Paradis i yé bebe!

Mam mabe ma mbôña hana isi i len ini ma ñunda le Paradis i yé bebe. Bibel i bi kal le ilole hisi hi nyila paradis, di ga tehe mam ma nkônha woñi. Di niñil mangéda ma hanano! Mam Bibel i bi kal le m’a bôña mo mana:

Gwét bi keñi. “Loñ y’a nyagbene loñ, ane ki i kolba ane.” (Matéô 24:7) I mbañ ini i nyon. I bôdôl nwi 1914, gwét bi ntôla biba ni ngandak bipe bi titigi bi ma tagbe. Didun di bôt di ma wo mu i gwét bi.

Makon. “Dimala d’a ba” bahoma bahoma. (Lukas 21:11) Baa hala a yé maliga? Ñ. Cancer, kon u ñem, mbak, lihep li keñi, SIDA, ni makon mape ba ma nol didun di bôt.

Njal. Ngandak bôt hana isi i gwé bé bijek bi kôli inyu yap. Didun di bôt di nwo njal hiki nwi. Hala a yé yimbne ipe i ñéba le paradis i yé bebe. Bibel i nkal le: “Njal y’a ba.”—Markô 13:8.

Nyeñk disi. “Nyeñk disi . . . y’a ba bahoma bahoma.” (Matéô 24:7) Yak bibañga bini bi nyon i ngéda yés. I bôdôl 1914, ñyenk disi i ma nol iloo hidun hibôt hiada.

Bibéba bibôt. Bôt ba’ ba ba “ngwés moni, ba tôñôg bomede.” Ba’ “gwés masé ma nkoñ isi iloo kiki ba ngwés Djob.” Bon ba’ “ndogbene bagwal.” (2 Timôtéô 3:1-5) Baa u neebe ga le ngandak bôt i yé hala i len ini? Ba nti bé Djob lipém, ba ntéñga ki i bet ba noode nigil i yi Djob.

Manola. Yak “liyan mbén la’ yaaba.” (Matéô 24:12) Ni maliga wemede u ntehe le manola ma bé loo bé ihéga i nwii mi bi tagbe kii ma yé i len ini. To he homa mut a yé ba nla nibil nye, ba pôs nye, ba boñ ki nye béba.

Mam mana momasô ma ñéba le Ane Djob i yé bebe. Bibel i nkal le: “Kii ni ntehe mam mana ma nkahal bôña, yina le Ane i Djob i yé bebe.” (Lukas 21:31) Ki i yé Ane i Djob? Ane i Djob i yé énél i ngi i ya’ lona paradis hana isi. Ane i Djob ya’ nyihe biane bi bôt ba binam.—Daniel 2:44.