U nla ba liwanda li Yéhôva

Yéhôva a ngwés le u tibil yi nye. Inyuki? A mbot ñem le kikii u mba u nke ni bisu i tibil yi nye, i yi maboñok mé, ni sômbôl yé, hala nyen w’a bana ngôñ i yila liwanda jé. Baa u nhoñol le u nla toi ba liwanda li Djob? (Añ Tjémbi 25:14.) Kii u nla boñ inyu yila liwanda li Djob? Bibel i ntimbhe i mbadga i, i ntoñol ki inyuki i ba liwanda li Yéhôva li yé jam li nlôôha ba lilam u nla bana.

1. Kii Yéhôva a mbat le u boñ?

“Kôôgana bebee ni Nyambe, ndi yak nye a’ kôôge bé bebee.” (Yakôbô 4:8) Kii hala a nkobla? Yéhôva a ngwés le u yila liwanda jé. Ngim bôt i nhoñol le i yé ndutu i yila liwanda li Djob inyule ba ntehe bé nye. Ndi ikété Lipôdôl jé le Bibel, Yéhôva a nhôla bés i yi nye ni i kôôge nye bebee. Ngéda di ñañ Bibel, di nkônde lédés liwanda jés ni Yéhôva to ibale di ntehe bé nye.

2. Inyuki Yéhôva a yé bañga Liwanda u nla bana?

Mut nye ki nye a ngwés bé we kiki Yéhôva. A nsômbôl le u ba maséé ni le u soohe nye. Hiki ngéda u gwé ngôñ ni mahôla u nla ‘bééga nye nduña yoñ yosôna inyule a ntôñ we.’ (1 Pétrô 5:7) Yéhôva a yé bebee i nit, i hôgbaha ni i hôla mawanda mé.​—Añ Tjémbi 94:18, 19.

3. Inyu yila liwanda li Yéhôva kii di nlama boñ?

Yéhôva a ngwés bôt bobasôna, “ndi a yé liwanda li bôt ba téé sép.” (Bingéngén 3:32) Yéhôva a nsômbôl le mawanda mé ma mboñ i mam ma nlémél nye, ma oo ki i mam a ñoo. Bôt bape ba nkal le ba nla bé nôgôl matiñ ma Yéhôva momasôna ma ma mbéñge loñge ni béba. Ndi to hala, Yéhôva a nok bo. A neebe hiki mut nu a mboñ biliya i gwés Nye ni i lémél Nye.​—Tjémbi 147:11; Minson mi baôma 10:34, 35.

KÔNDE TÉM

4. Abraham a bé liwanda li Yéhôva

Ñañ u Abraham (tole Abram) di nléba ikété Bibel u nhôla bés i yi kii i ba liwanda li Yéhôva i nkobla. Añ ñañ u Abraham i kaat Bibôdle 12:1-4. I mbus ni kwélél mambadga mana:

• Kii Yéhôva a bi kal Abraham le a boñ?

• Kii Yéhôva a bi bôn nye?

• Kii Abraham a bi boñ?

5. Kii Yéhôva a nsômbôl le mawanda mé ma boñ?

Bés bobasôna di nsômbôl le mawanda més ma bôñôl bés ngim mam.

• Mambe mam u nsômbôl le mawanda moñ ma bôñôl we?

Añ 1 Yôhanes 5:3, i mbus ni kwélél mbadga ini:

• Kii Yéhôva a nsômbôl le mawanda mé ma boñ?

Inyu nôgôl Yéhôva di nlama héñha bilem gwés ni maboñok més. Añ Yésaya 48:17, 18, i mbus ni kwélél mbadga ini:

• Inyuki Yéhôva a mbat mawanda mé le ma boñ mahéñha i niñ yap?

6. Lelaa Yéhôva a nhôla mawanda mé?

VIDÉÔ: Yéhôva a mboñ ngandak inyu yem (3:20)

• Lelaa Yéhôva a bi hôla muda ba mpôdôl mu vidéô ini i yémbél kon wé mahoñol ni woñi?

Añ Yésaya 41:10, 13, i mbus ni kwélél mambadga mana:

• Kii Yéhôva a mbôn le a ga boñ inyu mawanda mé?

• Baa u nhoñol le Yéhôva a nla ba loñge liwanda? Inyuki?

7. Inyu ba liwanda ni Yéhôva, di nlama kwel ni nye

Bañga mawanda i nkwel hiki ngéda. Añ Tjémbi 86:6, 11, i mbus ni kwélél mambadga mana:

• Lelaa di nla kwel ni Yéhôva?

• Lelaa Yéhôva a nkwel ni bés?

I SEM KWEP

Yéhôva a nyéñ yila Liwanda joñ, a ga hôla ki we i kôôge nye bebee.

Mambadga ma mbigda

• Lelaa Yéhôva a nhôla mawanda mé?

• Inyuki Yéhôva a nsômbôl le mawanda mé ma boñ mahéñha i niñ yap?

• Baa u nhoñol le i mam Yéhôva a mbat ma nlôôha let i nôgôl? Inyuki?

KÔNDE YÉÑ

Umbe nseñ u nla kôhna i ba liwanda ni Yéhôva?

“Jéhovah : un Dieu qui mérite d’être connu” (La Tour de Garde, 15 février 2003)

Nigil lelaa u nla yila liwanda li Djob.

“Comment devenir l’ami de Dieu?” (Les jeunes s’interrogent. Réponses pratiques, Volume 2, chapitre 35)

Béñge inyuki muda wada a nkal le liwanda jé ni Yéhôva li bi sôñ nye.

“Me bé kon nyemb woñi!” (Nkum Ntat No. 1 2017)

Emble jam boñge ba wanda ba nkal inyu Yéhôva.

Liwanda ni Djob li nlona kii bés? (1:46)