Lôk Israél i njôb i Kanaan

BIBÔGÔL bi ñwii i bisu le bon ba Israél ba njôb i Kanaan, Yéhôva a bôn le a nti mbôda Abraham loñ ini. Hala kii Yôsua nyen a yé nano i ño wap, Lôk Israél i yé nkôôbaga i yoñ loñ Djob a bôn bo.

Djob a bi kit le bôt ba Kanaan ba kôli ni nyemb. Ba bi yônôs loñ ni maboñog map mabe, ngandak ndéñg ni manola. Inyu hala nyen, mana matén ma Kanaan Lôk Israél ba yémbél, ma bé lama tjiba.

Ndi ilole ba bé jôp ikété loñ, Yôsua a om bôlôm ba mbep iba. Ba bi yén ikété tison i Yérikô, i ndap mudaa ba ba sébél le Rahab. Nu mudaa a leege bo, a sôñ ki bo to hala kii a bé yi le ba yé bon ba Israél. Rahab a bé hémle Djob li Lôk Israél, inyule a bi nok kii Yéhôva a bi boñ inyu litén jé. Ni nye a boñ le bana bôt ba mbep iba ba kumul nye soñ le nye ni bôt ba ndap yé ba’ nôla bé.

Ndi ngéda Lôk Israél ba jôp i Kanaan i jôs bôt ba Yérikô gwét, Yéhôva a boñ hélha jam ini le lipént li Yérikô li kuuba. Ni bisônda bi Yôsua bi jôp ikété nkoñ, bi pémés Rahab ni lihaa jé, ndi bi tjé tison. Mbus hala, Yôsua a jo gwét ñwii misamal, a kadal soso pes i loñ i Kanaan. Ha nyen matén ma Israél ma kabna loñ.

Bebe ni mamélél ma ngandak ñwii a tégbaha i gwélél Yéhôva, Yôsua a kot litén. A hôñlaha bo mam momasôna Yéhôva a boñ inyu basôgôsôgô bap, a ti ki bo maként le ba kônde gwélél Yéhôva. Ndi ngéda Yôsua ni mimañ mi bôt mi bi gwélél Yéhôva i pañ yé ba wo, Lôk Israél ba tjôô Yéhôva, ba kahal gwélél mob ma bitembee. Ba tégbaha bebe ni 300 ñwii ibabé gwélél Yéhôva inoñnaga ni mambén mé. Mu ngéda i nyen Yéhôva a nwas le bôt ba Filistia ni baoo bape ba tét Lôk Israél. Ndi kii Lôk Israél i nsoohe Yéhôva le a hôla bo, ni nye a téé 12 bakéés i tohol bo.

Ñañ u minson mi bakéés u yé ntilbaga i kaat Bakéés. U mbôdôl ni ñañ u Otniel, u malak ni Simsôn. Mut binam numpe a m’a bana bé ngui kii Simsôn. Maliga ma bisu kaat Bakéés i yighe ngandak ma yé le: Nôgôl Yéhôva kii ñane nu ngiinda yôsôna, w’a kôhna bisai; ndogbene nye, w’a kôhna mandutu.

​—Biniigana bini bi nyôñna i bikaat bi Yôsua; Bakéés; Lôk Lévi 18:24, 25.