Ni nôgda loñge ikété ndumbba nan yosôna

1-3. (a) Lelaa ngandak bôt i ntehe bôlô yap? (b) Lelaa Bibel i ntinde bés i tehe bôlô, ni mambe mambadga di ga kôs ndimbhe munu pes ini?

INYU ngandak bôt i len ini, bôlô i yé kiki kokse. Ngandak i nok ndutu inyule ba ntégbaha ngéda yosôna i boñ ngim bôlô i nlémél bé bo. Jon, i ke mu bôlô i hiki kel, li yé jam li nlol inyu yap. Lelaa i bet ba gwé i nya mahoñol i, ba nla kôhna makénd i ha ñem i bôlô yap​—bebeg yak i gwés yo?

² Bibel i ntinde bés i tehe bôlô ngui kiki jam lilam. I nkal le bôlô ni nsaa wé bi nlona bisai. Salômô a tila le: “Likébla li Nyambe li yé le, hiki mut a jek, a nyok, a nôgdaga loñge ikété ndumbba yé yosôna.” (Ñañal 3:13) Yéhôva nu a ngwés bés, a yéñék ki loñge yés hiki ngéda, a nsômbôl le di nok maséé i sal ni i bumbul matam ma ndumbba yés. Inyu tééda bésbomede ikété gwéha yé, di nlama niñ inoñnaga ni matiñ ni mahoñol mé inyu jam li bôlô.​—Añ Ñañal 2:24; 5:18.

³ Munu pes ini, di ga timbhe mambadga ma-na: Lelaa di nla boñ inyu nok loñge ikété ndumbba yés yosôna? Mimbe mintén mi bibôlô mi ta bé inyu bañga bikristen? Lelaa di nla tjek ngéda kayéle bôlô yés i yuu bañ mam ma mbuu? Imbe bôlô i nlôôha ba nseñ di nla sal? Ndi di bôk ndugi di béñge ndémbél i bôt ba bôlô bakeñi iba ikété ngiinda yosôna​—Yéhôva Djob ni Yésu Kristô.

NGWELNSON NU BÔK NI SÔK, NI BAÑGA NGWELNSON

4, 5. Lelaa Bibel i ñéba le bôlô i Yéhôva i num matam malam?

⁴ Yéhôva a yé ngwelnson nu bôk ni sôk. Bibôdle 1:1 a nkal le: “I bibéé Nyambe a hek ngi ni ’isi.” Ngéda Djob a bi hek hisi ni mam momasôna ma yé mu, a bi ti mbagi, a kal le mam ma bé “loñge ngandak.” (Bibôdle 1:31) Hala a nkobla le a bé maséé iloo héga ni bôlô yosôna a bi boñ hana isi. Ibabé nkaa, Yéhôva nu a yé Djob, a bi hak kiyaga i tehe matam malam ma bôlô yé.​—1 Timôtéô 1:11.

⁵ Djob jés li nwaa bé sal. Ngandak ngéda mbus hek i hisi ni gwom gwobisôna mukété, Yésu a kal le: “Tata a ngwel nson letee ni hanano.” (Yôhanes 5:17) Ndi kii Tata a yé a boñok? Ibôdôl nyoo liyééne jé i ngii, ibabé nkaa, a bé sal bôlô i éga ni bôñgôl bôt ba binam. A bi boñ “hégél yondo,” hala wee minhook mi bikristen mi mi ga sôk ane ni Yésu nyoo ngii. (2 Korintô 5:17) A bé sal inyu yônôs bitééne gwé inyu bôt ba binam​—bi bi yé le, i bôt ba ngwés nye ba kôhna niñ boga i mbok yondo. (Rôma 6:23) Yéhôva a nlama ba maséé ngandak yak inyu matam ma bôlô ini. Djob a bi ôt didun di bôt i neebe ñañ nlam u Ane ni i lona mahéñha i niñ yap inyu boñ le ba tééda bomede ikété gwéha yé.​—Yôhanes 6:44.

6, 7. Kii i ñunda le Yésu a nsal bôlô ngui ibôdôl behee?

