Nigil lelaa Yésu a bi kolba manoodana

Ndék ngéda i mbus le Yôhanes a nsôble Yésu, mbuu Djob u ñéga Yésu i ñoñ u Yudéa. A nlama ôt mahoñol i ngii ngandak mam. I sôble yé, ‘ngii i bi yibla.’ (Matéô 3:16) A bé ni le a hoñol mam a bi nigil ni boñ i ngéda a bé i ngii. I pot maliga, a gwé toi ngandak mam i soñda!

Yésu a ntégbaha 40 ma kel ni 40 ma mau i ñoñ. Mu ngéda i, a nje bé to yom. Kiki njal i ntibil gwel Yésu, Satan Nsohop a nlo i noode nye, a nkal le: “Ibale u yé man Nyambe, kal ngok ini le i yila bikoga.” (Matéô 4:3) Mu kiki a nyi le i yé béba i gwélél ngui Djob a bi ti nye inyu gwéñe gwé nyemede, a ntjél boñ jam li.

Nsohop a ntelbene bé ha. A nyoñ njel ipe inyu noode Yésu. A nkal Yésu le a nyodi i homa témpel wada nu a nlôôha ba ngii, a leñba isi. Ndi Yésu a nsômbôl bé hélés bôt i nya i. A ngwélél Bitilna inyu unda le i ta bé loñge i noode Djob hala.

Mu manoodana ma nyônôs maa, Nsohop a ñunda Yésu “biane bi nkoñ isi gwobisôna ni lipém jap” a kal le: “M’a ti we mam mana momasôna ibale u ñôm maboñ isi, ndi u bégés me to ngélé yada.” Yésu a ntjél tjagda, a nkal le: “Nyodi me ha, a Satan!” (Matéô 4:8-10) A nkwo bé mu manoodana, inyule a nyi le bibégés bipubi bi nlama ndik tina Yéhôva. Ñ, a mpohol i téñbe ni Djob.

Di nla ôt biniigana mu manoodana Yésu a mboma, ni mu mam Yésu a mboñ inyu kolba mo. Manoodana ma bé ntiik, hala a ñunda le Nsohop a ta ndik bé yañga béba kiki bahogi ba nkal. Ntiik, a yé toi mut di nla bé tehe. Ñañ unu u ñéba le biane bi nkoñ isi, bi yé bi Nsohop, nyen a nkena gwo. Ibale hala a ta bé maliga, lelaa i ti gwo Yésu i bé le i ba manoodana?

Jam lipe li yé le, Nsohop a bi kal le ibale Yésu a mbégés nye to ngélé yada, ki a bé le a ti Yésu biane bi nkoñ isi gwobisôna. Nsohop a nla yak noode bés ni njel i. Bebek a nla yible bés manjel i bana lingwañ, ane, ni bitel bi nkoñ isi. Kinje libak li pék di ñunda i ngéda di noñ ndémbél i Yésu, di téñbege ni Yéhôva to ibale di gwé mambe manoodana! Ndi, bigda le Nsohop a bi ‘yék [Yésu] letee loñge ngéda ipe i nene.’ (Lukas 4:13) I nla ba nlélém inyu yés. Jon di nlama bé waa ba péé.