Lelaa u nla yila liwanda li Djob?

1, 2. Bonjee ba bé mawanda ma Yéhôva?

BAA njee u ga pohol i ba liwanda joñ? U ga pohol nga mut le u ngwés? Mut u nôgla ni nye, yak nye ki a nôgla ni we. Mut nu a yé loñge, a ban-ga ki bilem bi nlémél we.

² Yéhôva a mpohol ndék bôt ba binam le ba ba mawanda mé. Kii héga, Abraham a bé liwanda li Yéhôva. (Yésaya 41:8; Yakôbô 2:23) Yéhôva a bé gwés yak David. A bi kal le David a yé mut ‘kingéda ñem wé.’ (Minson mi baôma 13:22) Yak mpôdôl Daniel a bé mut Yéhôva “a ntéñ gwéha yé ni nye.”​—Daniel 9:23.

3. Inyuki Abraham, David bo Daniel ba bé mawanda ma Yéhôva?

³ Lelaa Abraham, David bo Daniel ba bé mawanda ma Yéhôva? Yéhôva a bi kal Abraham le: “U nôgôl kiñ yem.” (Bibôdle 22:18) Yéhôva a mpohol bôt ba ba nôgôl nye ni suhulnyu le ba yila mawanda mé. Yak bôt ba ngim litén bobasôna ba bi yila mawanda mé. Yéhôva a bi kal litén li Israél le: “Nôglana kiñ yem, ndi m’a ba Nyambe nan, bé ki n’a ba bôt bem.” (Yérémia 7:23) Jon, u nlama nôgôl Yéhôva ibale u ngwés ba liwanda jé.

YÉHÔVA A NSÔÑ MAWANDA MÉ

4, 5. Lelaa Yéhôva a nsôñ mawanda mé?

⁴ Bibel i nkal le Yéhôva a nyéñ manjel “i unda lipémba jé inyu bet miñem nwap mi yé peles bisu gwé.” (2 Miñañ 16:9) I kaat Tjémbi 32:8, Yéhôva a mbôn mawanda mé le: “M’a ti we maéba, me niiga ki we njel u nlama kil; m’a ti we pék, jis jem li noñok we.”

⁵ Ñoo nu nkeñi a nyéñ kéñ bés njel i ba mawanda ma Djob. Ndi Yéhôva a ngwés sôñ bés. (Añ Tjémbi 55:23.) Inyule di yé mawanda ma Yéhôva, di ngwélél nye ni ñem wés wonsôna. Di ntéñbe ki ni nye yak ngéda di yé ikété mandutu. Di gwé ki nlélém botñem kiki ntôp tjémbi nu a bi tila inyu Yéhôva le: “Lakii a yé i woo wem walôm, wee m’a piñgla bé me.” (Tjémbi 16:8; 63:8) Lelaa Satan a noode kéñ bés njel i ba mawanda ma Djob?

MINSOHI MI SATAN

6. Lelaa Satan a bi ôm bôt ba binam nsohi?

⁶ I Pes 11, di bi nigil le Satan a bi kolba Yéhôva, a ôm ki nye nsohi le a yé mut bitembee ni le a téé bé sép inyule a bi nwas bé le Adam bo Éva ba kit ni bomede kii yé loñge ni kii yé béba. Kaat Hiôb i niiga bés le, Satan a bi ôm yak bôt ba binam ba ba nyéñ ba mawanda ma Djob nsohi. Satan a bi kal le ba ngwélél Yéhôva ni minsoñgi mbus ño, ha inyu bé le ba ngwés toi nye. Satan a nkadba ki le a nla boñ le hiki mut, to a yé numbe ntén mut, a kôm Yéhôva mbus. Di nke tehe kii ñañ Hiôb u niiga bés, ni lelaa Yéhôva a bi sôñ nye.

7, 8. (a) Mambe mahoñol Yéhôva a bééna inyu Hiôb? (b) Kii Satan a bi kal inyu Hiôb?