⁶ Yak Yésu a yé mut nu a nsal bôlô ngui ibôdôl kôba. Ilole a nlo hana isi kiki mut binam, a bé ‘bañga ngwelnson’ ngéda Djob a bé hek mam momasôna ‘ma ma yé ngii, ni ma ma yé isi.’ (Bingéngén 8:22-31; Kôlôsé 1:15-17) Ngéda a bé hana isi, Yésu a bi kena nson wé ngui ni bisu. Ngéda a bé mañge wanda, a bi nigil bôlô i maoñ, jon a bé yiba kiki “kapinda.”a (Markô 6:3) I bôlô i, i bé i nwééhana, i badak ki likeñge​—téntén inyule ha ngéda i, mashin makeñi inyu kit bikék ma bé bé, to bisabe inyu somb bisélél bi maoñ, to mashin ma nke ni i ngui i nti mapubi. Baa u nla hégda Yésu a nke toñ nkok bikai​—bebeg a bé a bôk ndugi a kit e, mbus a ôt nkok letee ni i homa wé bôlô? Baa u hégda nye a yé oñ mandap? Baa u ntehe nye a yé kôôba bikék, mbus a tômôl nyôl? Baa u ntehe nye a mbañ makôga, bikobot, bitéblé ni gwom bipe? Ibabé nkaa, Yésu a bi nôgda maséé ma yé i ngwel nson nlam.

⁷ Yésu a bé ngwelnson nunkeñi inyu bôlô yé i likalô. Mu ñwii maa ni pes a bi tégbaha hana isi, a bé a pégi ngandak ni nson u nlôôha ba nseñ. Nsoñgi wé u bé le a boma libim li bôt, jon dilo tjé di bôlô di bé nyonok, a bôdlak kekla tutu letee pam juu. (Lukas 21:37, 38; Yôhanes 3:2) A bé kenek “minkoñ ni mambai, a añlak, a kalak miñañ minlam mi Ane Nyambe.” (Lukas 8:1) Yésu a bi ke mbôgôl ni mbôgôl kilométa ni makôô mu manjel ma biték inyu añle bôt ñañ nlam.

8, 9. Lelaa Yésu a bi kon maséé ni ndumbba yé?

⁸ Baa i bôlô ngui Yésu a bé sal inyu likalô, i bé kônha nye maséé? Ñ! A bi nwes mbôô i maliga inyu Ane, a yék i mbus yé ngandak nwom mi mi yé nhôôlak inyu libumbul. I boñ sômbôl Djob li bé ti Yésu ngui kayéle a bé bebee i yék bijek inyu boñ bôlô Djob. (Yôhanes 4:31-38) Hoñol ki maséé a bé le a nôgda ngéda bebee ni lisuk li nson wé hana isi, a bi la kal Isañ ni ñem wé woñsôna le: “Me bi ti we lipém hana ’isi, lakii me mélés nson u ti me le me boñ.”​—Yôhanes 17:4.

⁹ Ni maliga Yéhôva bo Yésu ba yé ndémbél ikeñi i bôt ba ba nkon maséé ni ndumbba yap. Gwéha yés inyu Yéhôva i ntinde bés i yila “bakôna Nyambe kiki bon a ngwés.” (Efésô 5:1) Gwéha yés inyu Yésu i énél bés i “odop mu mabal mé.” (1 Pétrô 2:21) Nano di wan lelaa yak bés di nla kon maséé inyu ndumbba yés.

LELAA DI NLA NÔGDA LOÑGE INYU NDUMBBA YÉS

10, 11. Kii i nla hôla we i tehe yéñe bôlô yoñ i nlona we?

¹⁰ Bañga bikristen i ntehe nseñ i sal inyu kôhna koga kel. Di gwé ngôñ i nôgda loñge, ni i kon maséé ni bôlô yés. Ndi hala a ta bé jam li ntomb ngéda di gwé bôlô i i nlémél bé bés. Ibale di gwé i nya ndutu i, kii di nla boñ inyu nôgda loñge inyu bôlô yés?

¹¹ Béñge yéñe bôlô i nlona we. Di nla bé héñha bôlô yés hiki ngéda, ndi di nla héñha mahoñol di gwé inyu bôlô yés. Ibale di ntibil yoñ ngéda i wan mahoñol ma Djob inyu jam li bôlô, hala a ga hôla bés i tehe bôlô kiki yom i nlona bés yéñe. Kiki hihéga, ibale u yé isañ mbai, béñge jam lini le, to ibale u nkôs bé bañga nsaa mu bôlô yoñ, yi le yon i nhôla we i tééda lihaa joñ. I tôñ lihaa joñ hala, li ta bé sii jam i mis ma Djob. Bañga yé i nkal le, mut a ntééda bé bôt ba lihaa jé, “a yé béba iloo mut a ntop bé hémle.” (1 Timôtéô 5:8) Ibale u mbéñge bôlô yoñ kiki jam li li nhôla we i begee mbegee lihaa Djob a bi ti we, hala a nla hôla we i tehe nseñ ni i nôgda loñge, i baso ba bagwelnson boñ ba nôgda bé.

