Lelaa ni nla tjek mam ma moni

Bés bobasôna di gwé ngôñ ni moni inyu somb gwom bi yé nseñ inyu bôt bés ba lihaa. (Bingéngén 30:8) Inyu hala nyen Bibel i nkal le: “moni mi nsôñ” mut. (Ñañal 7:12) Hala a nla ba ndutu i kwélél mam ma moni ikété libii. Ndi, ni nwas bañ le moni mi lona mindañ ikété libii linan. (Efésô 4:32) Ñwaa bo nlôm ba nlama bôdlana miñem. Ba nlama ki nôgla ngéda ba nyoñ makidik inyu gwélél moni nwap.

1 NI ÔT NSOÑGI INYU GWÉLÉL MONI LOÑGE

JAM BIBEL I NKAL: “Njee nan, ibale a nsômbôl oñ litédél, a mbôk bé ndugi yén isi, a ôt ndamba, i tehe too a gwé mam ma nsômbla i mélés jo?” (Lukas 14:28) Hala a yé mahee ngandak le ñwaa bo nlôm ba nôgla lelaa ba ga gwélél moni nwap. (Amôs 3:3) Ni kit ntôñ kii ni nlama somb, ni moni ñwañen ni nlama pémés. (Bingéngén 31:16) Ni somb bañ gwom bi tane bé bé nseñ to ibale ni gwé moni. Ni boñ biliya i keñgle mapil. Ni bôñôl ndigi moni ni gwé.​—Bingéngén 21:5; 22:7.

JAM U NLA BOÑ:

• Ibale ni mal somb gwom gwobisôna bi yéne bé nseñ, ni nôgla kiki ni ga bôñôl moni mi nyégle

• Ibale moni mi nhañ, ni suhus nomba i gwom ni nsomb. Kii héga, ni lamb bijek binan bé bomede, ilole ni ke je i mbégdé

2 POT MALIGA, KON KI MASÉÉ NI MONI NI GWÉ

JAM BIBEL I NKAL: “Di nkôôba le mam momasôna ma telep loñge, ha bisu bi Nwet nyetama bé, ndi yak bisu bi bôt ki.” (2 Korintô 8:21) Yible ñwaa woñ tole nlô woñ ñem woñ, inyu kal nye maliga, le a yi moni ñwañen u nkôs ni moni ñwañen u mpémés.

Hiki ngéda, bôk ndugi tehe nlô woñ tole ñwaa woñ ilole u mpémés ngandak moni. (Bingéngén 13:10) Ibale ni meya ni mpôdôl mam ma moni, hala a ga hôla bé i yén nsañ ikété ndap nan libii. Yoñ bañ moni u nsal kiki moni ñwoñ wetama, ndi kiki moni mi ndap yoñ lihaa.​—1 Timôtéô 5:8.

JAM U NLA BOÑ:

• Ni nôgla tañlaa hiki mut a nla bôñôl ibabé i bat kunde

• Ni bem bañ le ndañ u kwoo, ndi ni kaha pôdôl mam ma moni