Hisi hi nyila paradis!

KAAT Bibel i nsôk le Masoola, i nti bôt ba binam bobasôna botñem. Ini kaat ñoma Yôhanes a tila i gwé ngandak biyiinda bi bi ñunda lelaa ngôôba i Yéhôva y’a yon.

Yiinda i bisu i ñunda lelaa Yésu a mbégés, a kodlak ki mintôñ mi bikristen mbus bitugne gwé. Yiinda i noñ ha i ñunda bés yééne i Ane Djob i ngii, i homa bihégél bi mbuu bi nti nye bibégés ni ñem wap wonsôna.

Bihélha bimam bi mbôña ki ngôôba Djob i yé yon. Yésu Kristô Man Ntômba Djob, a nkôs kaat yada i gwé bibéndél bisaambok. Ngéda ba yibil bibéndél bina bi bisu, bakilhosi bana ba pam. Nkilhosi nu bisu a yé Yésu i ngii puba hosi, a gwé ntut u ñunda le a yé Kiñe. Nkilhosi nu yônôs iba a yé yimbne i gwét, nu yônôs baa a yé yimbne i njal. Nkilhosi nu a nsôk a yé yimbne i makon. Mam mana momasô ma mbôñna i dilo disôk di hiai hini. Ngéda ba yibil béndél i nyônôs saam­bok, ha nyen sép isaambok i bôdôl hem i legel mbagi i Djob. Gwom bini bi nlona dimala disaambok di di yé minleg la mi hiun hi Djob.

Ane Djob i ntééba ngii wengoñle man munlôm nu a ntip gwéé. Kiki gwét bi kwo i ngii, Satan ni mimbuu nwé mimbe mi léña hana isi. Inyu hala nyen kiñ keñi i nkal le: “Ngoo ni isi” inyule Nsohop a nyai ngandak, lakii a ngi gwé ndik ndég isii ngéda.​—Masoola 12:12.

Yôhanes a ntehe Man Ntômba i ngii ni 144 000 ma bôt ba ba bi yôña hana isi. Nunu Man Ntômba a yé yimbne i Yésu. Bôt bana bon “b’a ane ki lôñ yada ni” Yésu. Masoola a yelene bés le i 144 000 ma bôt bana bon ba yé bijô bi Mbôô i likak bi nsôk.​—Masoola 14:1; 20:6.

Bikiñe bi nkoñ isi gwobisôna bi nkodba i Armagédôn, “gwét bi ngwa nkeñi u Nyambe Bayemlikôk.” Bi njôs mut a yiine i ngii hosi i mpôp gwét, jôl jé le Yésu. Nyen a ñéga mintôñ mi gwét mi ngii i tjé bikiñe gwobisôna. Ngéda Satan a ngwéla, Yésu ni 144 000 ma bôt ba ga ane hisi “hikôô hi ñwii.” Mbus hikôô hi ñwii, Satan a ntjiba.​—Masoola 16:14; 20:4.

Kii Ane i hikoo ñwii i Yésu ni i 144 000 ma bôt i ga lona bôt ba binam ba ba yé manôgla? Yôhanes a ntimbhe le: Yéhôva “a’ tos gwiiha gwobisôna mis map; nyemb y’a ba ha bé, to malep, to nlondok, to njiiha ki, b’a ba ha bé, inyule mam ma bisu ma mal tagbe.” (Masoola 21:4) Hisi hi nyila paradis!

Hala nyen kaat Masoola i ntip ñwin u Bibel. Ni njel Ane Mésia, jôl li Yéhôva li ga tééba lipubi, yak kahab yé kii Ñane ngiinda yosô y’a ômôp siñ-siñ boga ni boga!

​—Biniigana bini bi nyôñna i kaat Masoola.