Rahab a nsôô bôt ba mbep

Ngéda bon ba Israel ba bi ke pôôbe tison Yérikô, ba bi yén i ndap muda wada le Rahab. Kiñe Yérikô i bi om bisônda i yéñ bo i ndap Rahab. Ndi Rahab a bi sôô i bôt ba mbep ba boba ngii nyôl, a om bisônda i yéñ bo homa numpe. A kal bôt ba mbep le: ‘Me ga hôla bé inyule me nyi le Yéhôva a yé ni bé, ni le n’a yémbél nkoñ unu. Soho ni bôn me le ni ga tohol lihaa jem.’

Bôt ba mbep ba kal Rahab le: ‘Di mbôn we le bôt bobasôna ba mba ikété ndap yoñ, béba jam i ga pémél bé bo.’ Ba kal ki Rahab le: ‘Téñ kôyôp nkôô i winda yoñ, lihaa joñ li ga pei.’

Bôt ba mbep ba bi suhul i winda Rahab ni nkôô. Ba ke i mbok dikôa, ba solop nyoo dilo daa, ndi ba témb yak Yôsua. Mbus ha, bon ba Israel ba yap Lom Yordan, ba bak nkôôbaga inyu yémbél nkoñ. Yérikô a bé tison bisu ba bi yémbél. Yéhôva a bi kal bo le ba kiiña tison ngélé yada hiki kel. Ba boñ hala dilo disamal. Ndi hilo hi nyônôs isaambok, ba bi kiiña tison ngélé isaambok. Mbus, biprisi bi hem dioñ, yak bisônda bi lond ni ngui yap yosôna. Lipénd li tison li kahal kwo! Ndi ndap Rahab, i i bé ñoñok ngii lipénd, i bi yégle i téé. Rahab ni lihaa jé ba bi pei inyule a bi bôdôl Yéhôva ñem.