Lelaa di nla kôôge bebe ni Djob?

1. Baa Djob a ñemble masoohe momasôna?

Djob a naña bôt bobasôna le ba kôôge nye bebe ni njel masoohe. (Tjémbi 65:3) Ndi a ñemble bé, hala we a neebe bé masoohe momasôna. Kii héga, ibale munlôm a ntééñga nwaa, hala a nla kit masoohe mé njel. (1 Pétrô 3:7) Ngéda Lôk Israél i bi lôôha boñ béba, Yéhôva a bi tjél emble masoohe map. Jon masoohe ma yé bisai. Ndi Djob a neebe yak masoohe ma mut nu a yé béba ngandak ibale a héñha.​—Añ Yésaya 1:15; 55:7.

Béñge vidéô Baa Nyambe a ñemble masoohe momasôna?

2. Lelaa di nlama soohe?

Masoohe ma yé ngim njel yada inyu bégés Djob. Di nlama soohe ndik Nheg wés le Yéhôva. (Matéô 4:10; 6:9) Kiki di ta bé peles, jon di nlama soohe i jôl li Yésu inyule nyen a bi wo inyu bibéba gwés. (Yôhanes 14:6) Yéhôva a nyéñ bé le di tiimba minlélém mi masoohe tole di gwélél bikaat bi masoohe. A yéñ le masoohe més ma nlôl ikété ñem nwés.​—Añ Matéô 6:7; Filipi 4:6, 7.

Yak ngéda di soohe Nheg wés ikété ñem, a ñemble. (1 Samuel 1:12, 13) A naña bés i soohe nye to imbe ngéda. Kii héga, u nlama soohe ngéda u ntôde ni ngéda u nke nañi, i ngéda je, ni ngéda u yé ikété mandutu.​—Añ Tjémbi 55:23; Matéô 15:36.

3. Inyuki bikristen bi nlama kodba inyu bégés Djob?

I yé ndutu i kôôge Djob bebe inyule di niñ ni bôt ba ba nhémle bé nye, ba nol ngéda Djob a mbôn le a ga lona nsañ hana isi. (2 Timôtéô 3:1, 4; 2 Pétrô 3:3, 13) Jon di nlama tiige baso bikristen bebe le di tina makénd.​—Añ Lôk Héber 10:24, 25.

Ngéda di Kodba ni bôt ba ngwés Djob, hala a nhôla bés i kôôge bebe ni nye. Ngéda u ga kodba ni Mbôgi Yéhôva i makoda map, hala a ga lédés hémle yoñ.​—Añ Rôma 1:11, 12.

4. Lelaa di nla kôôge Djob bebe?

Di nla kôôge bebe ni Yéhôva ibale di nyon ngéda i tibil nok gwom di nigil ikété Bibel. Yoñ ngéda i hoñol maboñog, maéba, ni mimbônga mi Djob. Ibale di nyon ngéda i tibil nok Bibel ikété masoohe, hala a nhôla bés i kônde diihe gwéha ni pék i Djob.​—Añ Yôsua 1:8; Tjémbi 1:1-3.

U nla ba liwanda li Djob ibale u mbôdôl nye ñem ni ibale u nhémle nye. Mut binam a gwé ngôñ ni bijek inyu niñ. Hala ki nyen, inyu boñ le hémle yé i hol, a nlama yoñ ngéda i soñda biniigana bi Bibel.​—Añ Matéô 4:4; Lôk Héber 11:1, 6.

5. Lelaa likôôge bebe ni Djob li nla lona we bisai?

Yéhôva a ntôñ ni ba ba ngwés nye. A nla tat bo le yom to yada i tééñga bañ hémle yap. A nsôñ ki bo le ba nimis bañ botñem yap i niñ boga. (Tjémbi 91:1, 2, 7-10) A mbéhe we le u semb diamba di nkoñ isi di di nlona we ngadak makon mabe, di boñog ki le u nimis masé moñ. Yéhôva a niiga bés lelaa di nla bana bañga niñ.​—Añ Tjémbi 73:27, 28; Yakôbô 4:4, 8.