Djob a nsayap Abraham ni lihaa jé

YÉHÔVA a bé a nyi le kel yada, man nu a ngwés ngandak a’ nok mandutu, a wo ki. Bibel i pot hala bindéé ikété Bibôdle 3:15. I unda bés le sesema i man wé i yé tik likébla li nlôl nyeni, nyen Bibel i nti bés ngim ihéga ni njel jam li bi tagbe i pôla mut wada ni man. Djob a bat Abraham le a ti man wé nu gwéha le Isak kiki sesema.

Abraham a bana soso hémle. Hoñol le Djob a bi bôn nye le Ntohol nu a bé lama lo, tole Mbôô, a’ lôl ni Isak. Abraham a bôdôl ti man wé Isak kiki sesema inyule a bé hémle le ibale Djob a ngwés, a ga tugul nye. Ndi Djob a pala ep añgel le i gwel woo u Abraham. Ni Djob a bégés Abraham inyule a bé bebe i ti nye mpom wé man nu gwéha i sesema. Ha nyen Djob a kônde ti nunu mut telepsép mbônga.

Mbus hala, Isak a gwal bon bôlôm iba, Ésau ni Yakôb. Yakôb a bé mahéñha ni Ésau inyule a bé gwés mam ma mbuu. Inyu hala nyen Yakôb a bi kôhna bisai. Djob a héñha jôl li Yakôb le Israél. Bon ba Israél ba bé 12, bon ba bi yila matén ma Israél. Ndi lelaa lihaa lini li sôk yila soso loñ?

Ngéda bon ba Yakôb bahogi ba bôdôl kil manyañ wap nu mbus le Yôsef njôñ, ngandak mam i bi bôdôl bôña. Ba nuñul nye le a yila nkol i Égiptô. Ndi Djob a sayap nunu mange wanda maként ni telepsép. Tolaki a kôhna mandutu makeñi, Yôsef nyen Faraô, kiñe Égiptô, a pohol inyu ba ñane. Hala a ba loñge jam ha ngéda i, inyule njal i boñ Yakôb le a ep bon bé bape i somb bijek. Kii ba mpam i Égiptô ba boma le Yôsef nyen a nkap bijek gwobisô! Ngandak mam i tagbe. Mbus hala Yôsef a leege bilôg binyan, a nwéhél bo inyule ba bi hielel miñem wap. Ni nye a kôôba mam le lihaa jé djolisô li lo i Égiptô. Ba kôs ki loñge isi le ba sal hio, ba bôl ki mu. Yôsef a tehe le Djob nyen a nwas le mam ma ba hala inyu yônôs mimbônga ñwé.

Yakôb a tégbaha dilo tjé di nsôk di ñunuk mut i pañ lihaa jé li ma keñep i Égiptô. Ilole a bé wo, a lagal le Ntohol, tole Mbôô, a ga ba Ñane nunkeñi. A’ gwééne i mbog lihaa li lok yé le Yuda. Yak Yôsef ilole a nwo, a pot bindéé le kel yada, Djob a’ pémés lihaa li Yakôb i Égiptô.

​—Biniigana bini bi nyôñna i bikaat bi Bibôdle pes 20 i pam 50; Lôk Héber 11:17-22.