Mbok Mondo Inoñnaga Ni Mbônga U Djob

BAÑGA Djob le Bibel, i nti bés botñem i ngéda i nkal le: “Di mbem ngii yondo ni hisi hi mondo inoñnaga ni mbônga wé, mu nyen telepsép y’a yééne.”—2 Pétrô 3:13.

Ki i yé “ngii yondo”? Bibel i ñat ngii ni énél. (Minson mi baôma 7:49) “Ngii yondo” i yé ane i mondo i y’a énél hisi. I nkéla le i yé mondo inyule y’a héñha hiai hi biane hini di gwé len; i yé ki liben li mondo mu biyônôl bi matéak ma mam ma Yéhôva. Inyu Ane i yon Yésu a niiga bés le di soohe. (Matéô 6:10) Hala kii Djob nyen a yé lipigil li Ane i ni le a nyéne i ngii, i nsébla le “Ane i ngii.”—Matéô 7:21.

Ki i yé “hisi hi mondo”? Hi ta bé hisi le Djob a’ tiimba hek, inyule Bibel i ntibil tendel le hisi hi’a ba liyééne li bôt i boga ni boga. “Hisi hi mondo” hi yé jut li bôt li yondo. Hi ga ba mondo inyule bibéba bi bôt bi ga mélhana. (Bingéngén 2:21, 22) Bôt bobasô b’a ba ba niñ ha yongéda b’a ti Nhek lipém, banôglak nye, ba niñik inoñnaga ni mambén mé. (Tjémbi 22:27) Hanano, bôt ba biloñ gwobisôna ba yé nséblaga i nigil mambén ma, ni i niñil mu. Ba u mboñ hala?

I mbok mondo i Djob, hiki mut a’ ti énél yé lipém. Ba gwéha yoñ i Djob i nyuge we le u nôgôl nye? (1 Yôhanes 5:3) Ba hala a nene i mbai yoñ? i homa woñ nson? i sukulu? ni ikété niñ yoñ yosô?

I mbok mondo i, bôt b’a ba maada i bégés Djob li maliga. Ba u mbégés Nhek ngii ni hisi? Ba libéghak joñ li ñat toi we ni bilôk binyuñ bi mbuu bi biloñ gwobisô, bi matén momasô, bi dilémb tjodisô?—Tjémbi 86:9, 10; Yésaya 2:2-4; Sôfônia 3:9.

[Nkéñég matila i si lipep 17]

Djob nu a mbôn mam mana

Djob nu a mbôn mam mana a yé Nhek ngii ni hisi. Nyen Yésu Kristô a sébél le “mpom Djob u maliga.”—Yôhanes 17:3.

Ngandak bôt i mbégés mop ba bi ôô bomede. Didun di ñôôp bisu bi bititii bi bi gwé bé niñ. Bape ba mbégés matéak ma mam ma bôt, ni biniigana bi bi umne ngii mahoñol ni matehge ma bôt, tole ngôñ yap bomede. To bet ba nkatba le ba ngwélél Bibel bobasô bé bon ba nti jôl li nwet Bibel i nsébél le “Djob li maliga” lipém.—Ndiimba Mbén 4:35.

Nhek a nkal inyu yé yemede le: “Me yé Yéhôva. Hala nyen a yé jôl jem.” (Yésaya 42:5, 8) Jôl lini li nlébna bebe le 7 000 ngélé i Bibel ikété dilémb ba bôk tilna yo. Yésu Kristô a niiga banigil bé i soohe le: “A Tata wés nu a yé ngii, jôl joñ li tééba lipubi.”—Matéô 6:9.

Bimbe bilem Djob li maliga a ngwé? A nkal nyemede le a yé “konangoo ni litop li ñem, nu a mpala bé unup, nu a nyaamba ni loñge ñem ni maliga” ndi nu a nla yaga bé tjél nôgôs bet ba mbôk mambén mé ni ntjeñ. (Manyodi 34:6, 7) Ñañ u maada mé ni bôt ba binam u nyigye le bibañga bini bi yé maliga.

Ni jôl, ni mut a gwé jôl li, ba nlama pubhana, tole ba tééba mapubi. Hala kii a yé Nhek nu a kéhi i ngii ngiinda yosô, a kôli ni manôgla més, ni bibégés gwés gwobisôna. Ba wemede u mbôñôl nye hala?

[Nkéñég matila/Titii i si lipep 18]

Mambe mahéñha “ngii yondo ni hisi hi mondo” b’a lona?

Hisi hi ga yila Paradis Lukas 23:43

Nson u nkônha masé, ngandak bijek Yésaya 25:6; 65:17, 21-23

[Nkéñég matila/Titii i si lipep 19]

Ba w’a kôdôl mam malam ma?

Djob a nla bé tembee!—Titô 1:2.

Yéhôva a nkal le: “Lipôdôl jem . . . l’a témb bé tua i meeni, ndi l’a boñ yaga jam li nkônha me masé, l’a yon yaga inyu jam me ñômôl jo.”—Yésaya 55:11.

Yéhôva a mal heg “ngii yondo ni hisi hi mondo.” Énél i ngii i mbôdôl sal. Hikuu hi “hisi hi mondo” hi mal tegep.

Kikii i mal pôdôl bihélha bimam bipe “ngii yondo ni hisi hi mondo” gw’a lona mbôda bôt, kaat Masoola i ntiimba bibañga bi Djob nyemede, Ñane ngiinda yosôna, le: “Nun ki! me mboñ mam momasôna mondo.” A nkal ki le: “Tila, inyule bibañga bini bi yé ntiik, bi yé ki maliga.”—Masoola 21:1, 5.

Bañga mbadga ini le: Ba hiki wada ikété yés a nkodol niñ yé le ndi a ba nsongi u ba ba kôli bayoñ ngaba mu “hisi hi mondo” i si énél i “ngii yondo”?