⁷ Njee a bé Hiôb? Hiôb a bé loñge mut nu a bi niñ jam kiki bo 3 600 ñwii i len ini. Yéhôva a bi kal le ha ngéda i, mut nye ki nye a bé bé loñge hana isi kiki Hiôb. A bé ti Djob lipém ngandak, a ook béba. (Hiôb 1:8) Ni maliga, Hiôb a bé toi bañga liwanda li Djob.

⁸ Satan a bi ôm Hiôb nsohi le a ngwélél bé Djob yañga. Satan a bi kal Yéhôva le: “Baa u bi kéña bé nye bipes gwobisôna, yak ni ndap yé, ni mam momasôna a gwé? U mal sayap nson u moo mé, bilém gwé ki bi mal kek ngandak hisi hiosôna. Ndi sambal le woo woñ, u bép gwom gwobisôna a gwé, u tehe too a’ tiihe bé we mbom ni mbom.”​—Hiôb 1:10, 11.

9. Imbe kunde Yéhôva a bi ti Satan?

⁹ Satan a bi ôm Hiôb nsohi le a ngwélél ndik Yéhôva inyu bisai Djob a nti nye. Satan a bi kal ki le, a nla tinde Hiôb i kôm Yéhôva mbus. Yéhôva a bi kémhe bé ni yom Satan a bi kal, jon a bi ti Satan kunde i noode Hiôb inyu tehe too Hiôb a bé toi liwanda li Yéhôva inyule a ngwés nye.

SATAN A NOODE HIÔB

10. (a) Lelaa Satan a bi noode Hiôb? (b) Ndi kii Hiôb a bi boñ?

¹⁰ Jam li bisu Satan a bi boñ li yé le a bi tjé bémba i Hiôb yosôna. Mbus ha, Satan a nol libim li bagwélél ba Hiôb. Hiôb a nimis mam momasôna. Mu manoodana ma nsôk, Satan a bi nol jôm li bon Hiôb a bééna ni njel mbuk mbebi. Ndi Hiôb a bi kônde téñbe ni Yéhôva. “Ndi ikété mam mana momasôna Hiôb a boñ bé béba, to ôm Nyambe nsohi le a nyi bé boñ.”​—Hiôb 1:12-19, 22.

11. (a) Kii ipe Satan a bi boñ Hiôb? (b) Ndi kii Hiôb a bi boñ?

¹¹ Satan a bi telep bé ha. A bi kolba Djob ngéda a bi kal le : “Tis bihés gwé ni minsôn nwé, u tehe too a’ tiihe bé we mbom ni mbom.” Jon Satan a bi leñ Hiôb béba kon kiyaga. (Hiôb 2:5, 7) Ndi yak ha ngéda i, Hiôb a bi téñbe ni Yéhôva, a kal le: “Letee ni kel me nwahba [tole me nwo], me ta bé me le me pamba ni ñem wem maliga [tole me nwas ñem wem maliga].”​—Hiôb 27:5.

12. Lelaa Hiôb a bi unda le Satan a yé mut bitembee?

¹² Hiôb a bé yi bé minsohi Satan a bé ôm nye, to inyuki a bé son njonok. A bé hoñlak le Yéhôva nyen a boñ le a nok ndutu. (Hiôb 6:4; 16:11-14) Ndi to hala, Hiôb a bi kônde téñbe ni Yéhôva. Nkaa u bé ha bé: Hiôb a bé tôñ ndik bé nyemede, a bé yaga liwanda li Djob inyule a bé gwés toi nye. Mam momasôna Satan a bi pot ma bé ndik bitembee!

13. Bimbe bisai Hiôb a bi kôhna inyule a bi téñbe ni Djob?

¹³ To hala kii Hiôb a bé yi bé kii bé tagbe i ngii, a bi téñbe ni Djob, a unda ki le Satan a yé béba. Yéhôva a bi sayap Hiôb inyule a bi unda toi le a yé liwanda li li ntéñbe ni nye.​—Hiôb 42:12-17.

LELAA SATAN A ÑÔM WE NSOHI

14, 15. Umbe nsohi Satan a ñôm bôlôm ni bôda bobasôna?

