndiihe Bibel iloo héga. Ba nyoñ yo kiki Bañga Djob ndi ba hémlege ki yom i nkal. (Yôhanes 17:17; 2 Timôtéô 3:16, 17) Ba nyoñ Bañga Djob kiki yom i yé nseñ iloo pék i bôt ba binam ni bilem gwap bi loñ. (Matéô 15:1-3, 7-9) Ba noode niñ kiki Bibel i niiga bo ikété niñ yab i hii kel. Jon ba niiga bé ngim jam ndi ba boñog nya ipe.—Titô 1:15, 16.

5. Base i maliga i nlama ki ti jôl li Djob lipém. (Matéô 6:9) Yésu a yis bôt jôl li Djob, le Yéhôva. Yag bikristen bi maliga bi nlama boñ nlélém. (Yôhanes 17:6, 26; Rôma 10:13, 14) Bo nje ba niiga bôt bape jôl li Djob i homa woñ libôg?

6. Bikristen bi maliga bi nlama añle bôt bape Ane Djob. Hala nyen Yésu a ba boñ. A ba añal ngéda yosô inyu Ane. (Lukas 8:1) A ti banigil bé oda le ba añle bôt nlélém ñwin ni nkoñ isi wonsô. (Matéô 24:14; 28:19, 20) Bikristen bi maliga bi nhémle le Ane Djob yotama yon y’a lona bañga nsañ ni mélés woñi munu isi.—Tjémbi 146:3-5.

7. Banigil ba Yésu ba gwé bé ngaba to yada ni ini béba nkoñ isi. (Yôhanes 17:16) Ba nyoñ bé ngaba ni mam ma mb’ô ma nkoñ isi to ni mindañ mi bôt. Ba ntjél bihiumul, maboñog, ni bilem bibe bi ngandak bôt i nkoñ isi i gwé. (Yakôbô 1:27; 4:4) Ba u nla yimbe ngim base i libôga joñ i i gwé bini bilem bi bañga ntôñ u Kristô?

[Bititii i mapep 26, 27]

Bañga bikristen i ngwéhna, i ndiihe Bibel, i ñañal ki ñañ nlam u Ane Djob