Yôhanes Nsôble a nkôôba Njel

Bebee le 17 nwii mi bi tagbe ibôdôl nu Yésu a bééna 12 nwii, a badak baéga bibase mambadga i témpel. Di yé nano ipôla sôñ Matumb ni sôñ Matôp i nwii 29 N.Y. Ngandak bôt i yé pôdôl mam ma mbéñge mut lihaa li Yésu le Yôhanes, nu a yé téé likalô i loñ yosôna i pes hiôñk i Lom Yordan.

Yôhanes a gwé libak li tôbôtôbô, ikété lihabga jé ni bipôdôl gwé. Mbot yé i yé mboñok ni mahuu ma kamél, a gwé ngôli i kôgôô nuga i bôbôk. Bijek gwé bi yé bitandi ni wei bikai. Nwin wé u yé le kii? U yé le: “Tama bibéba binan inyule Ane ngii i nkôôge bebee.”​—Matéô 3:2.

Nwin u Yôhanes u ntihba bet ba nlo emble nye. Ngandak i nôgda le i nlama hiel miñem nwap, hala wee ba héñha maboñok map ni libak jap, ba tjôô nlômbi wap niñ. Bet ba nlo i nyeni ba nlôl i ‘Yérusalem ni Yudéa ni nkoñ wonsôna u nkéña Yordan.’ (Matéô 3:5) I ngandak bôt i nlo i nyeni i nhiel toi miñem. A nsôble bo ikété malép ma Yordan. Inyuki?

A nsôble bôt inyu unda le ba nhiel miñem nwap ni le ba ntam bibéba gwap bi bi bé kolba Mbén Djob a bi ti bo. (Minson mi baôma 19:4) Ndi bôt bobasôna ba kôli bé kôs sôble i. Ngéda baéga bibase, Farisai ni Sadukai ba nlo i nyeni, Yôhanes a nsébél bo le “bon ba péé.” A nkal le: “Numa matam ma ñunda le ni ntam bibéba binan. Ni hoñol bañ ikété miñem minan le: ‘Abraham a yé isañ wés.’ Inyule me nkal bé le Nyambe a nla pémhene Abraham bon munu ngok ini. Ngo nkuleñ nunu a niñi i tén bie. Jon hiki e i i num bé matam malam, ba nkit yo, ba leñ yo ikété hié.”​—Matéô 3:7-10.

Mu kiki ba mpôdôl ngandak inyu Yôhanes, ni le nwin wé u gwé ngui, a sôblege ngandak bôt, ba om biprisi, ni bon ba Lévi i bat nye le: “U yé njee?”

Yôhanes a ntimbhe le: “Me ta bé me Kristô.”

Ni bo ba mbat nye le: “U yé ni njee? Baa u yé Éliya?”

Yôhanes a ntimbhe le: “Me ta bé me nye.”

Ni bo ba mbat nye le: “Baa u yé ni Mpôdôl nu a nlama lo?” Hala wee Mpôdôl nkeñi nu Môsi a bi kal le a nlama lo.​—Ndiimba Mbén 18:15, 18.

Yôhanes a ntimbhe le: “To!”

Ba kahal hihe nye ni mambadga: “Kal bés inyu boñ le di ti i bôt ba bi om bés ndimbhe. Kii u nkal inyu yoñ wemede?” Yôhanes a nkal le: “Me yé kiñ i mut a nlond i ñoñ le: ‘Sañglana njel i Yéhôva,’ kiki mpôdôl Yésaya a bi pot.”​—Yôhanes 1:19-23.

Ni bo ba mbat nye le: “Inyuki ni u nsôble bôt ibale u ta bé Kristô, to Éliya, to Mpôdôl nu a nlama lo?” Yôhanes a nti bo ndimbhe i kôli: “Me nsôble ikété malép. Ndi wada a téé ipôla nan, nu ni nyi bé, nyen a nlo i mbus yem.”​—Yôhanes 1:25-27.

Ñ, Yôhanes a nyi le a yé kôôba njel inyu boñ le bôt ba miñem minlam ba neebe Mésia nu ba bi legel le a ga loo, i nwet a’ yila Kiñe. Inyu yé nyen Yôhanes a nkal le: “Nu a nlo me i mbus a nloo me ngui, me kôli bé to hohol minkai mi bitamb gwé.” (Matéô 3:11) Jon Yôhanes a nkal ki le: “Nu a nlo me i mbus a bi bôk me i bisu inyule a bi niñ ilole me ngwéé.”​—Yôhanes 1:15.

Jon, nwin u Yôhanes u u yé le: “Tama bibéba binan inyule Ane ngii i nkôôge bebee,” u kôli. (Matéô 3:2) Hala a yé yimbne le nson u mut Yéhôva a bi téé kiki Kiñe, le Yésu Kristô u yé bebee ni bôdôl.