Kon maséé ni bôlô yoñ

1-3. (a) Lelaa ngandak bôt i ntehe bôlô yap? (b) Mambe mambadga di ga wan munu pes ini?

NGANDAK bôt i len ini, i nsal ni ngui inyu yap ni inyu mahaa map. Ndi ngandak mu i ngwés bé bôlô yap, bape ba konok yak woñi i ke i bôlô hiki kel. Ibale u ma nôgda hala, kii u nla boñ inyu boñ le bôlô yoñ i lémél we? Lelaa u nla ba maséé ni bôlô yoñ?

² Yéhôva a nkal bés le: “Likébla li Nyambe li yé le hiki mut a jek, a nyok, a nôgdaga loñge ikété ndumbba yé yosôna.” (Ñañal 3:13) Yéhôva a bi hek bés ni libak le di gwés bôlô. A ngwés le di ba maséé ni yom di mboñ.​—Añ Ñañal 2:24; 5:18.

³ Jon, kii i nla hôla bés i nok maséé ni bôlô yés? Mimbe mintén mi bibôlô mi ta bé inyu bikristen? Lelaa di nla tjek ngéda kayéle bôlô yés i yuu bañ bibégés gwés inyu Yéhôva? Imbe bôlô di nla sal i i nlôôha ba nseñ?

NGWELNSON NU MBÔK NI NU SÔK, NI BAÑGA NGWELNSON

4, 5. Lelaa Yéhôva a ntehe bôlô?

⁴ Yéhôva nyemede a ngwés bôlô. Kaat Bibôdle 1:1 i nkal le: “I bibéé Nyambe a hek ngii ni ’isi.” Mbus Djob a bi mal hek hisi ni mam momasôna ma yé mu, a bi kal le nson wé u bé “loñge ngandak.” (Bibôdle 1:31) Nhek wés a bé maséé iloo héga ni mam momasôna a bi boñ.​—1 Timôtéô 1:11.

⁵ Yéhôva a nwaa bé sal. Yésu a kal le: “Tata a ngwel nson letee ni hanano.” (Yôhanes 5:17) Tolakii di nyi bé mam malam momasôna Yéhôva a ma boñ, ndi di nyi jôga li mam mu. A bi pohol bôt ba ga énél lôñni Man wé Yésu Kristô, nyoo Ane ngii. (2 Korintô 5:17) Yéhôva a nke ni bisu i éga, ni i tôñ bôt ba binam. Ni njel nson ñañ lam i nkoñ isi wonsôna, didun di bôt di mpam i yi Yéhôva, ba gwé ki botñem i niñ i boga ni boga ikété paradis hana isi.​—Yôhanes 6:44; Rôma 6:23.

6, 7. Umbe ntén ngwelnson Yésu a bé?

⁶ Kiki Isañ, yak Yésu a ngwés bôlô. Ilole a nlo hana isi kiki mut binam, Yésu a bé ‘bañga ngwelnson’ ngéda Djob a ba hek mam momasôna, ma ma yé ngii, ni ma ma yé isi. (Bingéngén 8:22-31; Kôlôsé 1:15-17) Ngéda a bé hana isi, Yésu a bi ke ni bisu i sal ni ngui. Ngéda a bé mañge wanda, a bi nigil bôlô i kapinda, kiki bo i bañ biyééne tole bikobot, ni bôlô maoñ. Yésu a bi lôôha yi bôlô yé kayéle a bé yiba kiki “kapinda.”​—Markô 6:3.

⁷ Ndi, bôlô i bé lôôha bane nye nseñ hana isi, i bé nson u añal ñañ nlam, ni niiga bôt mam inyu Yéhôva. A bééna nwii maa ni pes inyu mélés nson wé, a sal ki ni ngui, a bôdlak nson wé kegla tutu ipam juu. (Lukas 21:37, 38; Yôhanes 3:2) Yésu a bi ke mbôgôl ni mbôgôl i kilométa ni makôô, mu manjel ma biték, inyu añle libim li bôt ñañ nlam.​—Lukas 8:1.

