“Le Ni Jôb Bañ Ikété Manoodana”
“Yéna péé, ni téñbe ikété masoohe, i boñ le ni jôb bañ ikété manoodana.”—MATÉÔ 26:41.
NJONOG i bé jôga—i likala li a bé ngi nôgda yôha. Yésu Kristô, Man Djob, a bé bebe ni mamélél ma niñ yé hana isi. Yésu a bé tehe le ndék ngéda a’ gwéla, ba pémhene nye mbagi nyemb, ndi a son njonog i ngi kék ngéba. A bé yi le makidik mé ni magweleg mé momasô m’a ti mbôgi lam tole ibe inyu jôl li Isañ. Yésu a bé yi ki le bilôl bi bôt ba binam bi bé bi tiñi mu njonog i. Ni nduña ini yosô, ki a bi boñ?
2 Yésu a ke i wom Gétsémané ni banigil bé. Yésu a bé lôôha gwés homa nu. Nyo ni, a yék banigil bé, a kôôge ndék ni bisu. Kikii a mba nyet ama, a jôb ikété masoohe, a néhne Isañ nu a yé ngii ñem, a bat nye ngui—ha ngélé yada bé, ndi letee ni ngélé aa. To hala kikii a bé peles, Yésu a bi nôgda bé le a nla kolba nduña i ni ngui yé.—Matéô 26:36-44.
3 I len ini, yag bés di yé nidik bipes gwob isôna. I bibôdle bi man kaat nunu, di bi tehe mam ma ñuñda le di niñil i dilo di nsôk di béba hiai hi mam hini. Manoodana ni manjelel ma nkoñ isi u Satan ma nke ndik ni bisu. Makidik ni maboñog ma hiki wada wés nu a mpohol le a ngwélél Djob li maliga ma nti ngim mbôgi inyu jôl jé, ma yé ki nseñ ngandak inyu bot ñem hiki wada wés a gwé i niñ i hisi hi mondo. Di ngwés Yéhôva. Di ngwés ‘hônba letee ni lisuk’—li suk li niñ yés tole li hiai hi mam hini, inoñnaga ni yom y’a bôg. (Matéô 24:13) Ndi lelaa di nla bigda hiki ngéda le mam ma gwé ni moo ni inyu yén péé?
4 Kikii Yésu a ba yi le banigil bé—ba hiai hi bisu ni ba len—ba ga kôs mandutu, jon a béhe bo le: “Yéna péé, ni téñbe ikété masoohe, le ni jôb bañ ikété manood ana.” (Matéô 26:41) Bibañga bini bi nkobla lelaa i ngéda ini? Mambe manoodana u nkolba? Ni lelaa u nla “yén péé”?
Manoodana inyu boñ ki?
5 Hiki kel, bés bobasô di nkôs manoodana le di gwéla i “hiandi hi Nsohop.” (2 Timôtéô 2:26) Bibel i mbéhe bés le Satan a ñamb téntén bagwélél ba Yéhôva. (1 Pétrô 5:8; Masoola 12:12, 17) Inyuki a mbôñôl hala? Nseñ u tane bé nye i nol bés. Satan a nyi le a nyémbél bé ibale di nwo di bag di tiñi ni Djob. Satan a nyi ntiig le, kel ngéda Yéhôva y’a kola, a ga mélés nyemb ni njel i bitugne.—Lukas 20:37, 38.
6 Satan a ngwés mélés ngim yom i i yé nseñ iloo niñ yés i hanano—telep sép yés i pañ Djob. Satan a njoba inyu unda le a nla boñ bés le di kôm Yéhôva mbus. Jon, ibale di nyodi Djob pañ—hala wee di nwaa añal ñañ nlaam tole di ñwas magweleg ma bikristen—hala ni, wee Satan a nyémbél! (Efésô 6:11-13) Jon “Nnoodebôt” a ntéé manoodana i bisu gwés.—Matéô 4:3.
7 Satan a gwé ngandak “manjel i a nlugul” bôt. (Efésô 6:11, Jewish New Testament) A nla noode bés ni njel gwéha i nkus, woñi, pééna, tole ni nyiña u maséé. Ndi njel a mbéna nédél bôt i yé i tômbôs bo. Kikii a yé mut dipôha, a nyi le bomba ñem i nla wéés bés, nya i yé le di kwo ikété manoodana. (Bingéngén 24:10) Téntén ngéda di “ntomb” mahoñol, a ntiinde bés le di somol.—Tjémbi 38:8.
