Yésu a mbuubaha hiloga hi gwé mbuu mbe

Kiki Yésu, Pétrô, Yakôbô ni Yôhanes ba nsôs hikôa, ba mboma limut likeñi. Ngim jam i nkile bé. Bayimbén ba nkéña banigil, ba yé noñna ni bo. Bôt ba yé nhelek i tehe Yésu, ba nlo yéga nye. A mbat bo le: “Kii ni péénaga ni bo?”​—Markô 9:16.

Mut wada ikété limut a ñôm maboñ bisu bi Yésu, a ntoñle nye le: “A Lét, me bak me nlona we man wem inyule a gwé mbuu mbe u u mboñ le a mpot bé. To hee homa u ngwel nye, u nleñ nye isi, lihus li pamak nye i nyo, a jek masoñ, a nimis yak ngui yé. Me bak me bat banigil boñ le ba pémés wo, ndi ba nla bé boñ hala.”​—Markô 9:17, 18.

I nene le bayimbén ba yé i yahal banigil inyule ba nla bé mbuubaha hiloga. I mpôôna le ba nyan biliya gwap. Iloole a timbhe isañ man nu a yé nhelek, Yésu a mpôdôs limut, a kal le: “A hiai hibe hini, hi hi gwé bé hémle, m’a ba ni bé letee ni ngéda imbe? M’a hônba ki bé letee ni ngéda imbe?” Bibuk bini bi mbéñge bayimbén ba ba nyahal banigil ba Yésu i ngéda a bak bé ha. Yésu a nhielba, a nkal isañ man le: “Ni lona me nye hana.”​—Matéô 17:17.

Kiki mañge a nlo bebee ni Yésu, mbuu mbe u u yé nye ikété u nleñ nye isi, u nyumus nye. Hiloga hi nkahal béñba isi, mahus ma pamak nye i nyo. Yésu a mbat isañ le: “Imbe ngéda jam lini li bi bôdôl nye?” A timbhe le: “Ibôdôl nye mañge, ngim mangéda, u nleñ nye ikété hié ni ikété malép inyu nol nye. Ibale u nla boñ jam, kônôl bés ngoo, u hôla bés.”​—Markô 9:21, 22.

Isañ mañge a nyi bé kii a boñ, inyule yak banigil ba Yésu ba nla bé hôla nye. Inyu lédés nye Yésu a mbat nye le: “Inyuki u nkal le: ‘Ibale u nla!’ Ngo mam momasôna ma nla bôña inyu mut a nhémle.” Ha nyen isañ mañge a nlond, a kal le: “Me gwé hémle! Hôla me het i mbéda me hémle!”​—Markô 9:23, 24.

Yésu a nyimbe le limut li yé lo ngwéé i nyeni. Ni mam momasôna a ntehe, a nkônd mbuu mbe a kal wo le: “A we, mbuu mbe u u mboñ mañge le a ba mbuk ni ndok, me nti we oda le u pam, u témb ha bañ ki ikété yé!” Mu kiki mbuu mbe u yé pam, u mboñ le mañge a lond, a yôm ki ngandak. I mbus, mañge a mom nwee i pôn-ga le a nwo. Kiki bôt ba ntehe hala, ba nkal le: “A nwo!” (Markô 9:25, 26) Ndi kiki Yésu a ngwel nye woo, hiloga hi ntelep “ibôdôl ha ngeñ i, . . . hi mbôôp.” (Matéô 17:18) Hala a nhélés bôt i tehe jam Yésu a mboñ.

Ndék ngéda bisu, Yésu a bi om banigil bé i téé likalô, a ti bo kunde i pémés mimbuu mimbe. Jon nano, ngéda ba yé botama i ndap ba mbat nye le: “Inyuki di nla bé pémés wo?” Yésu a ntoñle bo le inyule ba gwé bé hémle, a nkônde le: “Ntén unu u mpam ndigi lôñni masoohe.” (Markô 9:28, 29) Hémle i ngui ni masoohe mon ma yé nseñ inyu boñ le Djob a ti bo ngui i pémés mpémba mbuu mbe.

Yésu a nsôk kal le: “Inyu hémle nan titigi. Inyule me nkal bé maliga le: Ibale hémle nan i yé keñi kiki hisiina hi mbôô, ki n’a kal hikôa hini le: ‘Nyodi hana, ke nyoo,’ hi boñ ki hala; to jam jo ki jo l’a loo bé bé ngui.” (Matéô 17:20) Hémle i nla toi bana ngui!

Bikuu ni mandutu bi bi nkéñ mahol més i nson u Yéhôva bi nla nene wee dikôa le ba nla bé lela to yémbél. Ibale di nhôlôs hémle yés, di nla yémbél bikuu ni mandutu.