Ba nket mis ma blé i kel Sabat

Nano, Yésu ni banigil bé ba nyoñ njel i nke i ñombok u Galiléa. Di yé ipôla sôñ Matumb ni sôñ Matôp, nwom mi blé mi nhôlôl. Mu kiki njal i gwé bo, banigil ba Yésu ba nket ndék mis ma blé inyu je. Ndi Farisai i yé béñge yom ba yé boñ inyule i kel i, i yé kel Sabat.

Bigda le hala a yé ndék ngéda le bôt ba Yuda ba bé nsômbôl nol Yésu, inyule ba bé kal le a yé bôk mbén Sabat. Nano Farisai i ñunup inyu maboñok ma banigil ba Yésu, ba nkal le: “Nun-ki! Banigil boñ ba yé i boñ jam li ta bé kunde i kel Sabat.”​—Matéô 12:2.

Farisai i nkal le, mu kii banigil ba Yésu ba nket blé inyu je, i yé wengoñle ba mbumbul. (Manyodi 34:21) Litehge jap inyu bôlô i nséla i kel Sabat i bé yidis kel i, ndi ki le Sabat i bi tééba inyu ba hilo hi maséé, hilo inyu kôhna makénd i pes mbuu. Yésu a nkolba béba yap litehge ni dihéga di ñunda le kekikel Yéhôva Djob a bi bana bé mahoñol le mbén Yé i Sabat i gwélana i nya i.

Hihéga hi bisu Yésu a nti, hi yé hi David ni bôlôm bé. I ngéda njal i bi gwel bo, ba bi telep i lap, ba je ki bikoga bi bi téga i mbom Nyambe. Bikoga ba bi héya bisu bi mbom Yéhôva, ba bi héñha gwo ni bikoga bi mondo; biprisi gwon bi bééna kunde i je gwo. Ndi, i kel i, ba bi kogse bé David ni bôt bé inyule ba bi je gwo.​—Lôk Lévi 24:5-9; 1 Samuel 21:1-6.

Kiki hihéga hi nyônôs hiba, Yésu a nkal le: “Ni bi añ bé ikété Mbén le i dilo di Sabat, biprisi bi mbôk bikila bi Sabat ikété témpel, ndi bi nyégle nginsohi?” Yésu a nsômbôl kal le, i kel Sabat, biprisi bi nol binuga inyu bisesema, bi boñok ki bibôlô bipe i témpel. Ndi a nkal bo le: “Ndi me nkal bé le nu a nloo témpel a yé hana.”​—Matéô 12:5, 6; Ñañga bôt 28:9.

Yésu a ntémb a gwélél Bitilna inyu ôt biniigana mu dihéga a nyoñ. A nkal le: “Ibale ni nok ndoñi i bini bibuk le: ‘Me ngwés konangoo he sesema bé,’ ki bôt ba gwé bé nsohi, ni mpémhene bé bo mbagi nôgôs.” A mélés ni bini bibuk le: “Inyule Man mut a yé Nwet Sabat.” Yésu a yé pôdôl Ane yé i nsañ i hikôô hi nwii i i nlama lo.​—Matéô 12:7, 8; Hôséa 6:6.

Hala a yé ntandaa ngéda le bôt ba binam ba nson njonok isi énél i Satan, nyonok ni njôô ni gwét. Kinje maselna ni Sabat keñi i énél i Yésu, nu a ga ti bés hogbe di ñemel bôdôl behee!