Maéba ma mbéñge hémle, bihiumul ni gwéha

YAKÔBÔ ni Yuda ba bana nyañ wada ni Yésu. Pétrô ni Yôhanes ba bé ikété 12 baôma ba Yésu. Bana bôt bana, ba tila maléda masaambok ma ma nlébna ikété Bitilna bi kristen ni hop u Grikia. Hiki léda li gwé jôl li nwet a tila jo. Ma gwé maéba ma nlôl ni Djob i hôla bikristen le bi téñép ni ñem wap maliga i pañ Yéhôva, ni i pañ Ane yé.

Bikristen bi nlama unda hémle yap. Ibale di mpot ndik ni nyo le di gwé hémle, hala a kôli bé. Bañga hémle i ntinde mut i minson. Yakôbô a tila le “hémle ngi minson i yé woga.” (Yakôbô 2:26) Minson mi hémle to ikété manoodana mi nti hônba. I kolba manoodana, ngwélél Djob a nlama bat nye pék, a banga ki botñem le Djob a ga ti nye yo. Hônba i mboñ le di kôhna bisai bi Djob. (Yakôbô 1:2-6, 12) Ibale mut hémle a mbégés Djob ni ñem maliga, Yéhôva a’ nit nye. Yakôbô a kal le: “Kôôgana bebe ni Nyambe, ndi yak nye a ‘kôôge bé bebe.”​—Yakôbô 4:8.

Hémle i kristen i nlama bana ngui i kôli hôla nye i kolba manoodana ni mam mabe mape. Kiki homa ba bé niñil a bé nyônôg ni baboñbéba, jon Yuda a tinde lôkisañ yé le ba “hianda banga lihiandga inyu hémle.​—Yuda 3.

Bikristen bi nlama bana bihiumul bipubi. Yéhôva a ngwés le bagwélél bé ba ba bapubhaga i bipes bi niñ yap gwobisô. Pétrô a tila le: ‘Ni ba bapubhaga ikété nya bihiumul yosôna inyule i yé ntilbaga le, n’a ba bapubhaga inyule me [Yéhôva, me] yé numpubi.’ (1 Pétrô 1:15, 16) Bikristen bi bi kôhna ndémbél lam ba nlama noñ. Yon Pétrô a sima ngéda a kal le: “Kristô ki a son njonok inyu nan, a yigle bé ndémbél le ni odop mu mabal mé.” (1 Pétrô 2:21) Bikristen bi ntééda “loñge kiññem” to ibale ba nson njonok inyule ba niñ inoñnaga ni mambén ma Djob. (1 Pétrô 3:​16, 17) Pétrô a ti bikristen maként le ba yon ni bihiumul bipubhaga ni siñge Djob ñem. A kal ki bo le ba bem malo ma ngwa u Djob ni hisi hi yondo, “mu nyen telepsép i nyééne.”​—2 Pétrô 3:11-13.

Bikristen bi nlama unda le ba ngwés Yéhôva ni bôt bape. Ñoma Yôhanes a tila le: “Nyambe a yé ngwéha.” A toñol ki le Djob a bi unda gwéha yé i keñi ngéda a bi ep Yésu i ba “bi­kwak inyu bibéba gwés.” Kii ni bikristen bi nlama boñ? Yôhanes a ntoñol le: “A bagwéha, ibale Nyambe a gwés bés hala, wee yak bés di nlama gwéhna.” (1 Yôhanes 4:8-11) Njel yada i unda gwéha i yé i ngéda bikristen bi nleege lôkisañ yap ni liyômba.​—3 Yôhanes 5-8.

Ndi lelaa ni bagwélél ba Yéhôva ba nla unda nye gwéha yap? Yôhanes a ntimbhe le: “Inyule gwéha Nyambe ini, le di tééda matiñ mé, ndi matiñ mé ma ta bé nledek.” (1 Yôhanes 5:3; 2 Yôhanes 6) Bet ba ngwés Djob hala, ba nyi le yak Djob a ga kônde gwés bo “ikepam niñ boga.”​—Yuda 21.

​—Biniigana bini bi nyôñna i bikaat bi Yakôbô; 1 Pétrô; 2 Pétrô; 1 Yôhanes; 2 Yôhanes; 3 Yôhanes; Yuda.