Yéhôva a bi hôya bé Yôsep

Ngéda Yôsep a bé i ndap mok, kiñe Égiptô le Faraô i bi emel bieem le mut to wada a bi la bé toñol. Nkol u Faraô wada, u bi kal nye le Yôsep a nla toñlene nye bieem gwé. Faraô a pala om le ba sébél Yôsep.

Faraô a bi bat nye le: ‘Baa u nla toñlene me bieem gwem?’ Yôsep a kal Faraô le: ‘Loñ Égiptô i ga bana ngandak bijek letee ni nwii minsaambok. Ndi i nwii minsaambok mi ga noñ ha, mi mba nwii mi njal ikeñi. Pohol mut pék nu a ga tééda ngandak bijek inyu boñ le bôt boñ ba wo bañ njal.’ Faraô a timbhe le: ‘We nyen me mpohol! U ga ba ntôô mut u nyônôs iba i loñ Égiptô!’ Kii i bi yis Yôsep ndoñi i bieem bi Faraô? Yéhôva nyen a bi hôla Yôsep.

Nwii minsaambok mi bisu, Yôsep a bi tééda ngandak bijek. I mbus, njal i ba hisi hiosôna kiki Yôsep a bi kal. Bôt ba bé lôl bahoma bobasôna inyu somb bijek yak Yôsep. Yakôb, isañ Yôsep a bi nok le bijek bi yé i Égiptô, inyu hala nyen a bi ep jôm li bon bé bôlôm inyu somb bijek.

Bon bôlôm ba Yakôb ba bi ke yak Yôsep, nu a bi hoo yi bo. Ndi lôkisañ i bi yi bé le Yôsep nu. Ba bi ôm maboñ bisu gwé kiki a bi emel ngéda a bé mañge. Yôsep a bééna ngôñ i yi too lôkisañ i gwé ki ôa ikété miñem nwap. Jon a bi kal bo le: ‘Ni yé bôt ba mbep. Ni nsômbôl béñge bahoma ba néhi ba loñ yés.’ Ba bi timbhe le: ‘To! Di bé bon bôlôm 12 i Kanaan. Mankéé wés wada a bi wo, nu mbus a nyégle ni tata wés.’ Ni Yôsep a kal bo le: ‘Ni lona me maasoñ nan nu mbus, ndi me ga hémle bé.’ Jon ba bi témb i ndap isañ wap.

Ngéda bijek bi lihaa bi bi mal, Yakôb a bi témb a om bon bé i Égiptô. Lini lisañ, ba bi ke lôñni Benyamin, maasañ wap nu mbus. Inyu noode lôkisañ, Yôsep a bi sôô libôndô jé li silba ikété mpék u Benyamin, mbus Yôsep a soman ki lôkisañ le bon ba nip jo. Ngéda bagwélél ba Yôsep ba bi léba libôndô li silba ikété mpék blé u Benyamin, lôkisañ i bé nhelek. Ba bi soohe Yôsep le a kogse bo, ha Benyamin bé.

Ha nyen Yôsep a bi yi le lôkisañ i nhéñha. Yôsep a bi la ha bé ban ñem. A bôô maéa, a kal le: ‘Men me yé Yôsep, maasoñ nan. Baa tata a ngi yii niñ?’ Lôkisañ i bé nhelek ngandak. A kal bo le: ‘Jam ni bi boñ me, li tééñga bañ bé. Nyambe nyen a bi ep me hana inyu tééda bé i niñ. Nano, ni pala ke i yéñ tata, ni lona nye hana.’

Ba bi huu i ndap isañ wap inyu añle nye nwin nlam ni kena nye i Égiptô. I mbus ngandak nwii, Yôsep bo isañ ba témb ba ba ntôñ.