Lelaa di nla yimbe base i maliga?

Didun ndi didun di bôt di nkadba le di yé bikristen. Ndi bobasôna ba nhémle bé nlélém jam, ba noñ bé ki to minlélém mi matiñ. Jon lelaa di nla ni yimbe bañga bikristen?

1. Kii ba nsébél le kristen?

Kristen i yé nnigil Yésu Kristô, tole i mut a noñ nye. (Añ Minson mi baôma 11:26.) Lelaa mut a ñéba toi le a yé nnigil? Yésu a timbhe le: “Ibale ni ntééda bibañga gwem, ni yé toi banigil bem.” (Yôhanes 8:31) Hala a nkobla le bañga kristen i nôgôl biniigana bi Yésu. Nlélém kiki Yésu a bé niiga, a gwéélak Bitilna, hala nyen bañga bikristen i niiga ndik i yom i mpémél ikété Bibel.​—Añ Lukas 24:27.

2. Lelaa bañga bikristen i ñéba gwéha?

Yésu a bi kal banigil bé le: “Ni gwéhna bé ni bé kiki me bi gwés bé.” (Yôhanes 15:12) Lelaa Yésu a bi éba le a ngwés banigil bé? A bé tégbaha ngéda ni bo, a tinak bo makénd, a hôlga ki bo. A bi ti yak niñ yé inyu yap. (1 Yôhanes 3:16) Yak bañga bikristen i ngwéhna ndik bé ni nyo. Ndi i ñéba hala ni bipôdôl gwap ni bibôñôl gwap.

3. Bañga bikristen i nsal umbe nson?

Yésu a bi yigle banigil bé ngim nson. Bibel i nkal le: “A ep bo i añal ñañ nlam u Ane Nyambe.” (Lukas 9:2) Bikristen bi hiai bisu bi bé añal ndik bé ñañ nlam i bahoma ba bibégés, ndi yak i mbamba ni i mandap ni mandap. (Añ Minson mi baôma 5:42; 17:17.) Yak i len ini, bañga bikristen i ñañal ñañ nlam to hee bôt ba yé. Ba ngwés bôt bap ba libôk kayéle ba yé maséé i añle bo nwin u Bibel u u ntina hogbe ni botñem.​—Markô 12:31.

KÔNDE TÉM

4. Ba nyôñôl biniigana gwap ikété Bibel

I bôt bobasôna ba nkal le ba yé bikristen bé bon ba ndiihe biniigana bi Bibel. Tuk VIDÉÔ, i mbus ni kwélél mbadga ini.

VIDÉÔ: Lelaa bikristen bi bitembee bi bi kôde maliga? (5:11)

• Inyuki di nkal le, baéga bibase ba ba nkadba le ba yé bikristen ba bi niiga bé bôt maliga kiki Yésu?

Yésu a bé niiga maliga ma ma mpémél ikété Bibel. Añ Yôhanes 18:37, i mbus ni kwélél mbadga ini:

• Inoñnaga ni bibañga bi Yésu, lelaa di nla yimbe bikristen bi bi “yé i pes maliga”?

5. Ba ñañal ñañ nlam

Ilole a nke i ngii, Yésu a bi yigle banigil bé bôlô. Ba nke ni bisu i gwel nson u letee ni len. Añ Matéô 28:19, 20 ni Minson mi baôma 1:8, i mbus ni kwélél mambadga mana:

• Ipam numbe homa ñañ nlam u nlama añlana? Letee ni imbe ngéda?

6. Ba mboñ i mam ba niiga

Kii i bi hôla Tom i ba nkwoog nkaa le nano a nléba base maliga? Tuk VIDÉÔ, i mbus ni kwélél mambadga mana.

VIDÉÔ: Me bi tjôô base (5:20)

• Mu vidéô, kii i bi tinde Tom i tjôô base yé?

• Inyuki a yé nkwoog nkaa le nano a nléba maliga?

Bôt ba mbéñge maboñok més iloo i yom di nkal. Añ Matéô 7:21, i mbus ni kwélél mbadga ini:

• Inyu Yésu, kii i nlôôha ba nseñ: I kal ni nyo le di nhémle nye tole i éba hala ni maboñok més?

7. Ba ngwéhna bo ni bo

Baa bikristen bi ma ba bebee i ti niñ yap inyu sôñ lôkisañ yap? Tuk VIDÉÔ, i mbus ni kwélél mbadga ini.

VIDÉÔ: A bé bebee i sem niñ yé (2:55)

• Munu vidéô ini, inyuki mankéé Lloyd a bé bebee i neebe le ba nol nye iloole ba nol mankéé Johansson?

• Baa u nhoñol le ba bi boñ i yom bañga bikristen i nlama boñ?

• Lelaa banigil ba Yésu (bañga bikristen) ba ntehe bôt ba biloñ bipe, tole bôt ba ba gwé bé nlélém kôgôô kiki bo?

• Ngéda gwét, kii gwéha i ntinde bañga bikristen i boñ?

I SEM KWEP

Bañga bikristen i noñ biniigana bi Bibel, i gwé bañga gwéha, i ñañal ki ñañ nlam.

Mambadga ma mbigda

• Hee bañga bikristen i nyôñôl biniigana gwap?

• Kii i yé yimbne i bañga bikristen?

• Umbe nson ba ngwel?

KÔNDE YÉÑ

Béñge lelaa ngim bôt i mboñ biliya i noñ biniigana bi Yésu ni ndémbél yé.

Bonjee ba yé Mbôgi Yéhôva? (1:13)

Béñge jam li bi hôla muda wada i léba “bañga lihaa li bikristen.”

“Inyu timbhe mambadga mem momasôna ba bi gwélél Bibel!” Nkum Ntat 1 Matôp, 2014)

Béñge lelaa bañga bikristen i nhôla lôkisañ yap i ngéda bikuu.

Mahôla bilôk bikéé bi nkôs i ngéda bikuu​—Dinyo malép 3:57

Béñge lelaa di nla tibil kôna ndémbél i Yésu i len ini, kiki bikristen bi hiai hi bisu bi bé boñ.

“À quoi se reconnaît le christianisme authentique?” (La Tour de Garde, 1er mars, 2012)