Léta i Juu li bakena ntôñ

A ntéé likalô nu gwéha:

Hégda le u yé ñôma wada, we ni bana baôma bape ni yé i ngii Hikôâ Ôlivé. Kunda yada, Yésu a mpémél bé. I ngéda a nkahal sômbôl bet i ngii, a nkal le: “Ndi n’a kôhna ngui i ngéda mbuu mpubi w’a lo i ngii nan, ha nyen n’a ba mbôgi yem i Yérusalem, i Yudéa yosôna ni i Samaria, letee ni masuk ma hisi.” (Minson mi baôma 1:8) Kii u yé le u boñ ha ngéda i?

Bebek u nla nôgda le i nson u, u nyét. U nla yak badba le: ‘Lelaa i ndék bôt ini y’a pam i ‘bok mbôgi letee ni masuk ma hisi”?’ Ha nyen u mbigda le, ilole a nwo, Yésu a bi kal le: “Nkol u nloo bé nwet wé. Ibale ba bi tééñga me, b’a tééñga yak bé; ibale ba bi tééda bañga yem, b’a tééda yak bañga nan. Ndi b’a boñ i mam mana momasôna inyu kolba bé hala kiki ni yé banigil bem, inyule ba nyi bé Nu a bi ep me.” (Yôhanes 15:​20, 21) I ngéda u mbigda bibuk bi, u mbadba le: ‘Lelaa me nla pam i bok mbôgi i bisu bi ngolba ni ndééñga?’

I len ini, di mbadba minlélém mi mambadga. Yak bés di nlama bok mbôgi inyu Ane “letee ni masuk ma hisi,” di añle ki “bôt ba biloñ gwobisôna” ñañ nlam. (Matéô 28:​19, 20) Lelaa di nla gwel nson u, téntén i ngéda bôt ba nkolba bés?

Kaat i Minson mi baôma i ñéba lelaa Yéhôva a bi hôla baôma ni bikristen bi hiai hi bisu i gwel nson wap. I kaat ini u yé añ, i ga hôla we i tibil yi lelaa mam ma bi tagbe. U mba nhelek i tehe le ngandak mam i yé nlélém ipôla bikristen bi hiai hi bisu ni bés len. Kiki ’héga, nson di ngwel ni lelaa di ntjek mam inyu gwel nson u. I ôt mahoñol mu i mam ma, i ga kônde kwés we nkaa le Yéhôva a nke ni bisu i éga ntôñ wé hana isi.

Njômbi yés i yé le i kaat ini i kônde hôla we i bôdôl Yéhôva ñem le a ga nit we ni mbuu wé mpubi. Ibale u nôgôl maéba i kaat ini i nti, hala a ga ti we makénd i ke ni bisu i ‘bok mbôgi i nya i yôni’ inyu Ane Nyambe, ni i hôla mut woñ libôk i léba njel i i nkena i tohi.​—Minson mi baôma 28:23; 1 Timôtéô 4:16.