8 Kikii di yé i mamélél ma dilo di nsôk, i mpôna we ngoñle mam ma ntômbôs mahoñol més ma nkônde bôl, ni le jam li li ntihba hiki wada wés. (Béñge minkéñég mi matila: “Mam mahogi ma ma nla ti bés waa.”) Mahoñol, ngéda ma ntomb, to inyu imbe njom, ma nla ki hôyôs makénd més. “Somb ngéda” inyu minson mi mbuu—hala wee yigil i Bibel, like i makoda ni añal ñañ nlam—hala a nla lédél we ibale u nwaa i nyu ni i mahoñol. (Efésô 5:15, 16) U hôya bañ le Nnoodebôt a ngwés le u somol. Ndi ngéda i ta ha bé le di sundi tole di hôya le ngéda di niñil i nyégi! (Lukas 21:34-36) Lelaa u nla kolba manoodana ni yén péé? Béñge manjel ma-na ma nla hôla we.
“Ni téñbe ikété masoohe hiki ngéda”
9 Nigbene Yéhôva ni njel masoohe. Hoñol ndémbél i Yésu i wom Gétsémané. Kii a bi boñ ngéda a bé nog njiiha i ñem? A bi hielba yag Yéhôva inyu bat nye mahôla ikété ndip masoohe nya yé le “biibe yé i yila wegoñle matôi ma matjél ma kwok isi.” (Lukas 22:44) Hoñol jam lini. Yésu a bé yi Satan loñge. Ngéda Yésu a bé i ngii, a bé tehe tjiandi tjodisôna Satan a ngwélél inyu kwés bagwélél ba Djob. Ndi to hala, Yésu a bi hoñol bé le a nla ndik pala yémbél kiyosô Nnoodebôt a’ té i bisu gwé. Ibale Man Djob, nu a bé a yôni, a bé a gwé ngôñ masoohe inyu bat Djob mahôla ni ngui, bô ni ngélé yañen bés ba di ta bé peles!—1 Pétrô 2:21.
10 Hoñol ki le ngéda Yésu a bi béhe banigil bé le ba “ba téñbe ikété masoohe,” a bi kal bo le: “Mbuu u neebe yaga, ndi minsôn mi mbomb.” (Matéô 26:41) Yésu a bé pôdôl minsôn nwen? Nwé bé; yom yo ki yo i bé bomb bé i nyeni inyule a bé peles. (1 Pétrô 2:22) Ndi hala a bé bé nlélém ni banigil bé. Kikii ba bi kôdôl béba ni mahoñol i boñ béba, jon téntén ba béna ngôñ mahôla inyu kolba manoodana. (Rôma 7:21-24) Njom i yon a béhne bo—yag bañga bikristen yosôna i mbus yap—le ba soohege inyu kôhna mahôla i yémbél manoodana. (Matéô 6:13) Yéhôva a ntimbhe nya masoohe i. (Tjémbi 65:2) Lelaa? Manjel ma yé ma, i ndék yosô.
11 I bisu le, Djob a nhôla bés i yimbe manoodana. Manoodana ma Satan ma mpôna tjiandi le ba nwam njel ni jibe. Ibale u ntehe bé tjo, u nla gwéya. Ni njel Bibel, ni bikaat bi bi ntoñol Bibel, Yéhôva a nyelel tjiandi di Satan, inyu hôla bés le di kwo bañ ikété manoodana. Kikii nwii mi ntagbe, hala nyen bikaat ni makoda makeñi bi ntiimba béhe bés inyu bibéba bi mam kikii bo woñi mut, ndéñg, gwéha i nkus, ni manoodana ma Satan mape. (Bingéngén 29:25; 1 Korintô 10:8-11; 1 Timôtéô 6:9, 10) Yéhôva a kôli bé ni mayéga kikii a nyelene bés njômbi i Satan? (2 Korintô 2:11) Mabéhna momasô mana ma yé ndiimbhe i masoohe moñ ma u nsoohe inyu kolba manoodana.
