Yésu a mboñ bihélha bi mam i Kapernaum

Yésu a naña banigil ba-na i yila balop bôt, Pétrô, Andréa, Yakôbô ni Yôhanes. Nano, i kel Sabat, bobasôna ba nke i ndap bibégés i Kapernaum. Yésu a niiga i ndap bibégés, likeñge a ngwélél inyu niiga li nhélés bôt ba yé ha. A niiga bo kiki mut a gwé kunde, he kiki bayimbén bé.

I kel Sabat i, mut a gwé mbuu mbe a yé i ndap bibégés. A nlond makeñi, a kalak le: “Di gwééna kii ni we, a Yésu, mut Nasaret? Baa u nlo i tjé bés? Me ntibil yaga yi njee u yé, u yé Numpubi nu Nyambe!” Yésu a nkônd mbuu mbe u u bé énél mut nu, a nkal le: “Yip nyo, nyodi ikété yé!”​—Markô 1:24, 25.

I ngéda mbuu mbe u nok hala, u nkwés mut nu isi, u nyiñgis nye ni ngandak ngui, u lodok ni kiñ keñi. Ndi mbuu mbe u mpam ‘ibabé i babaa nye.’ (Lukas 4:35) I bôt ba ntehe jam li ba nhel! Ba mbadba le: “Kii ini? . . .  A nti yak mimbuu mimbe oda, mi nôgôl ki nye.” (Markô 1:27) Ibabé pééna, ngan inyu jam lini i tjama mbok yosôna mu Galiléa.

I mbus le ba nyodi ndap bibégés, Yésu ni banigil bé ba nke i ndap Simôn, nu ba nsébél ki le Pétrô. Nyoo, ba nkoba le nyôgôl Pétrô a nkon, lihep likeñi li gwé nye. Banigil ba nsoohe Yésu le a nhôla nye. Yésu a nkôôge nye bebee, a yoñ woo wé, a téé nye. Kunda yada, a mbôôp, a bôdôl gwélél Yésu ni banigil ba ba yé ni nye, bebek a nlémbél bo bijek.

Kiki kôkôa i nkwo, bôt ba mambok momasôna ba lo i ndap Pétrô ni bakokon bap. I yé ndik wengoñle tison yosôna i nkodba i nwemel i ndap Pétrô. Inyuki? Ba gwé ngôñ ni matibla. I pot maliga, ba ‘bobasôna ba bé ba gwé bakokon ba ndôñ ni ndôñ makon ba lona bo nyeni, ni nye a kéhi moo mé ngii hi wada wap, a mélés bo.’ (Lukas 4:40) Ñ, ibabé béñge kon ba gwé, Yésu a nhôla bo, ndik kiki mbañ i bi kal. (Yésaya 53:4) A nhôla yak ba ba gwé mimbuu mimbe. I ngéda mimbuu mimbe mi mpam, mi nlond, mi kalak le: “U yé Man Nyambe.” (Lukas 4:41) Ndi Yésu a nkônd nwo, a nwas bé nwo le mi kônde pot. Mi nyi le Yésu a yé Kristô, ni le Yésu a gwé bé ngôñ le mi boñ wengoñle mi yé gwélél bañga Djob.