PES IBA
Bibel—Kaat i nlôl ni Djob
1, 2. Inyuki Bibel i yé toi likébla likeñi li nlôl ni Djob?
LELAA u nôgda ngéda liwanda joñ li nlona we likébla u bemek bé. U yé maséé le liwanda joñ li nhoñol we, li ntéédana ki we jam. Jon u nti nye mayéga inyu jam a mbôñôl we.
2 Bibel i yé likébla li nlôl ni Djob. I niiga bés mam di nla bé léba homa numpe. Kii héga, i nkal bés le Djob a bi heg ngii ni isi. A heg ki munlôm nu bisu ni muda nu bisu. Bibel i nti bés matiñ ma nla hôla bés i ngéda mandutu. Ikété Bibel di nigil lelaa Djob a ga yônôs bitééne gwé, ni boñ le hisi hi yila loñge liyééne. Bibel i yé toi likébla likeñi!
3. Kii u ga léba ngéda u ga kena yigil yoñ i Bibel ni bisu?
3 Ngéda u ga kena yigil yoñ i Bibel ni bisu, u ga léba le Djob a ngwés le u ba nye liwanda. Kii u mba u nyi nye, hala nyen a’ ba a nyila we liwanda likeñi.
4. Kii nkwés we nkaa le kaat ipe i mpôôna bé Bibel?
4 Bôt ba bi kobol Bibel ikété bebee le 2 600 dilémb. Ba ma pémés ki didun di didun di Bibel. Bebee le hiki mut i nkoñ isi a nla añ Bibel ikété hilémb hié. Hiki sonde, hidun hi bôt tole iloo ha hi nkôs Bibel. Ñ, kaat ipe i ta bé kiki Bibel.
5. Kii ñunda we le Bibel “i nlôl ni Nyambe”?
5 Bibel “i nlôl ni Nyambe.” (Añ 2 Timôtéô 3:16.) Bahogi ba nkal le bôt ba binam bon ba bi tila Bibel. Jon, inyu yap Bibel i nlôl bé ni Djob. Ndi Bibel yomede i ntimbhe mu jam li. I nkal le mbuu mpubi won u bi “gwel mahoñol ma bôt le ba pot jam li nlôl yak Nyambe.” (2 Pétrô 1:21) Inyu toñol jam lini, di yoñ hihéga hi nwet bôlô, nu a nkal mut wé matila le a tila kaat inyu yé. Nwet bôlô a nti mahoñol, mut matila a tilga. Ibale we nyen u nkôhna i kaat i, baa w’a kal le njee a ñômle we yo? Mut matila, tole nwet bôlô? Nlélém jam ni Bibel. I nlôl ni Djob, ndi a bi gwélél bôt ba binam kiki batila. Djob a bi éga bo i tila mahoñol mé. Bibel i yé toi “bañga i Nyambe.”—1 Tésalônika 2:13; béñge Ndoñi 2, i mamélél ma kaat.
Ngobol Bibel ni hop Pulasi le Les Saintes Écritures. Traduction du monde nouveau (Bitilna Bipubi—Ngobol i Mbok Yondo).
BIBEL I MPOT MALIGA
6, 7. Inyuki di nkal le bipes bi bikaat bi Bibel bi nkolbaha bé bipe?
6 Batila Bibel ba bi yoñ iloo 1 600 ñwii inyu tila yo. Ba bi niñil bé i nlélém ngéda. Ndék ikété yap i bi boñ bisuklu bikeñi, ndi bobasôna bé. Kii héga, wada wap a bé dokta keñi. Ndi bape ba bé basal nwom, balop tjobi, batééda mintômba, bapôdôl, bakéés, ni bikiñe. To hala kii batila ba bé ngandak, maselna ma ta bé ipôla bikaat ba bi tila. Jon, pes i Bibel yada i nkolbaha bé ipe.a
7 Bipes bi Bibel bi bisu bi ntoñol lelaa mandutu ma nkoñ isi ma bi bôdôl. Bipes bi nsôk bi nkal bés lelaa Djob a ga mélés mandutu ma, a yilha ki hisi paradis. Bibel i ntoñol ñañ u bôt ba binam. Ñañ u, u nom dikôô di ñwii. Bibel i ñunda ki bés le bitééne bi Djob bi nla bé set kekikel.
