Baa u yik hala?

I ngéda kôba, umbe nson bokindak ba bé gwel?

Kindak i bé béñge ndap tole nkus u nwet wé.

Ngéda Yôsep, man sôgôsôgôl Yakôb, a bé nkol i Égiptô, a bi yila kindak i ndap nwet wé. Maliga ma yé le nwet wé “a yugye (ti nye kunde i ngii) gwom gwobisôna a ba a gwé i woo Yôsep.” (Bibôdle 39:2-6) I mbus ngéda, ngeñ Yôsep a bi yila ngomin ikeñi i Égiptô, yak nye a téé ngim kindak i ngii ndap yé.​—Bibôdle 44:4.

I ngéda Yésu a bé hana ’isi, bet minkoñ ba bé yééne bitison, haa ni nwom nwap. Jon ba bé ba téé kindak inyu éga bibôlô bagwelnson ba bé sal i nwom hiki kel.

Njee a bé le a ba kindak? Columella, man Rôma wada nu a bé ntila miñañ i hiai hi bisu, a kal le i nkol ba bé téé kindak u bé u “ba bi yimbe le u nsal loñge.” A bé lama ba mut nu a nla “éga bôt ibabé i nwas le ba boñ to kii ba ngwés, to tét bôt.” A nkônde le: “U héya i mam di ntip sima, kindak i bé lama bé hoñol le i nyi mam momasôna, i bé lama ki ba bebee i nigil mam mape.”

Bibel i ngwélél hihéga hi kindak inyu pôdôl ngim minson ikété likoda. Kiki hihéga, ñôma Pétrô a bi ti bikristen makénd i gwélél ngap Djob a bi ti bo inyu ‘gwélél bape kingéda likébla li karis [ba] bi kôs, ba bak kiki bañga bokindak i . . . karis Nyambe.’​—1 Pétrô 4:10.

Yésu nyemede a bi gwélél hihéga hi kindak i kaat Lukas 16:1-8. Ni ki le, mu mbañ yé i i bé pôdôl ngéda a ga ba ha kiki Kiñe, Yésu a bi yis banigil bé le a nlama téé ngim “nkol u maliga ni u pék,” tole “kindak nu maliga.” Nson u bisu u kindak, u bé lama ba le i ti banigil ba Kristô bijek bi mbuu dilo di nsôk. (Matéô 24:45-47; Lukas 12:42) Di yé maséé ngandak ngéda di nkôs bijek bi mbuu kiki bikaat bi bi nlédés hémle yés, to hee homa di yé i nkoñ ’isi.