12. Bimbe bisai di nla kôs ibale di gwé likeñge li bôlô, di bak ki maliga?

¹² Ba mut bôlô, ba ki maliga. Di nla kôhna bisai ibale di nigil lelaa di nla gwel nson wés loñge, di bak ki bôt ba bôlô. I bôt ba gwé likeñge ikété bôlô yap, ba salak ki ni ngui, ba mbéna kôhna bibégés bi bikiñe. (Bingéngén 12:24; 22:29) Kiki di yé bañga bikristen, di nlama ki ba bôt ba maliga i bôlô yés, hala wee di nibil bañ isañ wés bôlô moni, to bisélél, to ngéda. (Efésô 4:28) Kiki di ntehe i pes 14 munu kaat ini, i ba maliga li nlona bisai. Ngwelson nu a nyiba kiki mut maliga, ba mbéna bôdôl nye ñem. Ndi to isañ wés bôlô a ntehe biliya gwés i ba mut bôlô, to a ntehe bé, di nla kon maséé le “kiññem yés i yé loñge,” ni le i yom di mboñ i nlémél Djob.​—Lôk Héber 13:18; Kôlôsé 3:22-24.

13. Ndémbél yés ilam i homa bôlô, i nla ti mambe matam malam?

¹³ Yi le bilem gwoñ bilam bi nla ti Djob lipém. Ngéda di tééda maboñog malam i homa wés bôlô, bôt bape ba ga tehe ndigi mo. Umbe nseñ hala a gwé? Hala a ga “lémés maéba ma Nyambe NtohoI wés.” (Titô 2:9, 10) Ñ, maboñog més malam ma nla hôla bape i tehe bilama bi base yés, hala a ôt ki bo. Hégda ki maséé u nla bana ibale ndémbél yoñ ilam i ntinde liwanda joñ li bôlô i neebe maliga. Yom ipe i nlôôha ba mahee, i yé le: Ngéda maboñog més malam ma nti Yéhôva lipém, ma kônhaga ki ñem wé maséé, maséé mape ma nloo bé ma.​—Añ Bingéngén 27:11; 1 Pétrô 2:12.

GWÉLÉL PÉK NGÉDA U MPOHOL BÔLÔ

14-16. Ibale di nlama yoñ makidik ma mbéñge jam li bôlô, mambe mambadga ma mahee di nlama timbhe?

¹⁴ Bibel i nti bé nsoñgi u bibôlô bi yé bés kunde i boñ tole bi bi ta bé. Ndi hala a nkobla bé le di nla neebe to umbe ntén bôlô. Bitilna bi nla hôla bés i pohol bôlô i i num matam malam, i i téé sép ni i i nlémél Djob. Bitilna bi nla ki hôla bés i tjél bibôlô bi mbébél Djob. (Bingéngén 2:6) Ngéda di nsômbôl pohol bôlô, di nlama badba balôm ba mambadga ima.

¹⁵ Baa i bôlô ini yomede, i yé jam Bibel i nsôña? Bañga i Djob i nsôña wip, bitembee, ni i gwélél bisat. (Manyodi 20:4; Minson mi baôma 15:29; Efésô 4:28; Masoola 21:8) Jon, di ntjél bibôlô gwobisôna bi bi ntinde bés i boñ mintén mi mam mi. Gwéha yés inyu Yéhôva i ga ume bé bés le di neebe bôlô i i ntinde bés i boñ mam ma mbôk mambén ma Djob.​—Añ 1 Yôhanes 5:3.

¹⁶ Baa i bôlô ini, i ga tinde me i yoñ ngaba tole i tinde bape i boñ bibéba bi mam? Di yoñ hihéga. I sal kiki nleege bôt i homa bôlô li ta bé béba. Ndi, kii kristen i ga boñ ibale ba nsébél nye i ba nleege bôt i dokta li li gwé bé bôlô ipe, ndigi i sôh mém? Maliga ma yé le bôlô yé i mbat bé le a ha woo wé mu i lipémés mém jomede. Ndi to hala, baa i bôlô a nsal nyoo i nit bé ngim dokta li li mboñ ndigi bôlô i héya mém​—jam le Bañga i Djob i nsôña? (Manyodi 21:22-24) Kiki di ngwés Yéhôva, di gwé bé ngôñ i bana maada mo ki mo ni maboñog ma Bibel i nsôña.

