Tjémbi di nlôl ni Djob i niiga ni ti bés hogbe

INI kaat i gwé ngandak tjémbi di pubi ba bi kot, i yé ki mbôñgô iloo bii bikaat bi Bibel bipe. Litila yo li bi yoñ 1 000 ñwii. Kaat Tjémbi i gwé bibuk bi yé ndip ni bi bi tihba ñem le mut nye ki nye a ba ngi tila. Kaat Tjémbi i ntoñle ki bés kii batila yo ba bé nôkda ikété miñem ñwap: masé, bibégés, mayéga, maéya, ngoo, ni hielñem. Hala a ñunda bés le batôptjémbi ba bé hémle Djob ngandak, ba banga ki maada malam ni nye. Di béñge le ndég mam ba tila mu tjémbi tjap.

Yéhôva a yé Nwet nu telepsép, a kôli ni bibégés. Hiémbi 83:19 hi nkal le: “Wetama wen u yé, nu jôl jé li yé Yéhôva, u yé Nungingi ngi’ isi hiosôna.” Ngandak tjémbi di mbégés Yéhôva inyu gwom a bi heg, kiki tjôdôt di ngii, bihélha bimam bi hisi, ni nyu mut i i nhélhana. (Tjémbi 8, 19, 139, 148) Dipe di ti Yéhôva lipém inyule a ñéba ngui yé i tohol ni sôñ bôt ba hémle nye. (Tjémbi 18, 97, 138) Dipe ki di mbégés nye le a yé Djob li telepsép nu a nlona bôt ba yé ikété ndéénga hogbe, ndi a nkogse baboñbéba.​—Tjémbi 11, 68, 146.

Yéhôva a nti bôt ba ngwés nye mahôla ni hogbe. Bebeg hiémbi hi nyiba iloo tjodisô hi yé Hiémbi 23, i homa David a toñol lelaa Yéhôva a yé Ñéga, Nsôñ, ni Ntééda mintômba nwé. Hiémbi 65:3 hi hôñlaha bagwélél Djob le Yéhôva a yé “nu a ñemble masoohe.” Ngandak i i nkwo ikété béba keñi i lôôha kôhna hogbe ngéda ba ñañ Tjémbi 39 ni 51, i homa David a toñol lelaa a bi kôm bibéba gwé mbus. David a ñunda ki le a nhémle le Yéhôva a ga nwéhél nye. Hiémbi 55:23 hi ntinde bés i bii botñem yés yak Yéhôva ni i bééga nye mbegee yés yosôna.

Yéhôva a ga héñha nkoñ isi ni njel Ane Mésia. Tjémbi dipe di mpôdôl inyu Mésia, Kiñe i i bé lama lo. Hiémbi hi nyônôs iba hi mpot bindéé le Ñane nunu a ga tjé biloñ bibe bi bi nkolba nye. Hiémbi 72 hi nyelel ki le nunu Ñane a ga mélés njal, ngitelepsép, ni ndéénga. Hiémbi 46:10 hi nkal le Djob a ga mélés gwét ni bijôl bi gwét gwobisô. Yak Hiémbi 37 hi nkal le bibéba bi bôt bi ga ba ha bé, ndi biloñge bi bôt gwon bi ga niñ boga ni boga ikété nsañ ni manôgla hana isi.

​—Biniigana bini bi nyôñna i kaat Tjémbi.