Mam Mana Momasô Ma Nkobla Le Laa?

YÉSU KRISTÔ a kal le bôt b’a yimbe le “Lisuk li hiai hi mam” li nkola ngéda b’a tehe gwét, njal, makon, ni nyeñg di hisi.—Matéô 24:1-8; Lukas 21:10, 11.

I bôdôl i nwii 1914 niñ i bi ôbi inyule biloñ ni matén ba njo gwét i pôla yap, hala a nlôl jôga li ngéda inyule baéga ba bibase ba bi jôb i mam ma mbô’ ni ki le i len ini mintonba mi ntjama ni nkoñ isi wonsô.

To hala kii njoñ yi i nbulus manjel i kégés ngandak bijek, mbôgôl didun di bôt i nkoñ isi wonsô i nkon njal iloo héga. Hiki nwii didun di bôt di nwo njal.

Makon, téntén makon ma nlôôa, ma yé jam jada ikété yimbne Yésu a pôdôl. I mbus gwét bi ntôla bi bisu, ngoñkele i bi nol iloo 21 000 000 ma bôt. Mahéñha ni makon ma bisu ma bôt ba bé kon ndik ngim bahoma, ngonkele i bi tôla biloñ bi hisi gwobisôna yak ni biôn binonoga. SIDA, i len ini, i ntihba bôt, hisi hiosô, yak makon kikii bo mbak, lihep li keñi, ndim i nlôl balom, ni kon u hilo ma ngi kôndge kon bôt i biloñ bi nyep.

Kikii miñañ mi nkal, hiki nwii, hisi hi nyeñg môma ma dikôô di ngélé, ndi ha ni nlélém mbimba bé. To hala kii bôt ba bi ôô bikei, ba yi ki añ ni toñol nyeñg di hisi ni mbimba yap, di nok hiki ngéda i miñañ le nyeñg di hisi i nkudul mambok ma bôt ba ôñi ngandak.

Bibel i bôk kal ki le: “Yi jam lini le, i dilo di nsôk mangéda m’a ba mabe, ma bak ndutu i nihbe. Inyule bôt b’a ba bagwés bomede, bagwés moni, bôt ba ngagal, bôt ba ngôk, baôbôs môl, bandokbene bagwal, bangiyi ti mayéga, bôt ba ba nla bé bôtlene ñem, bahañba gwéha linyañ li bôt, batjél nok maéba, bôt ba minsohi, bangigwel bomede, bôt ba nyai, baoo mam malam, balibana bôt, bôt ba ño mbe, bahumbul manyuu, bagwés biléléé iloo kii ba ngwés Djob, ba nenge le ba nsiñge Djob ndi ba tañbaga lipémba jé; keñgle nya bôt i.”—2 Timôtéô 3:1-5.

Ba u nebe ga le di niñil mangéda “mabe, ndutu i nihbe”?

Ba u nyimbe ga le bôt ba ngwés ndik bomede iloo héga, ba gwéhég moni, ni le maboñog map ma nyon ni ngôk?

Nje a nla pééna le nkoñ isi u yé nyonok ni bôt ba ba nyégsa bape i boñ ndik sômbôl yap ndi ba nyi bé ti mayéga, ba tjélék nok maéba, bôt ba ba nla bé bôtlene ñem?

Ba u ntehe ga le ndok bon i kolba bagwal i nkônde bet, ni ki le gwéha i mal i nya i nkônhana woñi, ha ndik ngim bahoma bé, ndi i nkoñ isi wonsô?

I ba bé pééna, u ntehe ga le nkoñ isi di niñil u yé ñôbag ni gwéha i biléléé, ndi le u gwé bé gwéha i mam malam. Hala nyen Bibel i ntoñol bilem bi ga lôôha nene i “dilo di nsôk.”

Ba di gwé ngôñ ni mbogye iloo ha i éba u mbe ntén ngéda di niñil? Yésu a kal ki le i nlélém ngéda u nyen ñañ nlam u Ane Djob u mba u ñañlana ni nkoñ isi wonsô. (Matéô 24:14) Ba hala a mbôña?

La Tour de Garde, kégikel nu a umne ngi Bibel ni nu a gwé ndik bôlô i añal ñañ nlam u Ane i Yéhôva, a ntilba hiki ngéda ni nsongi mahop u u nloo mahop mimbamble mimpe mi ngwélél.

Hiki nwii, Mbôgi Yéhôva i nlôôs iloo hikôô hi didun di ngeñ inyu añal ñañ nlam u Ane Djob.