8, 9. Lelaa Yésu a bi kon maséé ni nson wé?

⁸ Inyu Yésu, i sal bôlô Djob i bééne nye kiki bijek. I bôlô i i bé ti nye ngui, ni makénd. Yésu a bé sal ni ngui ngim dilo kayéle a bé la ha bé to bana ngéda i je. (Yôhanes 4:31-38) A bé gwélél hiki pôla a bé kôhna inyu hôla bôt bape i yi njee a yé Isañ. Inyu hala nyen a bé le a kal Yéhôva le: “Me bi ti we lipém hana ’isi, lakii me mélés nson u ti me le me boñ.”​—Yôhanes 17:4.

⁹ Ntiik, Yéhôva bo Yésu ba nsal ni ngui, ba bak ki maséé ni bôlô yap. Di gwé ngôñ i yila “bakôna Nyambe,” di gwé ki ngôñ i “odop mu mabal [ma Yésu].” (Efésô 5:1; 1 Pétrô 2:21) Inyu hala nyen di nyéñ sal ni ngui, di boñok kii yosôna di nla i hiki jam di nsal.

LELAA DI NTEHE BÔLÔ YÉS?

10, 11. Kii i nla hôla bés i bana litehge lilam inyu bôlô yés?

¹⁰ Bés bagwélél ba Yéhôva, di nsal ni ngui inyu yoñ ndun ni bésbomede, ni mahaa més. Di gwé ngôñ i nôgda loñge ni bôlô yés, ndi hala a nla ba jam li nlet. Kii ni di nla boñ ibale bôlô u nsal i nlémél bé we?

¹¹ Bana litehge lilam li bôlô yoñ. Di nla bé héñha bôlô yés, ndi di nla héñha litehge di gwé inyu bôlô yés. Ibale di nyoñ ngéda i nok kii Yéhôva a mbem le di boñ, hala a ga hôla bés. Kiki hihéga: Yéhôva a mbem le isañ mbai a boñ kii yosôna a nla inyu tôñ lihaa jé. Jon, Bibel i nkal le, mut nu a ntééda bé bôt ba lihaa jé, “a yé béba iloo mut a ntop bé hémle.” (1 Timôtéô 5:8) Ibale u yé isañ mbai, u nsal ni ngui inyu tôñ lihaa joñ. To u ngwés, to u ngwés bé bôlô u nsal, u nyi le kiki u nke ni bisu i tôñ lihaa joñ, u nlémél Yéhôva.

12. Bimbe bisai di nla kôs ibale di yé mut bôlô, di bak ki maliga?

¹² Ba mut bôlô ni mut maliga. Bilem bi, bi nla hôla we i nok maséé ni bôlô yoñ. (Bingéngén 12:24; 22:29) Jam jada li yé le, nwet woñ bôlô a nla bôdôl we ñem. Bet ba bôlô ba mbéna diihe bagwelnson bap ba ba yé maliga, inyule ba nip bé moni, to gwom bipe, to ngéda yap bôlô. (Efésô 4:28) Jam li nlôôha ba nseñ li yé le, Yéhôva a nyi ngéda di nsal ni ngui, di bak ki maliga. U nla bana ‘loñge kiññem’ inyule u nyi le u nlémél Nyambe nu u ngwés.​—Lôk Héber 13:18; Kôlôsé 3:22-24.

13. Bimbe bisai bipe u nla kôs inyu ndémbél yoñ ilam i homa woñ bôlô?

¹³ Yi le bilem gwoñ bilam i homa woñ bôlô, bi nla ti Yéhôva lipém. Hala a yé bés njom ipe i nok maséé ni bôlô yés. (Titô 2:9, 10) Hala a nla ki boñ le liwanda joñ li bôlô jada li bana ngôñ i nigil Bibel inyu ndémbél yoñ ilam.​—Añ Bingéngén 27:11; 1 Pétrô 2:12.

IMBE BÔLÔ ME NLAMA POHOL?

