Ngéda ndutu keñi i nkwo

To ibale ni mboñ biliya gwobisôna inyu bana maséé ikété libii tole lihaa, mam ma nla puhe bé, ma boñ ki le ni nimis maséé manan. (Ñañal 9:11) Ngéda di gwé mandutu, Yéhôva a nti bés mahôla ni gwéha yé yosôna. Ibale u ngwélél mana matiñ ma Bibel ma noñ, we ni lihaa joñ ni ga pamba to ibale ndutu keñi yon i nkwél bé.

1 BÔDÔL YÉHÔVA ÑEM

JAM BIBEL I NKAL: “Yugyana ki nye nduña nan yosôna inyule a ntôñ ni bé.” (1 Pétrô 5:7) Hiki ngéda, u hôiga bañ le Yéhôva bé nyen u nlama ôm nsohi inyu mandutu moñ. (Yakôbô 1:13) Ibale u nkôôge nye bebee, u ga léba le mut numpe nu a nla hôla kiki nye a ta bé. (Yésaya 41:10) Bibel i nkal le: “Kôba miñem minan i bisu gwé.”​—Tjémbi 62:9.

U ga kôs makénd ibale u nsoñgol ni nigil Bibel hiki kel. Ibale u mboñ hala, u ga léba lelaa Yéhôva “a nlédés yaga bés miñem ikété njiiha yés yosôna.” (2 Korintô 1:3, 4; Rôma 15:4) A mbôn bés le a ga ti bés “nsañ Nyambe u u nloo mahoñol momasôna.”​—Filipi 4:6, 7, 13.

JAM U NLA BOÑ:

• Soohe Yéhôva le a hôla we i bana ñem nwee ni i yoñ makidik malam

• Wan manjel ma nla hôla we i pamba mu ndutu i, mbus tep njel i nene we loñge

2 TÉÉDA MBÔÔ WOÑ NI U LIHAA JOÑ

JAM BIBEL I NKAL: “Ñem mut yihe u nkôs yi, yak ôô mut pék u nyéñ yi.” (Bingéngén 18:15) Noode yi lelaa bôt boñ ba lihaa ba nôgda ni kii u nla boñ inyu hôla bo. Kwel ni bo. Emble ki bo.​—Bingéngén 20:5.

Ndi kii u nla boñ ibale u nimis mut u ngwés? Wo bañ nyu i pémés yom u nôgda ikété yoñ ñem. Bigda le Bibel i nkal le yak “Yésu a ee.” (Yôhanes 11:35; Ñañal 3:4) Ibale u noi, u ke ki i hilo ngandak, hala a nla hôla we. (Ñañal 4:6) Hala a ga ti we ngui i nihbe ndutu.

JAM U NLA BOÑ:

• Bana lem i kwel ni bôt boñ ba lihaa ilole mandutu ma nkwél bé, inyule hala a ga hôla bo i kwel ni we ibabé woñi ngéda ndutu i nkwo

• Yoñ ngéda i kwel ni bôt bape ba ba bi kôhna nlélém ndutu kiki we

3 TOÑ, U NEEBE KI MAHÔLA

JAM BIBEL I NKAL: “Liwanda li ngwés ngéda yosôna; manyañ a ngwééne ikété ndutu.” (Bingéngén 17:17) Mawanda moñ ma nsômbôl hôla we, ndi bebeg ba nyi bé kii ba nla boñ. Jon, u tjél bañ kal bo mam ma nsômbla we. (Bingéngén 12:25) Toñ ki mahôla i pes mbuu i pañ bôt ba nok Bibel. Maéba ma Bibel ba ga ti we, ma ga bane we nseñ ngandak.​—Yakôbô 5:14.

U ga kôhna mahôla ibale u ñadbe bôt ba nhémle Djob, ba bôdlak mimbônga nwé ñem. U ga kôhna ki hogbe keñi ibale u nit bôt bape ba nsômbôl mahôla. Añle bo mimbônga mi Yéhôva ni inyuki u nhémle ñwo. Gwélél libim li ngéda yoñ inyu hôla bôt bape. U bagla bañ ni bôt ba ngwés we, ba tôñôk ki we.​—Bingéngén 18:1; 1 Korintô 15:58.

JAM U NLA BOÑ:

• Pahle banga yoñ liwanda yom i yé we ñem, u neebe ki mahôla mé

• Sima mam ma tôbôtôbô u gwé ngôñ ibabé i sôô nye jam