Timôtéô a bééna ngôñ i hôla bôt

Timôtéô a bé mañge wanda nu a bé maséé i hôla bôt. A bi hiôm bahoma ngandak inyu hôla bôt. Inyu hala nyen niñ yé i bé nyonok ni ngandak maséé. Baa u gwé ngôñ i nok ñañ wé?—

Timôtéô a bi nañ i tison ba bé sébél le Listra. I ngéda a bé sii mañge, mbômbô yé Lôis, ni nyañ le Euniké, ba bi bôdôl niiga nye mam ma mbéñge Yéhôva. Kiki Timôtéô a bi nañ, ngôñ yé i bé le a hôla bôt i yi mam ma mbéñge Yéhôva.

I ngéda Timôtéô a bé a ngi yii mañge wanda, Paul a bi kal nye le ba ke lôñ i añal ñañ nlam bahoma bape. Timôtéô a neebe. A bé bebee i ke ni i hôla bape.

Timôtéô a bi ke bo Paul i tison yada i Makédônia ba nsébél le Tésalônika. Inyu pam nyoo, ba bé lama ke mbôñgô liké li makôô, ndi i mbus, ba yoñ sitima. Ngéda ba bi sôk ba pam, ba bi hôla ngañdak bôt i nigil mam ma mbéñge Yéhôva. Ndi ngim bôt i bi unup, i yéñ i boñ bo béba. Jon Paul ni Timôtéô ba bi nyodi, ba ke i añal ñañ nlam bahoma bape.

Sôñ i bi tagbe ngandak, ni Paul a kal Timôtéô le a témb i Tésalônika i béñge lelaa bilôk bikéé bi yé. Hala a bé badak makénd ngandak i témb mu béba tison i! Ndi Timôtéô a bi ke inyule a bé tôñôk ni bilôk bikéé. Ni mahuu mé, a lona Paul mañwin malam. Bilôk bikéé bi Tésalônika bi bé mbôô i libak li mbuu!

Timôtéô a bi sal ni Paul ngandak ñwii. Lisañ jada Paul a tila le a bééna bé mut numpe kiki Timôtéô a bé le a om i hôla makoda. Timôtéô a bé gwés Yéhôva, a gwéhék ki bôt.

Baa u ngwés bôt, u gwéhék ki hôla bo i nigil mam ma mbéñge Yéhôva?— Ibale Ñ, u nla bana loñge niñ i yé nyonok ni ngandak maséé, kiki Timôtéô!