Yén péé, a kindak maliga!

Yésu a bi toñol le ndik “bémba titigi” yon i ga ba i Ane ngii. (Lukas 12:32) Ndi, i kôhna bibom bi mbuma ñañ bini i ta bé jam le mut a nlama yan. Yésu a nke ni bisu i yigye nseñ u yé i bana libak lilam inyu ba wada mu nsoñgi u bôt ba ga kôdôl Ane ngii.

Inyu hala nyen Yésu a nti banigil bé makénd i ba nkôôbaga ngéda a tiimba lo. A nkal bo le: “Ni haba mambot ma bôlô, ni ba nkôôbaga, yak bilambe binan bi loñok, ni nlama ki ba kiki bôt ba ba mbem matémb ma nwet wap ngéda a nlôl i ngand libii, inyu boñ le ngéda a nlo, a koode, ba yible nye i nlélém ngéda. Maséé ni minkol nwet a nkoba le mi yé péé ngéda a nlo!”​—Lukas 12:35-37.

Hala a yé jam li ntomb inyu banigil i nok jam Yésu a yé pôdôl. Minkol Yésu a yé pôdôl mi yé nkôôbaga, mi mbem malo ma nwet wap. Yésu a ntoñol le: “Ibale [nwet a] nlo i faa i nyônôs iba [ibôdôl ngeñ bôô juu ikepam kosi juu], tole faa i nyônôs aa [ibôdôl kosi juu ikepam ngeñ aa i kegla], ndi a koba nwo mi yé péé, maséé ni nwo!”​—Lukas 12:38.

Yésu a nsômbôl ndik bé kal banigil bé le ba ba minkol mi mi nsal ni ñem nwap wonsôna. Hala a ntibil nene ngéda Yésu, Man mut a mpôdôl nyemede munu hihéga hini. A nkal banigil bé le: “Jon yak bé, yéna péé ibabé waa inyule Man mut a nlo i ngeñ ni nhégda bé le a nlôl.” (Lukas 12:40) Jon, ngim ngéda Yésu a ga lo. A gwé ngôñ le banigil bé, téntén ba ba yé i “bémba titigi,” ba ba nkôôbaga.

Pétrô a gwé ngôñ i tibil nok kii Yésu a gwé mahoñol, jon a mbat nye le: “A Nwet, baa u nyoñ hihéga hini inyu bés botama tole inyu bôt bobasôna?” Iloole Yésu a ti nye ndimbhe kunda yada, Yésu a ngwélél hihéga hipe hi hi gwé maada ni hi a ntip gwélél. A nkal le: “Njee a yé toi kindak nu maliga ni nu pék, nu nwet wé a’ téé i ngii ntôñ u bagwélél bé le a waa bañ ti bo ngaba yap bijek i loñge ngéda? Maséé ni nkol u, ibale nwet wé a nkoba nye a mboñ hala! Maliga mon me nkal bé le: A’ téé nye i ngii nkus wé wonsôna.”​—Lukas 12:41-44.

Mu hihéga hi bisu, ibabé pééna, “nwet” a yé Yésu, Man mut. Jon “kindak nu maliga” i yé ngim bôt mu “bémba titigi” i i ga kôdôl Ane ngii. (Lukas 12:32) Yésu a yé kal le ngim bôt ikété “bémba titigi” i ga ti “ntôñ bagwélél bé” “ngaba yap bijek i loñge ngéda.” Jon Pétrô ni banigil bape Yésu a yé niiga, a jéhak i pes mbuu, ba nla nok le ngéda i ga kola le Man mut a tiimba lo. Ha ngéda i nyen bitelbene bi ga yôña inyu ti banigil ba Yésu, “ntôñ bagwélél” ba Nwet bijek bi mbuu.

Yésu a ngwélél njel ipe inyu unda banigil bé inyuki ba nlama yén péé, ba yoñok ki yihe ni libak jap. Inyule mut a nla tomb, a pam yak i kolba lôk isañ yé, jon Yésu a nkal le: “Ndi ibale nkol unu u nkahal hoñol mu ñem wé le: ‘Nwet wem a yé i tiñha,’ ndi u bôdôl bép minkol mi bôlôm ni mi bôda, u jek, u nyok, u hiôôk, nwet nkol unu a’ lo i kel nkol u ta bé i bem nye, ni ngeñ u nyi bé, a’ kogse nye ni kogse ikeñi, a ti nye ngaba lôñni bôt ba ngitelepsép.”​—Lukas 12:45, 46.

Yésu a nkal le a bi lo “inyu kwiye hié hana isi.” Hala a yé maliga inyule biniigana gwé bi bé lona ngandak pééna, kiki hié, bi bé tjé biniigana ni bilem bôt ba bééna ha ngéda i. Biniigana gwé bi bé bagal yak bet ba bé lama ba mawanda, “isañ a’ kolba lok yé, yak lok i kolba isañ; nyañ a’ kolba ngond yé, yak ngond i kolba nyañ; nyôgôl a’ kolba nkiya, yak nkiya a kolba nyôgôl.”​—Lukas 12:49, 53.

Bibañga bini bi yé tôbôtôbô inyu banigil bé. Nano, Yésu a nyéñ pôdôl limut. Libim ikété yap li ntjél yaga neebe mam ma ñunda le a yé Mésia. Jon a nkal bo le: “I ngéda ni ntehe ond i yé pémél i hiôñk, ni mpala kal le: ‘Mbuk mbebi a yé i njel,’ hala ki nyen i mbôña. Yak ngéda ni ntehe mbebi i nwelmbok i nhôñ, ni nkal le: ‘Lék y’a ba ngandak,’ hala ki nyen i mbôña. A bôt ba bihéñba, ni nyi kobol ngéda inoñnaga ni kiki hisi ni ngii bi nene, ndi inyuki ni nyi bé kobol i ngéda tôbôtôbô ini?” (Lukas 12:54-56) I pot maliga, i bôt bana ba ta toi bé nkôôbaga.