Ane i i ga énél nkoñ isi wonsôna

Baa u nla hégda Ane imbe di mpôdôl?— Ñ, Ane Djob i, i Ane i ga yilha hisi paradis. Baa u gwé ngôñ i kônde nigil mam ma mbéñge Ane i?—

Hiki Ane i gwé kiñe. Kiñe a ñénél i ngii bôt ba yé i loñ yé. Baa u nyi njee a yé Kiñe Ane Djob?— Yésu Kristô nu. A niñil i ngii. Ndég ngéda a ga ba Kiñe i hiki mut hana isi! Baa u nhoñol le di ga ba maséé, ngéda Yésu a mba a ñénél nkoñ isi wonsôna?—

Di ga ba maséé kiyaga! Ikété Paradis, bôt ba ga jo ha bé, to ke ki i gwét. Bôt bobasô ba ga gwés wada ni nuu. Mut nye ki nye a ga kon bé, to wo a ga wo bé. Mut ndim a ga tehe, ndok mut i ga nok, yak bôk mut i ga la ke ngwéé ni pind. Ngandak bijek i ga ba inyu hiki mut. Nsañ u ga ba ipôla binuga ni bés, ni ipôla yap. Bôt ba bi wo ba ga témb i niñ. Libim li bôlôm ni bôda ba u nigil munu man kaat nunu, kiki bo Rébéka, Rahab, David, ni Élia, ba ga lo bitugne. Baa u gwé ngôñ i boma bo ngeñ ba ga témb i niñ?—

Yéhôva a ngwés we, a gwé ki ngôñ le u ba maséé. Ibale u nkônde ke ni bisu i nigil i yi Yéhôva ni nôgôl nye, wee w’a niñ boga ni boga ikété loñge homa, le paradis! Baa hala nyen u nsômbôl?—