Banigil ba-na ba ga yila balop bôt

I mbus le bôt ba Nasaret ba nyéñ nol nye, Yésu a nke i tison Kapernaum ipañ tuye Galiléa, nu ba nsébél ki le “titimba i Génésarét.” (Lukas 5:1) Hala a nyônôs mbañ mpôdôl Yésaya i i bé kal le bôt ba Galiléa ba ba nyén ipañ tuye ba bé lama tehe mapubi makeñi.​—Yésaya 9:1, 2.

Hala a yé maliga inyule yak hana, i Galiléa, Yésu a nke ni bisu i añal le: “Ane i ngii i nkôôge bebee.” (Matéô 4:17) Yésu a mboma banigil ba-na. Inyu ngim ngéda, ba bé ke ni nye, ndi ngéda ba bi nyodi Yudéa inyu lo Galiléa, ba bi témb i bôlô yap i balop tjobi. (Yôhanes 1:35-42) Nano ngeñ i nkola le ba ba ni Yésu ngéda yosôna, inyu boñ le Yésu a niiga bo nson ba ga kena ni bisu ngéda a mba ha bé.

Mu kiki a nhiôm mu ngwañ lép, Yésu a ntehe Simôn Pétrô, manyañ Andréa lôñni bagwelnson bape ba yé jôwa mbunja yap. Yésu a nkôôge bo bebee, a bet mu i môñgô u Pétrô, a bat nye le a ke ndék haa ni isi. Kiki ba mpam ndék haa ni ngwañ lép, Yésu a nyén, a bôdôl niiga mamut ma nkodba i ngwañ lép maliga inyu Ane.

I mbus, Yésu a nkal Pétrô le: “Kena môñgô i homa a yé ndip, ni leñ ki mbunja nan inyu gwel tjobi.” Pétrô a ntimbhe le: “A Lét, di ntumbba ni nson ngim u yosôna, di ngwel bé to yom; ndi kiki u mpot, m’a leñ yaa mbunja.”​—Lukas 5:4, 5.

Ba nleñ mbunja, ba gwel ngandak tjobi kayéle mbunja i mbôdôl pédi! Bihôô bihôô, ba nsébél balop tjobi ba yé i môñgô u yé bo bebee inyu hôla bo. Ndi mini môñgô nwo ima mi nhoo yon ni tjobi kayéle mi mbôdôl yin. Kiki a ntehe jam li, Pétrô a nkwo isi makôô ma Yésu, a kal le: “Ke me haa, a Nwet, inyule me yé mboñbéba.” Yésu a ntimbhe le: “U kon bañ woñi, ibôdôl nano, bôt bon u mba u ngwel yômi.”​—Lukas 5:8, 10.

Yésu a nkal Pétrô bo Andréa le: “Noña me, m’a yilha bé balop bôt.” (Matéô 4:19) A naña yak balop tjobi bana bo iba le Yakôbô ni Yôhanes, bon bôlôm ba Sébédéô. Ibabé i tiñha, yak bo ba noñ nye. Jon bo ba-na ba ntjôô nyuñga yap tjobi inyu yila banigil ba Yésu ba ngéda yosôna.