Mambe mam ba nlama boñ i kel Sabat?

I kel Sabat ipe, Yésu a nyuuga ndap bibégés yada, bebek i Galiléa. Nyoo, a nkoba mut wada nu woo wé walôm u nwo nye. (Lukas 6:6) Bayimbén ni Farisai ba ntibil béñge Yésu. Inyuki? Ba nyelel yom ba nhoñol toi ngéda ba mbat le: “Baa i yé kunde i mélés makon i kel Sabat?”​—Matéô 12:10.

Baéga bibase bi Lôk Yuda ba nhoñol le i mélés makon i yé kunde i kel Sabat ndik ngéda mut a yé bebee ni nyemb. Kiki hihéga, ba bé lama bé tibil mut a mbugi, tole i lép nye bandas, inyule nyemb i bé bé nye bebee. I yé maliga le bayimbén ni Farisai ba mbat bé Yésu mambadga mana inyule ndutu i mut nunu i nlôôha tééñga bo. Ba noode léba njom inyu kwés Yésu nkaa.

Ndi Yésu a nyi mahoñol map mabe. A ntehe le nokna yap inyu bibôlô Mbén i bé sôñga i nkiha bé ni jam Bitilba bi nkal. (Manyodi 20:8-10) Ngélé bisu bé i le ba nyahal maboñok mé malam. Nano, Yésu a nyoñ hop, a kal mut woo u nwo le: “Telep, lo hana ñemkété.”​—Markô 3:3.

Yésu a nhielba i pôdôs bayimbén ni Farisai, a nkal bo le: “Njee ikété nan, ibale a gwé ntômba wada, ndi u kwo ikété bee i kel Sabat, a’ ke bé le a pémés wo?” (Matéô 12:11) Ntômba u nhee diye ngandak, jon ba bé bé le ba yék wo ikété bee ipam kel i noñ. Ibale hala, ki ntômba u bé le u wo, ba nimis moni nwap. Jam lipe li yé le, Bitilna bi nkal le mut a téé sép a ntôñ niñ i lém yé.​—Bingéngén 12:10

Yésu a ñôt biniigana bi kôli, a nkal le: “Bôô ni ngélé yañen ni mut binam, ngo a gwé mahee iloo ntômba! Jon i yé kunde i boñ loñge i kel Sabat.” (Matéô 12:12) Inyu hala nyen, Yésu a bé lama bé bôk mbén Sabat ibale a tibil mut woo u bi wo i kel i. Yésu a bi unda le a nkônôl mut ngoo, litehge jé li bé lilam. Baéga bibase ba nla bé pééna hala, jon ba mom ndik nwee.

Béba yap litehge i nsiidaha Yésu ñem, Yésu a mbéñge bo, ndi a kal mut nu le: “Sambal woo woñ.” (Matéô 12:13) Kiki mut a nsambal woo wé, u mbôôp. Kinje maséé a gwé! Ndi lelaa bôt ba yéñ ôm Yésu nsohi ba ntehe jam li?

Iloole ba kon maséé lakii woo u mut u mbôôp, Farisai i mpam, kunda yada i ôô jimp “ni ntôñ u banit Hérôdé ikolba [Yésu], le ba nol nye.” (Markô 3:6) Mu nsoñgi ntôñ bôt u, ibabé pééna yak ngim bôt i Sadukai i yé mu, ki i yé le Sadukai ni Farisai ba nôgla bé. Ndi nano ba nôgla inyu kolba Yésu.