Nheg a nyis mut binam ikété paradis

NGANDAK bôt i neebe le kaat ipe i gwé bibuk bi bisu bi kôli bini i ta bé: “I bibéé Nyambe a hek ngi ni’ isi.” (Bibôdle 1:1) Bini bibuk bi ntomb, ndi bi yé bibuk bi ngui Bibel i ngwélél inyu yelene bés njee a yé Nungigii, nyen Bitilna Bipubi bi mpôdôl, Yéhôva Djob, bayemlikok. Pes Bibel i bisu i nkal le Djob nyen a yé Nheg hisi ni ngiinda yosô. Bipes bi bi noñ ha bi ntoñol le Djob a bi yoñ ntandaa ngéda i heg hisi ni bihélha gwé bimam. Bibel i nsébél ngéda i le dilo.

Hégél i nloo gwôbisôna Djob a heg hana isi hi yé mut binam. Yéhôva a bi heg nye i ôngba yé nyemede. Mut a nla kôna nye i bilem gwé bilam kiki gwéha ni pék. Djob a ungus mut ni nluñ ték. A o nye jôl le Adam, a ha ki nye ikété paradis ba nsébél le wom Éden. Djob nyemede a sal unu wom, a yônôs wo ni bie bilam bi num ngandak.

Djob a bi tehe le i yé nseñ le mut a bana nwaa. Ni nye a gwélél mbai i Adam yada i heg mudaa. A ti nye munlôm le a ba nwaa wé. Ni Adam a sébél nye le Éva. Nyonok ni ngandak masé, Adam a pémés bibuk bi mahak, a kal le: “Hés i bihés gwem ini, yak nsôn u minsôn nwem.” Yak Djob a kônde le: “Jon mut a’ yék isañ bô nyañ a adbe nwaa wé, boba b’a ba nsôn wada.”​—Bibôdle 2:22-24; 3:20.

Djob a bi ti Adam ni Éva mambén ma. Mbén i bisu i bé le ba salak hisi, ba téédaga hio, ba yônôs ki hio ni bon bap. Mbén nyônôs iba i bé le ba je bañ ndik matam ma “e i yi i longe ni béba.” (Bibôdle 2:17) Ibale ba ndogbene nye, ba ga wo. Djob a bi ti bo mana mambén i boñ le ba unda nye le ba neebe le ba yoñ nye kiki Ñane wap. Manôgla map m’a unda le ba ngwés isañ wap ni le ba nti nye mayéga. Yom yo kii yo i bé kéñ bé bo i nôgôl mambén ma Djob. Ba bé peles. Bibel i nkal bés le: “Ni Nyambe a tehe mam momasôna a hek, ndi nun-ki, ma ba longe ngandak.”​—Bibôdle 1:31.

​—Biniigana bini bi nyôñna i kaat Bibôdle pes 1 ni 2.