Ba u gwé ngôñ yi maliga?

MALIGA inoñnaga ni ki? Inoñnaga ni ngim mabadga i nlôôha nseñ le bôt ba binam ba badba. Bebeg le u ma badba inya mambadga ini:

• Ba Djob a ntôñ toi ni bés?

• Ba gwét ni mandutu bi ga mal?

• Ki i mbôña i mbus nyemb?

• Ba botñem i yé inyu bawoga?

• Lelaa me nla soohe inyu boñ le Djob a emble me?

• Lelaa me nla kôhna masé ikété niñ yem?

He homa u nla léba ndiimbhe i mambadga mana? Ikété bisabe bi nuñul bikaat u nla kop dikôô di bikaat bi ntôô le bi gwé mandiimbhe. Ndi mangéda mape kaat yada i neebe bé yom ini ipe i ñkal. Bipe bi nla bana ndiimbhe hanano ndi i sôk nene le bi ntagbe ngéda, bi nlama bôñglana tole héñhana.

Ndi ngim kaat i yé le i gwé mintiig mi mandiimbhe. I yé kaat maliga. Yésu Kristô a kal Djob ikété masoohe le: “Bañga yoñ i yé maliga” (Yôhanes 17:17) I len ini, i Bañga i i ñyiba kikii Kaat Nyambe. I mapep ma noñ ha, u nlôg tehe mintiig mi mamdiimbhe Bibel i nti inoñnaga ni mambadga di ntip sima.

Ba Djob a ntôñ toi ni bés?

INYUKI MBADGA I MBÉDA: Di niñil ikété nkoñ isi u yé ñyonog ni béba ni ngi telepsép. Ngandak bibase i niiga le mandutu di gwé ma yé sômbôl i Djob.

I YOM BIBEL I NIIGA: Djob a mboñ bé béba kel ki kel. Hiôb 34:10 a nkal le: “Bañga Djob a hoñol bé kekikel i boñ béba, to Nu Ngui yosôna i boñ jam li kôdi!” Djob a gwé ngôôba laam inyu bôt ba binam. Inyu hala nyen Yésu a niiga bés i soohe le: “A Tata wés nu a yé i ngii . . . ane yoñ i loo. Sômbôl yoñ i bôña hana isi kikii i mbôña i ngii.” (Matéô 6:9, 10) Djob a ntôñ toi ni bés i nya yé le a bi sal inyu boñ le ngôoba yé i yon ni toi.​—Yôhanes 3:16.

Béñge yag Bibôdle 1:26-28; Yakôbô 1:13; ni 1 Pétrô 5:6, 7.

Ba gwét ni mandutu bi ga mal?

INYUKI MBADGA I MBÉDA: Gwét bi ngi nolog bôt i nya i mbuma nsoñgi. Ndutu i ma tihba hiki wada wés.

I YOM BIBEL I NIIGA: Djob a mbôn le kel y’a kola i ngéda a’ lona nsañ lôñ ni nkoñ isi wonsôna. I si Ane yé i i yéne i ngii bôt ba binam ba ga “nigil ha bé gwét.” Ndi ba ga “ôô pa minsoñ yap disoo.” (Yésaya 2:4) Djob a ga mélés mintén mi ngi telepsép ni mi mandutu ñwomisôna. Bibel i mbôn le: “[Djob] a’ tos gwiiha gwobisôna mis map, nyemb y’a ba ha bé, to malep to nlondok, to njiiha ki b’a ba ha bé. Inyule mam ma bisu [yag ngi telepsép ni mandutu ma len ini] ma mal tagbe.”​—Masoola 21:3, 4.

Béñge yag Hiémbi 37:10, 11; 46:9; ni Mika 4:1-4.

Ki i mbôña i mbus nyemb?

INYUKI MBADGA I MBÉDA: Ngandak i bibase i nkoñ isi i niiga le ngim yom ikété mut i ñyégle i niñ i mbus nyemb. Bipe bi ntôô le bawoga ba nla boñ bayômi béba, tole Djob a mponos bibéba bibôt ni njel i njiiha ikété bee i hié mba ni mba.

I YOM BIBEL I NIIGA: Ngéda mut a ñwo, wee niñ yé i ntelep. Ñañal 9:5 a nkal le: “Bawoga . . . ba ñyi bé to jam.” Kikii bawoga ba ñyi bé jam, ba nôgda bé to yom ndina ni boñ jo ki jo, wee ba nla bé boñ béba​—to hôla​—bayômi.​—Hiémbi 146:3, 4.

Béñge yag Bibôdle 3:19 ni Ñañal 9:6, 10.

Ba botñem i yé inyu bawoga?

INYUKI MBADGA I MBÉDA: Di ngwés niñ, di banga ki ngôñ i niñ ikété masé lôñ ni bet di ngwés. Ngôñ yés i pala tehe bawoga bés di bé gwés i kôli.

