Lihaa li Yésu li nke i Yérusalem

Di yé ipôla sôñ Matumb ni sôñ Matôp. Ngéda i nkola inyu lihaa li Yôsep ni mawanda map i boñ mbôñgô liké inyu ke i Yérusalem. Ba nke i ngand i Pasa inoñnaga ni Mbén. (Ndiimba Mbén 16:16) Ibôdôl Nasaret ikepam i Yérusalem hala a yé 120 kilôméta. Bôt bobasôna ba pégi i kôôba liké, ba yé maséé. Nano Yésu a gwé 12 nwii, a nyégi i ba i ngand, ni maséé a nhoñol nsima u yé i ba bebee ni témpel.

Inyu Yésu ni lihaa jé, Pasa i ta ndik bé ngand inyu hilo hiada. Hilo hiada i mbus ngand Pasa, ngand i bikoga bi ngi-séñha i mbôdôl, i gwé dilo disaambok. (Markô 14:1) Inyu ngandak bôt, i yé ndigi wengoñle Pasa i yé ke ni bisu. Liké ipam i Nasaret, ngéda ba ntégbaha nyoo, ni matémb map ma nyoñ yom kiki bo sonde iba. Ndi nwii unu, inyule ngim jam i mpémél Yésu, ba nom iloo hala. I mahuune map ma Yérusalem nyen ba ga nôgda le ngim njam i nkile bé.

Mu kiki ba yé ke, Yôsep bo Maria ba nhoñol le Yésu a yé mu ipôla bôt ba lihaa jap tole ipôla mawanda map. Ndi ngéda ba ntelep inyu tégbaha u, ba ntehe bé nye. Jon ba nke i yéñ nye yak bôt ba yé ke liké ni bo, ndi ba ntehe bé nye, ba nléba bé lok yap homa to wada! Jon Yôsep bo Maria ba ntémb i Yérusalem i yéñ nye.

Ba nyéñ nye ngim kel yosôna, ibabé i léba nye. To hilo hi noñ ha, ba nléba bé nye. Sôk i nsôk, hilo hi nyônôs aa, ba nléba lok yap i tuñ yada i témpel. Ba ntehe Yésu a nyii ipôla baniiga ba Lôk Yuda. A emblege bo, a badak mambadga, a hélhak ki bo ni nogna yé.

Maria a mbat Yésu le: “A man, inyuki u mboñ bés hala? Me ni isoñ di yéñék we ni nduña i ñem.”​—Lukas 2:48.

Yésu a yé nhelek le bagwal bé ba nyi bé het a nlama ba. A mbat le: “Baa ni nyi bé le me nlama ba i ndap Tata?”​—Lukas 2:49.

Nano, kiki ba yé ntôñ, Yésu ni bagwal bé, ba ntémb i Nasaret. Yésu a nke ni bisu i nôgôl bo, a holok i pék ni i nyuu. To hala kiki a ngi yii mañge, a nlémél Djob ni bôt ba binam. Jon ibôdôl nye mañge, Yésu a nti ndémbél ilam ha ndigi bé inyule a bééna nduña ni mam ma mbuu, ndi yak inyule a bé ti bagwal bé lipém.