Bipôdôl bi Yésu bi ñunbaha ngandak bôt

I ndap bibégés i Kapernaum, Yésu a ntoñol le nyen a yé toi koga i nlôl i ngii. Bipôdôl gwé bi nkônde mahoñ mu jam a bi bôk a kal i bet a bi jés bret ni tjobi, i ngéda a bé i pes likôl i ngwañ tuye Galiléa.

Yésu a nkena nkwel wé ni bisu, a nkal le: “Basôgôlsôgôl banan ba bi je mana i ñoñ, ndi to hala, ba bi wo.” Maselna ni hala, a ntoñol le: “Men me yé koga i niñ i i nlôl i ngii. Ibale mut a nje i koga ini, a’ niñ i boga ni boga; ndi ni maliga, i koga m’a ti i yé minsôn nwem, mi m’a sem inyu niñ i bôt ba binam.”​—Yôhanes 6:48-51.

Di yé ipôla sôñ Matumb ni sôñ Matôp i nwii 30 N.Y., Yésu a bi kal Nikôdémô le Djob a bi lôôha gwés nkon isi, jon a bi om pombe yé Man kiki Ntohol. Nano, Yésu a nyigye nseñ u yé i je minsôn nwé inyu unda hémle i sesema a ga ti. I jam li jon li nti niñ boga.

Ndi bôt ba neebe bé jam Yésu a nkal. Ba nkal le: “Lelaa i mut nunu a nla ti bés minsôn nwé le di je?” (Yôhanes 6:52) Yésu a gwé bé ngôñ le ba nok bipôdôl gwé buk i ngii buk, kiki bo ba yé boñ. I jam a nkônde kal li ntoñol bibañga gwé.

“Ibale ni nje bé minsôn mi Man mut, ni nyo bé to matjél mé, n’a bana bé niñ. Nu ni nu a nje minsôn nwem, a nyo ki matjél mem, a gwé niñ boga, . . . inyule minsôn nwem mi yé bañga bijek, yak matjél mem ma yé bañga binyonyo. Nu ni nu a nje minsôn nwem, a nyo ki matjél mem, a nyégle ikété adna ni me.”​—Yôhanes 6:53-56.

Hégda lelaa bipôdôl bini bi nhélés Lôk Yuda i i ñemble! Ba nla hoñol le Yésu a yé añle bo le ba je minsôn mi bôt, tole ba bôk mbén Djob i i nsoña i je matjél. (Bibôdle 9:4; Lôk Lévi 17:10, 11) Ndi, Yésu a ta bé kal le ba je toi minsôn nwé ni le ba nyo matjél mé kiki ba yé hoñol. A yé unda le ba bobasôna ba gwé ngôñ i niñ i boga ni boga, ba nlama hémle sesema a ga ti, i ngéda a ga ti niñ yé, ni kôp matjél mé. Ndi yak ngandak yé banigil ipe i nok bé biniigana bi. Bahogi ba nhuñbe, ba kalak le: “Lipôdôl lini li mbablana. Njee a nla nihbe i emble jo?”​—Yôhanes 6:60.

Mu kiki Yésu a nyi le ngim banigil yé i yé huñbe, a mbat le: “Baa hala a yéne bé ngok baagene? Y’a ba ni lelaa ibale ni ntehe Man mut a mbet i homa a bé i ngéda bisu? . . . Bibañga me nkal bé bi nlôl ni njel mbuu mpubi, bi tinak ki niñ. Ndi bahogi ikété nan ba nhémle bé.” Inyu hala, ngandak banigil i nwaa noñ nye.​—Yôhanes 6:61-64.

Jon Yésu a mbat baôma bé 12 le: “Baa yak bé ni gwé ngôñ i ke?” Pétrô a ntimbhe le: “A Nwet, d’a ke yak njee? Wen u gwé bibañga bi niñ boga. Di bi hémle, di yi ki le u yé Numpubi nu Nyambe.” (Yôhanes 6:67-69) Kinje bipôdôl bi ndéñbe, to hala kiki Pétrô ni bana baôma bape ba ntibil bé nok biniigana bi Yésu!

Ndimbhe i Pétrô i nlémél nye, jon Yésu a nkal bo le: “Bé jôm ni iba, men me bi pohol bé, hala nga? Ndi wada ikété nan a yé mut minsohi.” (Yôhanes 6:70) Yésu a yé pôdôl Yuda Iskariôt. Bebek Yésu a nôgda le Yuda a mbôdôl bana bibéba bi mahoñol.

Yésu a nkon maséé i yi le Pétrô ni bana baôma bape ba nwaa bé noñ nye, ni le ba nyoñ ngaba mu nson nye Yésu a mboñ.