12 Iba, Yéhôva a ntimbhe masoohe més ngéda a nti bés ngui inyu kolba manoodana. Bañga yé i nkal le: “Djob . . . a ga nwas bé bé le ni kôs manoodana ma nloo ngui nan, ndi ikété manoodana a ga néhi njel le ni tohla mu.” (1 Korintô 10:13) Kekikel Djob a’ ume bé le manoodana ma loo bés nya i yé le ngui i héñél bés inyu kolba mo—ibale di nkônde bôdôl nye ñem. Lelaa a “néhi njel” le di tohla? A ‘nti mbuu mpubi bet ba mbat nye wo.’ (Lukas 11:13) Mbuu u u nla hôla bés i hoñol matiñ ma ma nlédés bés inyu boñ mam ma té sép, u nla ki hôla bés i yoñ makidik ma pék. (Yôhanes 14:26; Yakôbô 1:5, 6) U nla hôla bés i hôlôs bilem bilam bi mbéda bés inyu yémbél ngôñ mam mabe. (Galatia 5:22, 23) Mbuu u Djob u nla yag boñ le bilôg biké gwés ‘bi yila bahôla ba ba nti bés makénd.’ (Kôlôsé 4:11) Ba hala a ntinde bé we i ti Yéhôva mayéga kikii a ntimbhe we ikété gwéha ni manjel mana ngéda u nsoohe nye inyu bat nye mahôla?
Neebe mam kikii ma nlo ikété kiyosô u mbémél niñ
13 Inyu yén péé, di nlama neebe mam kikii ma nlôl bés ikété kiyosô di mbémél niñ. Inyule niñ i nlet, ngim mangéda bés bobasô di yé di waa. Ndi di ntééda le Djob a ma bôn bé le d’a bana bé manjelel mun u mañ hiai unu. Yag ngéda ba ba tila Bibel, bagwélél ba Djob ba bé kolba mandutu, kikii bo liyep, tomb ni makon.—Minson mi baôma 8:1; 2 Korintô 8:1, 2; 1 Tésalônika 5:14; 1 Timôtéô 5:23.
14 I len ini, yag bés di gwé més mandutu. Di nlama kolba ndééñga, di nyi nduña i moni, di gwé le di lédés ngéda ñem u ntomb bés, di gwé ki mandutu mape. Ibale Yéhôva a boñog mam ma hélha inyu sôñ bés hiki ngéda di nkôhna manjelel, ba ki hala a nti bé Satan njom inyu suu Yéhôva? (Bingéngén 27:11) Yéhôva a nla nwas yaga le bagwélél bé ba noodana, ngim mangéda le ba nôla ngéda ngi kola i moo ma bakolba bo.—Yôhanes 16:2.
15 Ndi, kii Yéhôva a bi bôn ni? Kikii di mbôg kal, a bi bôn le a ga lédés bés le di la kolba manoodana momasô di yé le di boma, ibale di mbôdôl nye ñem. (Bingéngén 3:5, 6) Ni njel Bañga yé, ni mbuu wé mpubi, ni ntôñ wé, a ntééda bés inyu mam ma mbuu, a hôlga ki bés i tééda maada més ni nye. Ibale di ntééda maada ma , to di ñwo yaa, we di ñyémbél. Jam jo ki jo—to nyemb yaga —li nla bé sôña Djob i bom bagwélél bé ba té sép. (Lôk Héber 11:6) Ni le, kikii hisi hi mondo hi yé bebe, Yéhôva a ga hañ bé yônôs mimbônga minlam mi mi yii, inyu bisai bi bôt ba ngwés nye.—Tjémbi 145:16.
U hôya bañ pééna
16 Inyu hônba ke pam lisuk, di nlama bé hôya bañga pééna i bi boñ le Djob a ume mam mabe. Ibale ngim mangéda mandutu més ma nlôôha yékayéle di bana mahoñol i somol, y’a bane bés nseñ le di hoñol le Satan a bi kolba kunde i Yéhôva i énél ngiinda yosô. Mut malôga nu a bi pééna ki le bet ba mbégés Djob ba ngwélél bé nye ni ñem wap wonsôna. (Hiôb 1:8-11; 2:3, 4) Pééna ini, ni njel Yéhôva a bi pohol inyu mélés yo, bi gwé nseñ iloo hiki wada wés. Inyuki?
17 Kikii Djob a bi ume béba inyu ngim ngéda, hala a bi ti bôt bape pôla le ba neebe maliga. Hoñol ki lini jam le: Yésu a bi son njonog inyu boñ le di kôdôl niñ. (Yôhanes 3:16) Ba hala a ntinde bé bés i ti mayéga inyu jam li? Ba ndi yak bés di neebe hônba mandutu ndég ngéda i boñ le bôt bape ba kôs niñ? Inyu hônba ke pam lisuk, di nlama neebe le pék i Yéhôva i yé keñi iloo yés. (Yésaya 55:9) A ga mélés béba i loñge ngéda, le a mélés yak pééna nya i kôli inyu loñge yés, i boga ni boga. Ni maliga, lelaa hala a bé le a bôña nya ipe? Ngitelesép i ta bé yak Djob!—Rôma 9:14-24.