17. (a) Mambe mam mape di nlama wan ilole di nyoñ makidik ma ntihba jam li bôlô? (Béñge nkéñég matila “Baa me nlama neebe bôlô ini?”) (b) Lelaa kiññem i nla hôla bés i yoñ makidik ma ma nlémél Djob?

¹⁷ Ngandak mangéda, di nla yoñ makidik malam ibale di nwan mandimbhe munu balôm ba mambadga ima di ntehe munu maben 15 ni 16. Ndi, mam mape ma yé le di nlama wan loñge loñge ilole di nyoñ makidik ma mbéñge jam li bôlô. Di bem bañ le nkol u maliga ni u pék u ti bés mambén inyu mintén mi bibôlô nwominsôna.b Bésbomede bon di nlama hek pék inyu yoñ ngim makidik. Kiki di ntehe i pes 2, ni njel yigil i Bibel, di nlama niiga ni sélés kiññem yés i ha Bañga i Djob bisélél i niñ yés. Bibel i nkal le, ibale di “nhianda ikété mahoñol” més, kiññem i nla hôla bés i yoñ makidik ma ma nlémél Djob, ni ma ma mboñ le di tééda bésbomede ikété gwéha yé.​—Lôk Héber 5:14.

LELAA DI NLA BOÑ LE BÔLÔ I YUU BAÑ MAM MA MBUU

18. Inyuki hala a ntomb bé i tééda mam ma mbuu kiki ma bisu i niñ yés?

¹⁸ I boñ le bôlô i yuu bañ mam ma mbuu munu “dilo di nsôk,” li ta bé jam li ntomb inyule ngéda i yé “nledek kiyaga.” (2 Timôtéô 3:1) Léba ni tééda bôlô i yé i ba yom i nlet ngandak. Kiki di yé bañga bikristen, di nyi le di nlama sal ni ngui inyu tééda mahaa més. Ndi ibale di nyoñ bé yihe, i mahiha di nkôs i homa bôlô, ni njômbi nkus, bi nla yuu nson wés u Ane. (1 Timôtéô 6:9, 10) Di béñge ni lelaa di nla “yi bagal mam” kayéle i mam ma nlôôha ba nseñ, mon ma bak ndigi mam ma bisu.​—Filipi 1:10.

19. Inyuki Yéhôva a kôli le di bôdôl nye ñem, ntén bôdôl u, u ga hôla bés i keñgle himbe hiandi?

¹⁹ Ni bôdôl Yéhôva ñem ni miñem minan nwominsôna. (Añ Bingéngén 3:5, 6.) Baa a kôli bé le di bôdôl nye ñem? Ngéda di nwan mam momasôna, baa nye bé nyen a ntôñ ni bés? (1 Pétrô 5:7) A nyi mam ma yé loñge inyu yés iloo yak bésbomede, ni le woo wé u ta bak bé kidik. (Tjémbi 37:25) Jon, i yé loñge le di nôgôl Bañga yé ngéda i nkal le: “Inyule [Djob] a pot le: ‘M’a yôi yaga bé me we; to yék we kekikel.’” (Lôk Héber 13:5) Niñ i ngandak bagwélél ba tôbôtôbô ikété ntôñ i ñunda le Djob a nla ti bés mam ma mbéda bés inyu niñ. Ibale di yé nkwoog nkaa le Yéhôva a ga tôñ toi bés, di ga lôôha bé bana nduña inyu yom lihaa jés li ga je. (Matéô 6:25-32) Di ga neebe bé le bôlô yés i yoña bés kayéle di yôi mam ma mbuu kiki bo likalô ni makoda.​—Matéô 24:14; Lôk Héber 10:24, 25.