I YOM BIBEL I NIIGA: Ngandak bôt i i bi wo y’a tuge. Yésu a bôn le: “bet ba yé ikété bisoñ bi mbigda ba ga . . . pam.” (Yôhanes 5:28, 29) Inoñnaga ni ngôôba i Djob i bibôdle, i bôt ba ga tuge b’a niñil ikété paradis hana isi. (Lukas 23:43) I bilôl bini bi nkobla banga mbôô ni niñ boga inyu bôt ba manôgla. Bibel i nkal le: “Bôt ba téé sép b’a kôdôl hisi, b’a yén ki mu i boga ni boga.”​—Hiémbi 37:29.

Béñge yag Hiôb 14:14, 15; Lukas 7:11-17; ni Minson mi Baôma 24:15.

Lelaa me nla soohe inyu boñ le Djob a emble me?

INYUKI MBADGA I MBÉDA: Bebee le bôt ikété bibase gwobisôna ba nsoohe. Ndi inyu ngandak i neene bo le masoohe map ma nkôhna bé ndiimbhe.

I YOM BIBEL I NIIGA: Yésu a bi niiga bés le di nlama bé tiimba minlélém mi bibuk ikété masoohe més. A bi kal le: “Ngéda ni nsoohe, ni tiimba bañ minlélém mi gwom hiki ngéda.” (Matéô 6:7) Ibale di nsômbôl le Djob a emble masoohe més, di nlama soohe kikii a ngwés. Inyu boñ hala, di nlama nigil ki i yé sômbôl i Djob, le ndi di soohege inoñnaga ni yo. Kaat i bisu i Yôhanes 5:14 i ntoñol le: “Ibale di ñyagal jam kingéda sômbôl i [Djob] a nôgôl bés.”

Béñge yag Hiémbi 65:2; Yôhanes 14:6, 14; ni 1 Yôhanes 3:22.

Lelaa me nla kôhna masé ikété niñ yem?

INYUKI MBADGA I MBÉDA: Ngandak bôt i nhoñol le moni, bañga libag tole bilama bi nti bo masé. Kikii ba noñ mam mana la nyen ba ntehe le masé ma nke bo ngwé.

I YOM BIBEL I NIIGA: Yésu a bi éba ki di nla boñ inyu kôhna masé ngéda a kal le: “Bayébél i mbu ba yé minsaibag.” (Matéô 5:3) Di nla ndig kôhna bañga masé ibale di neebe i yônôs ngôñ yés i yi, hala wee ngoñ yés i yi Djob ni i yi sômbôl yé inyu yés. Maliga ma ma yéne ikété Bibel. Liyi maliga ma li nla hôla bés i yi yom i gwé nseñ ni i i gwé bé nseñ. Ibale di ume maliga ma Bibel le mon ma éga makidik més ni magweleg més, hala a ga ti niñ yés nseñ.​—Lukas 11:28.

Béñge yag Bingéngén 3:5, 6, 13-18 ni 1 Timôtéô 6:9, 10.

Mam mana ma yé ndig ndék mandiimbhe Bibel i nti inyu mambadga masamal ma. Ba u gwé ngôñ i yi iloo ha? Ibale u yé i nsoñgi u “bayébél i mbu”, pééna i ta bé. Mambadga mape ma nla lo we ikété ñem kikii bo: ‘Ibale Djob a ntôñ toi ni bés inyuki a bi ume béba ni mandutu nwii ndi nwii? Lelaa me nla tibil lémés niñ i lihaa jem?’ Bibel i nti mintiig mi mandiimbhe inoñnaga ni mambadga mana lôñ ni mape ki.

Ndi to hala ngandak i mpala bé béñge Bibel. Ba ntehe yo kikii soso kaat nu a nlet i nog mangéda mahogi. Ba u gwé ngôñ ni mahôla inyu léba ndiimbhe ikété Bibel? Mbôgi i Yéhôva i gwé manjel ima ma nla hôla we.

Njel i bisu i yé kaat ba nsébél le, Miñañ minlam mi nlôl ni Djob! I yé ha inyu hôla bôt ba pégi i béñge mintiig mi mandiimbhe Bibel i nti inyu mambadga ma niñ. Njel i ñyônôs iba i yé yigil i Bibel i ndap. I ba bé nsaa, Mbôgi Yéhôva bebee ni mbai yoñ i kôli niiga i nla lo weni, tole homa numpe nu a nlémél we inyu tégbaha ndég ngéda lôñ ni we hiki sonde inyu niiga we Bibel. Didun di bôt ni homa nyensôna i nkoñ isi di bi kôs nseñ ni njel i yigil ini. Ngandak i bi sôg i kal ni masé le: “Me nléba maliga!”

Bañga lisôô li nkus lipe li nloo ha li ta bé. Maliga ma Bibel ma ñyilha bés ngwélés i kolba bihémle bibe, biyubda ni woñi mbe. Ma nti bés botñem, masé, ma tinag ki niñ yés nseñ. Yésu a kal le: “N’a yi maliga, ni maliga m’a yilha bé ngwélés.”​—Yôhanes 8:32.