“Kôôgana bebe ni Djob”
18 Inyu boñ le di hôya bañ le ngéda i gwé ni mo, di nlama yén Djob bebe. Di hôya bañ le Satan a mboñ lia yé yosô inyu ôbôs maada més ni Yéhôva. Satan a nyéñ le di hémle le lisuk l’a lo bé, ni ki le nseñ u ta bé i añal ñañ nlaam, tole i niñil ikété matiñ ma Bibel. Ndi a “yé mut bitembee ni isañ bitembee.” (Yôhanes 8:44) Di nlama yoñ makidik i “kolba Nsohop.” Maada més ni Yéhôva ma yé yom le di nlama bé yan. Bibel i mbéhe bés ni gwéha le: “Kôôgana bebee ni Djob, ndi yag nye a’ kôôge bé bebee.” (Yakôbô 4:7, 8) Lelaa u nla kôôge Yéhôva bebe?
19 Wan mam ikété masoohe li nlôôha nseñ. Ngéda mandutu ma nlôôha yidil we, néhne Yéhôva ñem woñ. Kikii u nyoñ ngéda i toñle nye yom i ntéñga we ni toi, hala nyen yag we w’a pala nôgda ndimbhe yé. Ndimbhe yé y’a ba bé hiki ngéda ki u bemek, ni hoñol yoñ. Ndi ibale u ngwés ti nye lipém, téñbe nye, a ga ti we mahôla ma ma nsômbla we inyu yémbél ikété hônba. (1 Yôhanes 5:14) Kikii u ntehe lelaa a ñéga we ikété niñ yoñ, hala nyen yag we w’a kôôge bebe ni nye. I yé ki nseñ i yoñ ngéda i hoñol bilem bi Yéhôva ni manjel mé, kikii Bibel i ntoñol gwo. Hoñol nya mam i nhôla we; i nkôhna ñem woñ masé, i nyinis ki gwéha yoñ i pañ yé. (Tjémbi 19:14) I gwéha i, iloo mam momasôna, y’a hôla we i kolba manoodana ni yén péé.—1 Yôhanes 5:3.
20 Inyu yén bebe ni Yéhôva, i yé ki nseñ le di yén bebe ni bilôk biké gwés. Jam lini jon d’a kwélél i pes i nsôg i man kaat nunu.
MAMBATGA MA YIGIL
• Kii Yésu a bi boñ ngéda a bé siida, a bag bebe ni nyemb,, ki a bi béhe ki banigil bé le ba boñ? (Maboñ 1-4)
• Inyuki Satan a bé noode bagwélél ba Yéhôva, ni mambe manjel a noodene bés? (Maboñ 5-8)
• Inyu kolba manoodana, inyuki di nlama téñbe ikété masoohe (Maboñ 9-12), neebe mam kikii ma nlo ikété kiyosô di mbémél niñ (Maboñ 13-15), hoñol pééna (Maboñ 16-17), ni “kôôge bebe ni Djob” (Maboñ 18-20)?
[Nkéñég matila i si lipep 25]
Mam mahogi ma ma nla ti bés waa
Mbôô wés/biuni. Ibale di nkon kon u mal bé, tole biuni bi kéñ bés i boñ ngim mam, mahoñol ma nla téñga bés inyule di nla bé gwélél Djob kikii di ngwés.—Lôk Héber 6:10.
Yodop i ñem. Di nla yodop ibale di ntehe le bilia di mboñ i añal Bañga i Djob, bi num bé matam bañga.—Bingéngén 13:12.
Mahoñol le di ta bé nseñ. Ngéda mut a bi meya matééda mabe, a nla hoñol le a ta bé ba gwés, le to Yéhôva a ngwés bé nye.—1 Yôhanes 3:19, 20.
Hiun. Ibale so ngwélél Djob a bi hindha wada wés ñem, ñem u nla siida nye nya yéle a bana mahoñol i tjél ke i makoda ni i yoñ ngaba i ñañ u Ane.— Lukas 17:1.
Ngolba. Bôt bahogi ba ba nyoñ bé ngaba ni hémle yoñ, ba nla kolba we, to tééñga we, tole ndegle we.—2 Timôtéô 3:12; 2 Pétrô 3:3, 4.
[Titii i lipep 26]
Yésu a bi béhe bés le di “téñbe ikété masoohe” inyu bana mahôla i kolba manoodana