8. Ti dihéga di ñunda le Bibel i yé maliga ngéda i mpot mam ma njôôñ yi.
8 Bibel i bi tilba bé inyu niiga bés njôôñ yi i bôt ba binam. I ta bé ki to kaat suklu. Ndi, ngéda i mpot mam ma mbéñge njôôñ yi, Bibel i mpot ndik maliga. Hala a nkônde unda bés le i yé kaat i nlôl ni Djob. Kii héga, kaat Lôk Lévi i gwé biniigana bi ñunda manjel Lôk Israél i bé lama noñ inyu kéñ makon njel le ma tjama bañ ikété loñ yap. Lôk Israél i bi kôs biniigana bini ntandaa ngéda ilole mut binam a nyi le bon ba minsoñ, mi mi ntéa bé i mis, nwon mi nti makon. Hihéga hipe hi yé le, Bibel i nkal maliga ngéda i niiga le hisi hi kéhi ngii to yom. (Hiôb 26:7) Ngéda ngandak bayi mam i bé hoñol le hisi hi yé mbamba, Bibel yo i bé niiga le hisi hi yé ngiiña.—Yésaya 40:22.
9. Libak le batila Bibel ba bé pot ndik maliga li niiga kii bés?
9 Ngéda Bibel i ñañle bés ñañ u bôt ba binam, i mpot ndik maliga. Ndi ngandak bikaat ipe i i ñañle bés miñañ mi kôba, i mpot bé maliga momasôna inyule batila gwo ba bé sôô ngim mam. Kii héga, ngéda loñ yap i bé i nimis gwét, ba bé tila bé ñañ u. Ndi batila Bibel ba bé tila maliga yak ngéda Israél a bé a nimis gwét. Ba bi tila yak mahôha ba bé boñ. Ikété kaat Ñanga bôt, Môsé a bi tila hihôha hikeñi a bi boñ, ni lelaa Djob a bi kodol nye. (Ñanga bôt 20:2-12) Libak li maliga li batila Bibel li ñunda le Bibel i nlôl ni Djob. Hala a nkobla le di nla bôdôl Bibel ñem.
KAAT I MAÉBA MALAM
10. Inyuki maéba ma Bibel ma nhôla bés i len ini?
10 Bibel “i nlôl ni Nyambe, i mbahal [tole i yé nseñ], inyule i nti maéba, i yoiyak [tole i kodlak], i béhge.” (2 Timôtéô 3:16) Ñ, Bibel i nti bés maéba ma nhôla bés i len ini. Yéhôva a nyi lelaa di yé nhegeg, jon a nok mahoñol més ni lelaa di nôgda mu miñem nwés. A nyi bés iloo bésbomede, a ngwés ki le di ba maséé. A nyi yom i yé loñge ni béba inyu yés.
11, 12. (a) Mambe maéba malam ma Yésu ma yé i kaat Matéô pes 5 ikepam pes 7? (b) Mambe matiñ mape Bibel i niiga bés?
11 I kaat Matéô pes 5 ikepam pes 7, di ñañ biloñge bi maéba Yésu a bi ti. A niiga bés lelaa di nla ba maséé, ni niñ ikété nsañ ni bôt bape; lelaa di nla soohe, ni umbe nseñ jam li moni li gwé i niñ yés. To hala kiki Yésu a bi ti maéba ma 2 000 ñwii i len ini, ma ngi hôlga bés wengoñle len nyen a nti mo.
12 Ikété Bibel, Yéhôva a nti ki bés matiñ inyu ba maséé ikété lihaa, i ba bôt ba bôlô ni i niñ ikété nsañ ni mut wés libôk. To umbe ntén mut di yé, to umbe ntén jam u ntééñga bés, to hee di niñil, matiñ ma Bibel ma nla hôla bés.—Añ Yésaya 48:17; béñge Ndoñi 3, i mamélél ma kaat.
U NLA HÉMLE MBAÑ I BIBEL
Ntila Bibel le Yésaya a bi bôk pot le tison i Babilôn i ga kwo
13. Kii Yésaya a bi bôk pot le i ga pémél tison i Babilôn?
13 Ngandak mbañ i Bibel i bi yon. Kii héga, Yésaya a bi ti mbañ le tison i Babilôn i ga tjiba. (Yésaya 13:19) A bi toñol ki i disii di mam lelaa ini tison i ga nimis gwét. Tison i Babilôn i bééna lipénd likeñi, ni lép u u bé kéña yo. Ndi, Yésaya a bi bôk pot le malép ma ga sa ni le makôga ma lipénd ma mba ma néhi. Ntôñ gwét u ga yoñ tison ibabé jo gwét. Yésaya a bi ti ki jôl li mut nu a bé lama yémbél Babilôn: Kirus.—Añ Yésaya 44:27–45:2; béñge Ndoñi 4, i mamélél ma kaat.
14, 15. Lelaa bibañga Yésaya a bi bôk pot inyu Babilôn bi bi yon?