14-16. Kii di nlama wan ngéda di mpohol bôlô?

¹⁴ Bibel i nti bé nsoñgi u bibôlô bi yé bés kunde i boñ tole bi bi ta bé. Ndi i gwé matiñ ma ma nla hôla bés i yoñ makidik malam, ma ma mbéñge bôlô. (Bingéngén 2:6) Ngéda di ngwélél matiñ ma Bibel, di nla badba mambadga mana ma noñ.

¹⁵ Baa bôlô ini i ntinde me i boñ jam Yéhôva a ntehe béba? Di bi nigil mam Yéhôva a ñoo kiki bo wip ni bitembee. (Manyodi 20:4; Minson mi baôma 15:29; Efésô 4:28; Masoola 21:8) Jon, di nlama tjél hiki bôlô i i nkiha bé ni matiñ ma Yéhôva.​—Añ 1 Yôhanes 5:3.

¹⁶ Baa i bôlô ini i nit tole i nhôñôs jam Yéhôva a nsôña? Kiki hihéga, i sal kiki nleege bôt i homa bôlô i ta bé béba. Ndi, kii kristen i ga boñ ibale ba nsébél nye i ba nleege bôt i dokta, li li gwé bé bôlô ipe ndik lisôh mém? U nyi lelaa Yéhôva a ntehe lisôh mém. Jon, to ibale wemede bé nyen u sôh bôda mém, baa u ga nôgda bé le i mis ma Yéhôva, yak we u gwé pil matjél?​—Manyodi 21:22-24.

17. Kii i nla hôla bés i yoñ makidik ma ma nlémél Nyambe?

¹⁷ Ngéda di noñ matiñ ma Nyambe, di nla ba mintén mi bôt Bibel i mpôdôl i kaat Lôk Héber 5:14, i bôt ba “nhianda ikété mahoñol map le ba yi bagal jam lilam ni jam libe.” Badba le: ‘Ibale me neebe bôlô ini, baa me ga bane bôt bape ngok baagene? Baa bôlô ini i mboñ me le me tjôô sobiina wem ni bon bem, inyu ke sal i loñ ipe? Lelaa makidik ma, ma nla tééñga bo?’

“NI YIMBE MAMBE MAM MA NLÔÔHA BA NSEÑ”

18. Inyuki hala a ntomb bé i bii mam ma mbuu bisu bi niñ yés?

¹⁸ I nla ba ndutu i bii bibégés di nti Yéhôva i bisu bi niñ yés munu dilo di nsôk tini, ti di yé “nledek kiyaga.” (2 Timôtéô 3:1) I léba ni tééda bôlô i nla ba jam li nlet ngandak. Di nlama sal ni ngui inyu tééda lihaa jés, ndi di nyi le bibégés bi Yéhôva bi nlama ba jam li bisu i niñ yés. Di nla bé nwas le njômbi nkus i ba jam li bisu ikété niñ yés. (1 Timôtéô 6:9, 10) Jon, lelaa di nla “yimbe mambe mam ma nlôôha ba nseñ,” ndi nlélém ngéda di yoñok ngéda ni lihaa jés?​—Filipi 1:10, MN.

19. Lelaa bôdôl di gwééne Yéhôva, i nla hôla bés i bana litehge li kôli inyu bôlô yés?

¹⁹ Bôdôl Yéhôva ñem ni ñem woñ wonsôna. (Añ Bingéngén 3:5, 6.) Di nyi le Nyambe a ntibil yi mam ma yé loñge inyu yés, a ntôñ ki bés bañga litôñôk. (Tjémbi 37:25; 1 Pétrô 5:7) Bañga yé i nkal bés le: “Lem nan i ba bañ i gwés moni. Kona maséé ni mam ni gwé, inyule nyemede [Nyambe] a pot le: ‘M’a yôi yaga bé me we; to yék we kekikel.’” (Lôk Héber 13:5) Yéhôva a ngwés bé le di lôôha bana nduña inyu mam lihaa jés li gwé ngôñ. A bi unda ngandak ngélé le a nla yoñ ndun ni litén jé. (Matéô 6:25-32) To kii leñek, di nlama nigil Bañga i Djob hiki ngéda, i ke likalô, ni i ke makoda.​—Matéô 24:14; Lôk Héber 10:24, 25.

