Gabriel a nyuuga Maria

Élisabet a bééna mu lihaa jé ngond muda yada le Maria, a bé niñ i tison i Galiléa le Nasaret. Maria a bi yega libii bo Yôsep, nu a bé kapinda. Ngéda Élisabet a ba jém li sôñ isamal, añgel Gabriel a pémél Maria. A kal nye le: ‘A Maria, me nyéga. U nlôôha bana masoda ngandak bisu bi Yéhôva.’ Ndi Maria a bi nok bé kii Gabriel a bé kal. Jon a kal Maria le: ‘W’a nembee, u gwal man munlôm, u nlama o nye le Yésu. A ga ba Kiñe. Ane yé y’a nom mba ni mba.’

Maria a kal le: ‘Me ngi yii konji. Lelaa me nla bana man?’ Gabriel a timbhe le: ‘Jam jo ki jo li mbum bé Yéhôva. Mbuu mpubi w’a hô we, ndi w’a gwal man. Nun-ki, yak muda mu lihaa joñ le Élisabet a bi nembee.’ Maria a kônde kal le: ‘Me yé nkol u Yéhôva. I bôña inyu yem kiki u nkal.’

Maria a ke tison dikôa, i yuuga Élisabet. Maria a yéga bañ nye, Élisabet a nôgda le man a nyiñgha nye libum. Nyonok ni mbuu mpubi a kal le: ‘A Maria, Yéhôva a bi sayap we. Me yé kimasoda le nyañ Nwet wem a nlo i mbai yem.’ Maria a kal le: ‘Me mbégés Yéhôva ni ñem wem wonsôna.’ Maria a yén yak Élisabet sôñ aa, ndi to le a ntémb i nyeeni, i Nasarét.

Yôsep a nok bañ le Maria a yé jém, a sômbôl bagla ni nye. Ndi añgel i pémél nye i eem, i kal nye le: ‘U kon bañ woñi i yoñ Maria libii. A mboñ bé béba yo ki yo.’ Jon Yôsep a bi yoñ Maria kiki nwaa, a kena nye i mbai yé.