Baa moni mi yé nkañ u mam mabe momasôna?

Ndimbhe Bibel

To. Bibel i nkal bé le moni mi yé mimbe, i nkal bé to le moni yé nkañ u mam mabe momasôna. Di mbéna nok i bibuk bini le “moni mi yé nkañ u mam mabe momasôna” ndi i bibuk bi, bi yôni bé, bi nyumhana ki. Bibel i nkal ntiik le “gwéha i moni i yé nkañ u mam mabe momasôna.”a—1 Timôtéô 6:10, Ngobol Yondo i Louis Segond. Di mbot i buk ini le “gwéha” inyu unda le bés bon di nkônde yo.

Kii Bibel i nkal inyu moni?

Bibel i nkal le moni mi nla ba nseñ i ngéda di ngwélél nwo loñge, mi nla yak ‘sôñ’ bés. (Ñañal 7:12) Bibel i mpôdôl ki bôt, ba ba gwé lem i kébél bôt bape, ba tinak bo moni.—Bingéngén 11:25.

Bibel i nti ki bés mabéhna le di bii bañ moni i bisu bi niñ yés. I nkal le: “Ni niñ bañ niñ i bôt ba ba ngwés moni, ni konok maséé ni i mam ni gwé hanano.” (Lôk Héber 13:5) Kii hala a niiga bés? Le moni mi yé nseñ, ndi di bii bañ nwo i bisu bi niñ yés. Jam li nlôôha nseñ li yé le di kon maséé ni i mam ma yé toi nseñ kii bo bijek, mbot ni liyééne.—1 Timôtéô 6:8.

**Inyuki Bibel i nkal le di gwés bañ moni?**

I bôt ba nhép nkus tole bôt ba huluk ñem ba ga kôhna bé niñ boga. (Éfésô 5:5) Inyuki? Pog, lihép nkus li yé i bégés bisat tole i bégés banyambe bape. (Kôlôsé 3:5) Iba, kiki bahép nkus ba noñ ndigi i mam ma nkon bo ngôñ, hala nyen ngandak ngélé ba mbôk matiñ ma Nyambe. Kaat Bingéngén 28:20 i nkal le: “I mut a nyéñ hoo kwo ngwañ, a ga ba bé nginsohi.” Bahogi ba yé yak le ba boñ mam ma le mbén i nsôña kii bo minhanak, malôga, i kadal bôt moni ni malôga, i nip bôt tole i kôp matjél map.

To ibale gwéha i moni i ntinde bé mut i bana maboñok mabe hiki ngéda, ndi i nla lona nye bikuu. Bibel i nkal le: “I bôt ba nai ndik le ba mba mingwañ ba nkwo ikété manoodana, ikété hiandi ni ikété ngandak minheña mi bijôñ mi mi nôgha njôghe.”—1 Timôtéô 6:9.

Ibale di noñ maéba ma Bibel inyu moni, bimbe bisai di ga kôhna?

Ibale di noñ maéba ma Nyambe inyu moni, di ga tééda ét yés i nyuu, di lémél ki Nyambe. I bet ba nyéñ toi lémél Nyambe, a mbôn bo le: “Me yé mbén i yék we, to tjôô me yé mbén i tjôô we.” (Lôk Héber 13:5, 6) A mbôn bés ki le: “Mut maliga a ga kôhna ngandak bisai.”—Bingéngén 28:20.

Minlôñ mi Bibel inyu moni

Ñañal 7:12: “Moni mi nsôñ mut.”

Kii hala a nkobla: Moni mi nla ba nseñ i ngéda mi ngwéélana loñge, inyule mi nla sôñ mut.

Lukas 12:15: “Yak i ngéda mut a gwé ngandak lingwañ, niñ yé i nlôl bé i mam a gwé.”

Kii hala a nkobla: Moni mi ta bé yom i nlôôha ba nseñ i niñ, mi ta bé to le mi ti bés tohi.

1 Timôtéô 6:10: “Gwéha i moni i yé nkañ u mam mambe momasôna; bôt bahogi ba ba ntumbba inyu yônôs i gwéha i, ba bi ke haa ni hémle, ba nôgha ki bomede njôghe homa nyensôna.”

Kii hala a nkobla: Moni mi ta bé mimbe. Ndi i bôt ba ngwés moni, ba ba mbii nwo i bisu bi niñ yap, ba nlona bomede mandutu. Kii hihéga, moni mi nla ôbôs maada map ni bôt bap ba lihaa, ba ta bé to mbôô inyule ba nsal iloo héga i yéñ moni.

Lôk Héber 13:5: “Ni niñ bañ niñ i bôt ba ba ngwés moni, ni konok maséé ni i mam ni gwé hanano.”

Kii hala a nkobla: Ilole di héléé i nyiña moni, di kon maséé ni i mam ma yé toi nseñ inyu yés.

Matéô 19:24: “Hala a yé jam li ntomb le kamél i sooma i lituba li ndondok, iloole ngwañ mut u jôp i Ane Nyambe.”

Kii hala a nkobla: Yésu a bi tip naña mañge wanda le a noñ nye. Ndi i mañge nu a bi tjél inyule a bé a tiñi ni lingwañ jé. Jon Yésu a bé ti bés mabéhna hana le, i mut a mbii lingwañ bisu iloole Nyambe nyen a bii i bisu a yé le a nimis niñ boga.

a Ngobol ipe i nkal ha le: “Gwéha i moni i yé nkañ u mintén mi mam mabe nwominsôna.”