20. Lelaa di nla boñ inyu tééda jis li li yé mbôô?

²⁰ Bana jis li li yé mbôô. (Añ Matéô 6:22, 23.) Hala a nkobla le u yônôs bañ niñ yoñ ni ngandak mam, ndi le u bok ndik mis i boñ sômbôl i Yéhôva. Di nyi le hala a yé bijôñ ngandak i nwas le moni, niñ i mbomboo, tole gwom bi ntip pam kii bo téléfôn ni tafel, bi ba jam li bisu i niñ yés iloo liwanda jés ni Djob. Jon, kii i ga hôla bés i bugus mam ma nlôôha nseñ i niñ yés? Di nlama boñ kii yosôna di nla le di bana bañ mapil. Ibale u gwé mapil, yoñ bitelbene i suhus mo, tole mal saa momasôna. Ibale di nyoñ bé yihe, nkus u nla yoñ libim li ngéda yés ni ngui yés, kayéle di la ha bé bana ngéda i soohe, i nigil, tole i téé likalô. Iloole di nwas le nkus u pégdaha niñ yés, di nlama nigil i ba maséé ni mam di gwé kiki bo “bijek ni mbot.” (1 Timôtéô 6:8) To kii leñek, i yé loñge le di wanba hiki ngéda, inyu yi kii di nla ki boñ inyu gwélél Yéhôva i nya i yôni.

21. Inyuki di nlama tibil pohol mam di ga bugus i niñ yés?

²¹ Bugus mam ma kôli toi ba i bisu. Di nlama gwélél ngéda yés, ngui yés, ni nkus wés ni pék. Ibale di nyoñ bé yihe, mam ma nlôôha bé nseñ, kii bo bisuklu tole moni, ma ga yoñ ngéda yés yosôna. Yésu a kal le: “Bé nya yéña ndugi Ane.” (Matéô 6:33) Makidik di nyoñ, bilem gwés, mam di mboñ hiki kel, ni njômbi yés yosôna, bi nyelel kii i yé jam li bisu i niñ yés.

NSON U NLÔÔHA NSEÑ DI NLA SAL

22, 23. (a) Umbe nson u nlôôha nseñ bés bikristen di nla boñ? (b) Kii i ga hôla bés i kon maséé ni bôlô yés?

²² Nson u nlôôha nseñ di gwé, won u yé le di gwélél Yéhôva, ni añle bôt bape ñañ nlam. (Matéô 24:14; 28:19, 20) Kiki Yésu, di nlama boñ kii yosôna di nla mu nson u. Bôt bahogi ba bi ke i sal i het ngôñ batéé likalô i yé keñi. Bape ba nigil hop umpe inyu pam i tééne bôt ba mpot hilémb hi likalô. Noode kwel ni bet ba ma boñ biliya bi, u bat ki bo lelaa ba bi boñ. B’a kal we le makidik ma, ma bi hôla bo i bana niñ i maséé kiyaga, ni i i gwé mahee.​—Añ Bingéngén 10:22.

²³ I len ini, ngandak ikété yés i nlôôs ngandak ngéda i bôlô, tole i nsal ngandak bibôlô ndigi inyu jés mahaa map. Yéhôva a nyi hala, a ndiihe ki mam momasôna di mboñ inyu yoñ ndun ni lihaa jés. Jon, bés bobasôna di ke ni bisu i gwel to imbe bôlô ni ngui, nlélém kiki Yéhôva bo Yésu. Di bigda ki le nson u nlôôha nseñ di gwé i boñ, won u yé gwélél Yéhôva ni añal ñañ nlam u Ane Djob. Ni njel i nyen, di ga kôs bañga maséé.