14 Mbus 200 ñwii le Yésaya a pot bibañga bi, ntôñ gwét wada u telep, u lo i jôs Babilôn gwét. Baa njee a bé énél ntôñ u gwét unu? Kiki Yésaya a bi bôk pot, kiñe i Persia yada ba bé sébél le Kirus. Nano, i bé sômbla ndigi le bôt ba tehe lelaa mbañ i nyon.
15 I u ba bi lo jôs bo gwét, bôt ba Babilôn ba bééna ngand. Ba bé kon bé woñi inyule lipénd li bé sôñ tison yap. Malép ma bé kéña lipénd kayéle mut to wada a bé bé le a tiige bebee ni tison. Kirus ni bisônda gwé ba bi tém soso mbôga inyu ti malép njel ipe. Hala a bi boñ le malép ma sa i nya yé le bisônda bi Persia bi tagbe lép ni makôô. Ndi, lelaa ba bi boñ inyu yap lipénd li Babilôn? Kiki Yésaya a bi bôk a pot, bôt ba Babilôn ba bi hôya makôga ma lipénd ma néhi. Jon, Babilôn a bi kwo ibabé le Kirus ni bisônda gwé ba jo gwét.
16. (a) Yésaya a bi bôk pot le kii i ga pémél Babilôn? (b) Kii nyis bés le mbañ Yésaya i bi yon?
16 Yésaya a bi bôk pot le mut to wada a ga niñil ha bé i tison i Babilôn. A tila le: “Mut a’ oñ ha bé mu nkoñ u kekikel, to yén mu i tjai ni tjai.” (Yésaya 13:20) Baa hala a bi bôña toi? Homa nlômbi tison i Babilôn i bééne, a yé i len ini 80 ma kilôméta, i nwel mbok i tison i Bagdad, i loñ ba nsébél le Irak. Homa nu a yé ntjég. I len ini, mut to wada a nyééne ha bé mu. Yéhôva a bi sas tison i Babilôn “ni séhél le tjiba.”—Yésaya 14:22, 23.b
Babilôn a yé ntjég i len ini
17. Inyuki di nla hémle mimbônga mi Yéhôva nwominsôna?
17 I yé mbale le ngandak mbañ i Bibel i bi yon. Jon di nla hémle yom Bibel i mpôdôl inyu dilo di nlo. Di nla ba nkwoog nkaa le mimbônga mi Yéhôva inyu hisi mi ga yon. (Añ Ñanga bôt 23:19.) Ñ, di gwé “botñem i niñ boga, i Nyambe nu a mpot bé bitembee.”—Titô 1:2.c
BIBEL I NLA HÉÑHA NIÑ YOÑ
18. Ñoma Paul nye ‘Bañga i Nyambe’ i yé lelaa?
18 Di nigil le kaat yo ki yo i mpam bé Bibel. Pes i Bibel yada i nkolbaha bé ipe. Bibel i mpot ndik maliga ngéda i nsima mam ma njôôñ yi ni ngéda i ñañle bés miñañ mi kôba. I nti bés maéba malam, i ban-ga ki mbañ i bi mal yon. Ndi nseñ u Bibel u ntelep bé ha. Ñoma Paul a bi tila le: Bañga i “Nyambe i yé yômi ni ngui.” Baa hala a nkobla le kii?—Añ Lôk Héber 4:12.
19, 20. (a) Lelaa Bibel i nhôla we i yi njee u yé? (b) Lelaa u nla ti Yéhôva mayéga inyu likébla lini le Bibel?
19 Bibel i nla héñha niñ yoñ. I nla hôla we i yi toi njee u yé. I nla ki hôla we i nok mahoñol moñ ni yom u nôgda mu ñem woñ. Kii héga, di nla hoñol le di ngwés Djob. Ndi ibale di mboñ bé yom Bibel i niiga, wee di ngwés bé nye.
20 Bibel i yé toi kaat i nlôl ni Djob. Jon, a nsômbôl le u añ, u nigil, u gwés ki yo. Kônde kena yigil yoñ i Bibel ni bisu inyu unda Yéhôva le u nti nye mayéga inyu likébla jé. Ha nyen, u ga tibil nok bitééne bi Djob inyu bôt ba binam. Pes i noñ i ga toñle bés kii yé bitééne gwé.
a Ngim bôt i nkal le bipes bi bikaat bi Bibel bi nkolbaha bipe, ndi hala a yé bitembee. Béñge pes 7 i kaat ni hop Pulasi le La Bible—Parole de Dieu ou des hommes? ntilbaga ni Mbôgi Yéhôva.
b Ibale u nyéñ kônde yi mbañ i Bibel, u nla añ mapep 27-29 ma man kaat ba nsébél ni hop Pulasi le Un livre pour tous. Mbôgi Yéhôva yon i bi tila yo.