Hiki ngéda, Mbôgi Yéhôva i mpémés ki bikaat bi bi ntoñol Bibel ikété bebe le 400 i mahop, yak ni dilémb ba ngwélél i biloñ bi bi nlôôha nonog ni bi bi gwé ndik ndék bôt. Mbôgi Yéhôva i ntôla biloñ gwobisô ni ñañ nlam; ba añal ki wo i ngandak biôn ni mabôga matitigi ma ma gwé bé mahee mis ma baane. Ikété ngandak biloñ, ba nyoñ ngéda i niiga bôt Bibel.

Ni maliga, ñañ nlam u Ane i Djob u ñañlana ni hisi hiosô, ha inyu hielel nkoñ isi bé, ndi inyu bok mbôgi. To he homa bôt ba yiine, ngéda i ntina bo le ba tehe nseñ i yi nje a bi hek ngii ni hisi, lelaa b’a nôgôl matiñ mé ni unda gwéha inyu mut wap libôk.—Lukas 10:25-27; Masoola 4:11.

Ndék ngéda, we Ane i Djob i mpubus hisi, i héya bibéba bi bôt gwobisô, ndi i yilha hisi hiosôna paradis.—Lukas 23:43.

[Nkéñég matila i si lipep 6]

Dilo di nsôk di ki?

Di ta bé dilo di nsôk di mbôda bôt. Inyu bet ba mboñ sômbôl i Djob, Bibel i mbôn bo niñ boga.—Yôhanes 3:16, 36; 1 Yôhanes 2:17.

Di ta bé dilo di nsôk di hisi. Bañga i Djob i mbôn le hini hisi hi ga ba liyéne li bôt boga ni boga.—Tjémbi 37:29; 104:5; Yésaya 45:18.

Ndi, dilo tini di yé dilo di nsôk di hiai hi mam mabe hini, hi hi hañba gwéha, ni dilo di nsôk di bet ba tiñi ni maboñok mé.—Bingéngén 2:21, 22.

[Nkéñég matila i si lipep 7]

Ba Bibel i yé toi Bañga i Djob?

Ngandak ngélé, bapôdôl ba Bibel ba ba tila le: “Hana nyen Yéhôva a mpot.” (Yésaya 43:14; Yérémia 2:2) To Yésu Kristô, Man Djob, a bi kônde hihe le a ‘bé niiga bé mahonol mé nyemede.’ (Yôhanes 14:10) Bibel yomede i ntendel le: “Tilna yosôna i nlôl ni Djob.”—2 Timôtéô 3:16.

Kaat ipe yo ki yo i ta bé ntilbaga ni ngandak dilémb kikii Bibel—iloo 2 200, inoñnaga ni Likoda li Bakobol Bibel. Kaat ipe i ntjéma bé kikii yo—i len ini iloo dikôô di didun dina di Bibel. Ba hala ga nyen i nsômbla le nwin u nlôl yak Djob inyu bôt bobasôna u ba?

Inyu boñ le u kônde bana mbogye le Bibel i nlôl toi ni Djob, béñge i kaat ini le La Bible : Parole de Dieu ou des hommes?, ntilga ni Mbôgi Yéhôva.

Ibale u ñañ Bibel ni mana mahoñol le i yé toi Bañga i Djob, w’a bana soso nseñ.

[Nkéñég matila i si lipep 8]

Ki i yé Ane Djob?

I yé énél i tôbô i Djob li maliga le Yéhôva, Nheg ngii ni hisi, a bi téé. —Yérémia 10:10, 12.

Bibel i ñunda le Yésu Kristô nyen Djob a bi ti ngui ane ini. (Masoola 11: 15) Ngéda a ba hana isi, Yésu a éba le a gwé hélha ngui ane i i nlôl nye ni Djob—ngui ini yon a bé gwélél inyu bémbe mbug mbebi ni tuye ni mangudga mé, ni i mélés nya makon yosôna, yak ni i tugul bawoga. (Matéô 9:2-8; Markô 4:37-41; Yôhanes 11:11-44) Mbañ Bibel i bôk kal le Djob a bé lama ti ki nye “ngui ni lipém ni ane, le ndi matén, biloñ ni dilémb, bobasô ba gwélél nye.” (Daniel 7:13, 14) Énél ini i nsébla le Ane i ngii; nyo i ngii nyen Yésu Kristô a ñénle hanano.

[Titii i lipep 7]

Ñañ nlam u ñañlana ni hisi hiosô