Baa miñañ minlam mi nlôl toi ni Djob?

1. Njee a yé Nwet matila Bibel?

Miñañ minlam le bôt ba ga niñ munu isi i boga ni boga mi yé ntilbaga ikété Bibel. (Hiémbi 37:29) Bibel i gwé 66 ma bikaat. Djob a bi gwélél bebe le 40 ma bôt ba ba bé hémle nye inyu tila Bibel. Môsé nyen a bi tila bikaat bitan bi bisu, hala a yé bebe le 3 500 ñwii. Ñôma Yôhanes nyen a bi tila kaat i nsôk, hala yé iloo 1 900 ñwii. Mahoñol ma njee ma yé ntilbaga ikété Bibel? Djob a bi bôñôl mbuu mpubi wé inyu yis bo yom ba nlama tila. (2 Samuel 23:2) Ba bi tila bé mahoñol map, ndi ma Djob. Jon, Yéhôva nyen a yé Nwet matila Bibel.​—Añ 2 Timôtéô 3:16; 2 Pétrô 1:20, 21.

Béñge vidéô Njee a yé Nwet matila Bibel?

2. Kii Nkwés bés nkaa le Bibel i mpot maliga?

Di nyi le Bibel i nlôl ni Djob inyule i nkal bés maliga. Kii héga, i nkal bés gwom bi ga bôña yak ikété disii di mam. Mut nye ki nye a nla bé boñ hala. (Yôsua 23:14) Ndik Djob nu ngui yosôna nyetama nyen a nla tehe i bisu bi ngéda mam m’a yik lo.​—Añ Yésaya 42:9; 46:10.

Di kôli i bem le kaat i nlôl ni Djob i ba tôbôtôbô. Hala nyen Bibel i yé. Didun di didun di Bibel di ntjéma ikété bibôgôl bi dilémb. Tolaki i bi tilbana behee, Bibel i nkiha ni njôôñ yi. Yak 40 ma bôt ba bi tila Bibel ba bi selna bé yi.a Yom Bibel i nkal inyu gwéha i yé tôbôtôbô. Hala a nhélés bé bés inyule i nlôl ni Djob. Bibel i gwé ki ngui i hielel bôt le ba yila biloñge bi bôt. Gwom bi gwobisôna gwon bi nkwés didun di bôt nkaa le Bibel i yé ntiik bañga i Djob.​—Añ 1 Tésalônika 2:13.

3. Mambe mam Bibel i mpot?

Ño nkwel wada u Bibel u mbéñge ngim ñañ nlam: Djob a gwé bitééne bilam inyu bôt ba binam. Bitilna bi ntoñol lelaa mut binam a bi nimis nsima a bééna i bibôdle. Bi nkal ki bés lelaa Djob a ga timbis paradis.​—Añ Masoola 21:4, 5.

Bañga i Djob i gwé mambén, matiñ ni maéba. Ndi, i mpôdôl yak inyu ñañ u Djob ni bôt ba binam. Miñañ mi, mi niiga bés bilem bi Djob. Jon Bibel i nla hôla we i yi Djob. I ntoñle we lelaa u nla yila liwanda li Djob.​—Añ Tjémbi 19:8 ,12; Yakôbô 2:23; 4:8.

Béñge vidéô Kii i nyis bés le Bibel i mpot maliga?

4. Lelaa di nla tibil nok Bibel?

Nunu man kaat a nke hôla we i nok Bibel nlélém kii Yésu a bi unda. Yésu a bé a nti bôt bipes bi Bibel yada mbus yada. Mbus, a bé a koble bo “yi bitilna.”​—Añ Lukas 24:27, 45.

Miñañ mi mi nlôôha ba minlam kii mi mi nlôl ni Djob, mi ntôl bé. Ndi, miñañ mini, mi ntihba bé miñem mi ngim bôt, mi ntééñga ki bôt bape. Ndi hala a tômbôs bañ we moo. U nla bé bana botñem i niñ i boga ni boga ibale u nigil bé i yi Djob.​—Añ Yôhanes 17:3.