20. I bana jis li li yé mbôô li nkobla le kii, kii i nla hôla bés i bana i jis li?

²⁰ Ni bana jis li li yé mbôô. (Añ Matéô 6:22, 23.) I bana jis li li yé mbôô, hala a nkobla le di yônôs bañ niñ yés ni ngandak mam. Kristen i nlama ndigi bok mis mé i ngii jam jada​—boñ sômbôl Djob. Ibale jis jés li yé mbôô, i toñ bibôlô bikeñi inyu bédés likala jés li niñ li ga yoña bé bés. Di ga kwo ha bé ki to mu hiandi hi bahôñôs nyuñga, ba ba ngwés le di hoñol le inyu ba maséé i niñ, di nlama ndigi bana gwom bi ntip pam. Lelaa ni nla ni boñ inyu tééda jis li li yé mbôô? Ni boñ biliya i tjél mapil ma yañga. Ni pégdaha bañ niñ nan ni masañgô ma ma ga lôôha je bé ngéda inyu tééda mo. Ni emble maéba ma Bibel ma ma kal le, ibale “di gwé bijek ni mbot, wee mana mon m’a kola ni bés.” (1 Timôtéô 6:8) Ni boñ biliya binan gwobisôna inyu suhus nkôñ nan u niñ.

21. Inyuki di nlama pohol i mam di ga bugus i niñ yés, kii i nlama ba jam li bisu bisu ikété niñ yés?

²¹ Ni téñbe i bii mam ma mbuu i bisu. Kiki niñ i mpala tagbe, di nlama pohol i mam di ga bugus i niñ yés. Ibale di mboñ bé hala, mam ma ma gwé bé nseñ ma ga je ngéda yés yosôna kayéle di bana ha bé ngéda inyu mam ma nlôôha mahee. Kii i nlama ba jam li bisu bisu i niñ yés? Inyu ngandak bôt i nkoñ isi, i ke bisuklu bikeñi inyu bana ngandak moni, jon li yé jam li bisu. Ndi Yésu a bi ti banigil bé makénd le: “Bé nya yéña ndugi Ane.” (Matéô 6:33) Ñ! Inyu bés bañga bikristen, Ane Djob yon i yé jam li bisu i niñ yés. Niñ yés (hala wee makidik di nyoñ, mam di nhek le di ga boñ ni ma di mboñ nano) i nlama unda le mam ma mbéñge Ane ni sômbôl Djob mon ma nlôôha ba nseñ i mis més iloo mam ma moni ni bôlô minsôn.

NI GWEL NSON U LIKALÔ NI NGUI

22, 23. (a) Kii i yé bôlô i bisu inyu bañga bikristen, lelaa di nla unda le i bôlô i yon i yéne bés nseñ? (Béñge nkéñég matila “Makidik mem ma bi hôla me i bana maséé ni i nôgda loñge ikété niñ yem.”) (b) Makidik moñ inyu bôlô nkoñ ma yé le kii?

²² Kiki di nyi le di yé bebee ni lisuk, di nti ngéda yés yosôna inyu bôlô i bisu i bañga bikristen​—añal ñañ nlam ni yilha bôt banigil. (Matéô 24:14; 28:19, 20) Kiki Yésu nu a yé Ndémbél yés, di gwé ngôñ i ligip mu bôlô i i nla tohol biniñ bi bôt. Lelaa di nla unda le i bôlô ini i yé nseñ inyu yés? Bebee le Mbôgi Yéhôva yosôna i yé baañal miñañ minlam ikété makoda map. Bahogi ba bi bok niñ yap inyu yila basañal i loñ yap tole basañal ba tôbôtôbô i biloñ bipe. Ngandak bagwal i nyi nseñ u yé i tjek mam ma mbuu bon bap ba nlama yônôs mbus ngéda. Jon ba nti bon bap makénd i yila bagwelnson ba ngéda yosôna ikété ntôñ. Baa batéé likalô ba, ba nôgda loñge inyu ndumbba yap? Ibabé nkaa, ba nôgda loñge. I gwélél Yéhôva ni ñem wonsôna jon li yé bañga njel ikété niñ inyu kon maséé ni kôhna ngandak bisai.​—Añ Bingéngén 10:22.

²³ Ngandak yés i nlama sal kel yosôna inyu kôhna koga kel inyu mahaa més. Ndi di hôya bañ le Yéhôva a nsômbôl le di nôgda loñge inyu ndumbba yés. Ibale di mboñ le maboñog ni mahoñol més ma kiha ni mahoñol mé, ni matiñ mé, di nla kon maséé mu bôlô yés. Jon, di yoñ makidik ma ngui le di nwas bañ bôlô i nkoñ i kéñ bés i sal bôlô yés i bisu​—i i yé le di anal ñañ nlam u Ane Djob. Ibale di nha bôlô ini kiki jam li bisu i niñ yés, di ga unda le di ngwés Yéhôva, di ga tééda ki bésbomede ikété gwéha yé.