Farisai i mbat mut a bé ndim mambadga

Farisai i ntop bé hémle mu kiki Yésu a mboñ le mut a tehna, jon ba nsébél bagwal bé. Bagwal ba nyi le hala a nla boñ le ‘ba mpémés bo i ntôñ.’ (Yôhanes 9:22) Ibale ba nha bo i kat, ndap lihaa i nla bana ndutu i pes i bigwel moo.

Farisai i mbat bo mambadga ima: “Baa i man nan ni nkal le a bi gwéé ndim, nye nunu? Lelaa ni a ntehna nano?” Bagwal ba ntimbhe le: “Di nyi le man wés nunu, di nyi ki le a bi gwéé ndim. Ndi kii i ntagbe le nano a ntehna, di nyi bé; too njee a nyibil nye mis, di nyi bé.” To ibale man wap a nkal bo kii i ntagbe, bagwal ba nyoñ yihe ni bipôdôl gwap, ba nkal le: “Jon bada nye. A yé nnañak mut. Nyemede a kal bé.”​—Yôhanes 9:19-21.

Farisai i ntiimba sébél mut ndim, i nsômbôl kônha nye woñi, i kalak le i gwé manjom ma ma ñôm Yésu nsohi, i nkal le: “Ti Nyambe lipém; di nyi le i mut nu a yé mboñbéba.” I mut a bé ndim, a yi bañ mahoñol map a kal le: “Too a yé mboñbéba, me nyi bé. Jam me nyi li yé le me bé ndim, ndi nano me nla tehna.”​—Yôhanes 9:24, 25.

Farisai i ntelbene bé ha, i nke ni bisu i kal le: “Kii a mboñ we? Lelaa a nyibil we mis?” Ni makénd mut a ntimbhe le: “Me bôdôl bañ kal bé jam lini len, ndi ni ñemble bé. Inyuki ni nsômbôl ki nok jo? Baa yak bé ni ngwés yila banigil bé?” Ni hiun, Farisai i nkal le: “Wen u yé nnigil nu mut nu, ndi bés di yé banigil ba Môsi; Di nyi le Nyambe a bi pôdôs Môsi, ndi inyu mut nunu, di nyi bé hee a nlôl.”​—Yôhanes 9:26-29.

Nhelek, mut njagi a nkal le: “Hala a yé yaga hélha jam le ni nyi bé hee a nlôl, ndi ki le nyen a nyibil me mis.” Mut a ñôt bo mahoñol inyu hôla bo i yi njee Djob a ñemble a neebege ki, jon a nkal le: “Di nyi le Nyambe a ñemble bé baboñbéba, ndi ibale mut a nkon Nyambe woñi, a boñok ki sômbôl yé, a ñemble i mut nu. Ibôdôl kôba, mut a ma nok bé le ba nyibil mis ma mut nu a bi gwéé ndim.” A nsôk kal le: “Ibale i mut nunu a bak bé mut Nyambe, ki a bak bé le a boñ jam jo ki jo.”​—Yôhanes 9:30-33.

Mu kiki ba nla bé pééna bibañga gwé, Farisai i mbôdôl sol nye, i kalak le: “U bi gwééne wensôna ikété béba, ndi u nyéñ niiga bés?” Ba mpémés nye i mbégdé.​—Yôhanes 9:34.

Kiki Yésu a nok i jam li ntagbe, a nyéñ mut nu a bat nye le: “Baa u nhémle Man mut?” Mut a ntimbhe le: “A isañ mbai, njee nu inyu boñ le me hémle nye?” Ibabé pééna, Yésu a nkal nye le: “U mal tehe nye; ni maliga, nyen a yé i pôdôs we.”​—Yôhanes 9:35-37.

Mut a ntimbhe le: “A Nwet, me nhémle yaga nye.” Ni suhulnyuu a ôôp bisu bi Yésu, nu a nsoolene nye jam lini: “Inyu bikééhene bini nyen me bi lo munu nkoñ isi: Le i bôt ba ntehna bé, ba tehna; ndi i bôt ba ntehna ba kwo ndim.”​—Yôhanes 9:38, 39.

Farisai i nyi le i ta bé ndim. Ndi kii ba nla kal inyu tel yap i baéga i pes i mbuu? Inyu sôñ bomede, ba nkal le: “Bés di ta bé ndim, hala bé?” Yésu a nkal le: “Ibale ni bak ndim, ki ni gwé bé béba. Ndi nano kiki ni nkal le: ‘Di ntehna.’ Jon béba nan i yii i ngii nan.” (Yôhanes 9:40, 41) Ibale ba bé bé baéga bibase i Israel, ki hala a nôga mu kiki ba tjél neebe le Yésu a yé Mésia. Ndi kiki ba nyi Mbén, ba yé boñ béba keñi.