Yésu​—“Koga i niñ”

I pes likôl i tuye Galiléa, Yésu a bi jés dikôô di bôt ni hélha njel. I mbus, a bi ke ngwéé i ngéda ba bé sômbôl téé nye kiñe. I kôkôa i, a bi kil i ngii mangudga ma tuye, a tohol ki Pétrô nu a bé ke i ngii malép, ndi a bôdôl yin inyu hémle yé titigi. Yésu a bi mômôs ki mbebi, bebek jon banigil bé ba bi yin bé.

Nano, Yésu a ntémb i pes hiônk i tuye, i tison Kapernaum. I bôt a bi jés ni hélha njel ba ntehe nye, ba bat nye le: “A Rabi, u nlo hana ngéda mbe?” Yésu a nkônd bo, a kalak bo le ba ntoñ nye inyu boñ le a jés ki bo. A nkal bo le ba ‘sal bañ inyu bijek bi bi mbol, ndi ba sal inyu bijek bi bi nom inyu ti niñ boga.’ Ha nyen ba nkal nye le: “Kii di nlama boñ inyu lémél Nyambe?”​—Yôhanes 6:25-28.

Bôt bana ba nla hoñol le Yésu a mpôdôl mam ma mbéñge Mbén, ndi Yésu a mpôdôl nson u nlôôha bana mahee: “Inyu boñ nson u Nyambe, ni nlama unda le ni nhémle nu a bi ep.” Ndi, bôt ba ñunda bé le ba nhémle Yésu, to hala kiki a mboñ ngandak mam. Ba gwé ngôñ i tehe nye a mboñ hélha jam inyu hémle nye. Ba mbat nye le: “Umbe nson u yé i boñ? Basôgôlsôgôl bés ba bi je mana i ñoñ, ndik kiki i yé ntilga le: ‘A bi ti bo bret i nlôl i ngii le ba je.’”​—Yôhanes 6:29-31; Tjémbi 78:24.

Inyu timbhe bo, Yésu a nkal bo njee a yé toi Lingen li mam ma hélha a mboñ. Yésu a kal bo le: “Me nkal yaga bé maliga le: Môsi a bi ti bé bé koga i nlôl i ngii, ndi Tata nyen a nti bé bañga koga i i nlôl i ngii. Inyule koga i Nyambe i nlôl i ngii, i tinak nkoñ isi niñ boga.” Mu kiki ba nok bé mahoñol ma Yésu, ba nsoohe nye le: “A Nwet, ti bés koga ini ngéda yosôna.” (Yôhanes 6:32-34) Imbe “koga” Yésu a mpôdôl?

A ntoñle bo le: “Men me yé koga i niñ. Nu ni nu a nlo i meeni, njal y’a gwel ha bé nye kekikel; yak nu ni nu a ñunda le a nhémle me, nyus malép y’a gwel ha bé ki nye kekikel. Ndi me nkal bé le: “Yak tehe ni ntehe me, ndi to hala, ni nhémle bé. . . . Me bi nyodi i ngii me sôs, ha inyu boñ sômbôl yem memede bé, ndi sômbôl i nu a bi om me. Sômbôl i nu a bi om me i yé le: Me nlama bé nimis mut to wada ikété bôt bobasôna a bi ti me, ndi me nlama tugul bo i hilo hi nsôk. Inyule sômbôl i Tata i yé le: Hiki mut a neebe Man, a unda ki le a nhémle nye, a nlama bana niñ boga.”​—Yôhanes 6:35-40

Bibañga bi Yésu bi mboñ le bôt ba mbôdôl huñbe ngandak. Ba kalak le, lelaa a nla kal le: “Men me yé koga i nlôl i ngii.” (Yôhanes 6:41) Inyu yap, a yé ndik man bôt ba binam, ba ba nyééne i tison Nasaret, i Galiléa. Bôt ba mbat le: “Baa Yésu man Yôsep bé nunu? Baa di nek isañ bo nyañ?”​—Yôhanes 6:42.

Yésu a ntimbhe, a kal le: “Ni waa huñbe bé ni bé. Mut to wada a nla bé lo i meeni ibale Tata nu a bi om me a ñôt bé nye, ndi m’a tugul nye i hilo hi nsôk. I yé ntilga ikété bapôdôl le: ‘Yéhôva a’ niiga bobasôna.’ Hiki mut nu a bi emble Tata, ndi a nigil, a’ noñ me. Mut to wada a yé ngi tehe Tata, ndik nu a bi lôl yak Nyambe nyen a bi tehe Tata. Me nkal yaga bé maliga le: Nu ni nu a nhémle a gwé niñ boga.”​—Yôhanes 6:43-47; Yésaya 54:13.

Mu nkwel a bi bana bo Nikôdémô, Yésu a bi unda le mut a nla bé bana niñ boga ibale a nhémle bé Man mut. A bi kal le: “Hiki mut a ñunda le a nhémle [mpom wé Man] a tjiba bañ, ndi a bana niñ boga.” (Yôhanes 3:15, 16) Ndi nano, a yé pôdôs ngandak bôt, a ntoñle bo ngaba a gwé mu niñ boga ba nke kôs, niñ i i yé le mana, to koga ba nkoba i Galiléa i nla bé ti. Ndi lelaa mut a nla kôhna niñ boga? Yésu a ntiimba bini bibuk le: “Men me yé koga i niñ.”​—Yôhanes 6:48.

Unu nkwel u u mbéñge koga i nlôl i ngii u ga ke ni bisu, yak ngéda Yésu a mba a niiga i ndap bibégés i Kapernaum.