Djob a nsébél we le u yila liwanda jé

Djob a nsômbôl le u ba liwanda jé. Baa u ma hoñol kel yada le u yé le u ba liwanda li Ñane ngiinda yosô? Abraham, mut kôba, a sébla le liwanda li Djob. (Yakôbô 2:23) Bôt bape ki ba Bibel i mpôdôl ba bi nôgda masé i ba mawanda ma Djob, ba kôs ki ngandak bisai. I len ini, bôt ba nlôl bahoma ba nkoñ isi wonsô ba nyila mawanda ma Djob. Yak we ki u nla ba liwanda li Djob.

Li ba liwanda li Djob li nloo li ba liwanda li mut binam nye kii nye. Djob a nwéha bé bañga yé mawanda nyu to kel to yada. (Hiémbi 18:25) Li ba liwanda li Djob li nloo li bana lingwañ. Ngéda ngwañ mut u nwo, bôt bape bon ba nyégla moni wé. Ndi, i bet ba yé mawanda ni Djob ba gwé lisôô li nkus li to mut a nla bé kadal.—Matéô 6:19.

Bôt bahogi ba nla noode sôña we le u nigil i yi nje a yé Djob. To mawanda moñ mahogi, to bôt boñ ba lihaa yaa ba nla boñ hala. (Matéô 10:36, 37) Ibale bôt bape ba nol we to kônha we woñi, batba le , ‘Nje me nsômbôl lémél—bôt tole Djob?’ Hoñol ki le: Ibale mut a nkal we le u je ha bañ, ba w’a nôgôl nye? Heni! Inyule u nlama je inyu boñ le u niñ. Ndi Djob a nla niñis we i boga ni boga! Jon u ume bañ mut nye kii nye le a sôña we i nigil lelaa u nla ba liwanda li Djob.—Yôhanes 17:3.