Samuel a bi ke ni bisu i boñ loñge

Bôdôl nye mañge ntitigi, Samuel a bé a niñ, a salak i lap Djob, i homa bôt ba bé lo i bégés Yéhôva. Baa u nyi lelaa i bi bôña ndi Samuel a yééne i lap Djob? Di pôdôl ndugi inyu nyañ Samuel, le Hana.

Inyu ntandaa ngéda Hana a bé la bé gwal, to hala kiki a bééna ngôñ i bana man. Jon a bi soohe Yéhôva, a yagal yaga le a hôla nye. Hana a bi bôn le ibale a mbana man munlôm, ki a ñep nye i niñ, ni i sal i lap Djob. Yéhôva a timbhe masoohe mé, ni Hana a bana man. A o nye jôl le Samuel. Ndik kiki Hana a bi bôn, ngéda Samuel a bééna jam kiki bo ñwii maa tole mina, a kena nye i sal i lap Djob.

Éli a bé prisi keñi i lap Djop. Bon bé ba bôlôm boba ba bé sal nyoo, ba bak biprisi. Hoñol le lap Djob i bé ndap i het bôt ba mbégés Djob. Inyu hala, loñge yon bôt ba bé lama boñ nyoo. Ndi bon ba Éli ba bé boñ bibéba bi mam ngandak. Samuel a bé tehe mam ba bé ba mboñ. Baa Samuel a boñ mam mabe kiki bon ba Éli?— Heni, a bi ke ni bisu i boñ loñge, ndik kiki bagwal bé ba bi niiga nye.

U nhoñol le Éli a bé le a boñ bon bé boba kii?— A bé lama nôgôs bo. A bé lama bé neebe bo le ba kônde ke ni bisu i sal i lap Djob. Ndi Éli a bi boñ bé hala, jon Yéhôva a bi unbene nye, a unbene yak bon bé bôlôm boba. A kit le a ga kogse bo.

U wada, ngéda Samuel a bé a niñi, a nok mut a nsébél nye: ‘A Samuel!’ Samuel a ke ngwéé yak Éli, ndi Éli a kal le: ‘Me nsébél bé me we.’ Kiñ i témb i sébél nye hala ngélé iba. Mbus ngélé i nyônôs aa, Éli a kal Samuel le ibale a ntémb a nok kiñ i nsébél nye, a nlama kal le: ‘Soho, a Yéhôva pot; me ñemble we.’ Hala nyen Samuel a bi boñ. Yéhôva a kal Samuel le: ‘Kal Éli le me ga nôgôs lihaa jé inyu mam mabe ba mboñ.’ Baa u nhoñol le hala a bé sii jam inyu Samuel i legel i nya ntén ñwin?— Hala a bé bé sii jam. Ndi to hala kiki Samuel a bé kon woñi, a bi boñ jam Yéhôva a bi kal nye. Jam Yéhôva a bi pot li bi yon. Bon bôlôm ba Éli boba ba bi nôla, mbus yak Éli a wo.

Samuel a yé loñge ndémbél inyu yés. A bi boñ loñge to hala kiki a bé tehe bôt bape ba mboñ bibéba bi mam. Baa yak we? Baa u ga ba kiki Samuel i ke ni bisu i boñ loñge? Ibale u mboñ hala, u ga kônha Yéhôva ni bagwal boñ maséé.