¹⁴ Ñañ u Hiôb u nla niiga we ngandak mam. I len ini, Satan a ñôm bés nsohi le di ngwélél Yéhôva ni minsoñgi mimbe. Jon ikété kaat Hiôb 2:4, Satan a bi kal le: “Mut a’ ti gwom gwobisôna a gwé le a péyés niñ yé.” Satan a bé kal bé le Hiôb nyetama nyen a bé gwélél Yéhôva ni minsoñgi mimbe, ndi a bé ôm yak bôlôm ni bôda bobasôna nsohi. Mbôgôl i ñwii mbus nyemb Hiôb, Satan a bé a ngi kôndge sol Yéhôva ni ôm bagwélél bé nsohi. Jon kii héga, di ñañ ikété kaat Bingéngén 27:11 le: “A man wem bana pék, u kônha ñem wem maséé, le ndi me la timbhe nu a nyahal [tole a nsol] me.”

¹⁵ U nla pohol i nôgôl Yéhôva ni i ba liwanda li ntéñbe ni nye, inyu unda le Satan a yé mut bitembee. To ibale u nlama boñ mahéñha makeñi mu niñ yoñ inyu yila liwanda li Djob, yi le makidik mo kiki mo, ma ma nlôôha ba malam kiki ma, ma ta bé! Mana makidik ma yé nseñ ngandak. Satan a ñôm we nsohi le u ga téñbe bé ni Djob ngéda w’a ba ikété mandutu. A noode tembene bés inyu boñ le di téñbe bañ ni Yéhôva. Lelaa a mboñ hala?

16. (a) Mambe manjel Satan a ngwélél inyu tinde bôt i kôm Yéhôva mbus? (b) Lelaa Nsohop a noode tinde we i waa gwélél Yéhôva?

¹⁶ Satan a ngwélél ngandak manjel inyu tinde bés i boñ le di ba bañ liwanda li Djob. A nhiôm “kiki mbondo njéé le i nkônd, a yéñék nwet a mil.” (1 Pétrô 5:8) U helek bañ ngéda mawanda moñ, bôt boñ ba lihaa ni bôt bape ba nyuge we i téé yigil yoñ i Bibel, ni i boñ yom i yé ilam i mis ma Yéhôva. U nla nôgda wengoñle ba yé nyumbla we.a (Yôhanes 15:19, 20) Satan nyemede a nhéñha inyu nene wengoñle a yé “añgel mapubi.” Jon a nla noode lôg bés le di ndogbene Yéhôva. (2 Korintô 11:14) Njel ipe Satan Nsohop a ngwélél inyu tinde bés i kôm Yéhôva mbus, i yé ngéda a ntinde bés i hoñol le di nlôôha ni béba, ni le di kôli bé gwélél Djob.​—Bingéngén 24:10.

NÔGÔL MAMBÉN MA YÉHÔVA

17. Inyuki di nlama nôgôl Yéhôva?

¹⁷ Ngéda di nôgôl Yéhôva, di ñunda le Satan a yé mut bitembee. Ndi kii nla hôla bés i ba manôgla? Bibel i nkal le: “U gwéhék Yéhôva Nyambe woñ ni ñem woñ wonsôna, ni niñ yoñ yosôna, ni ngui yoñ yosôna.” (Ndiimba Mbén 6:5) Di nôgôl Yéhôva inyule di ngwés nye. Kiki gwéha yés i Yéhôva i nhol, hala ki nyen di nkônde ba maséé i bon mam momasôna a mbat le di boñ. Jon, ñôma Yôhanes a bi tila le: “Inyule gwéha Nyambe ini, le di tééda matiñ mé, ndi matiñ mé ma ta bé nledek.”​—1 Yôhanes 5:3.

18, 19. (a) Mambe mam Yéhôva a nkal le ma yé béba? (b) Kii nyis bés le Yéhôva a nla bé bat bés le di boñ jam di nla bé boñ?

¹⁸ Ndi mambe mam Yéhôva a nkal le ma yé béba? Homa nkéñég matila nu a gwé ño le “Oo mam Yéhôva a ñoo,” a nti ndék dihéga. I bibôdle, u nla hoñol le ngim mam mu, i nlôôha bé ba béba. Ndi ngéda u ga añ bipes bi Bibel, u yoñ ki ngéda i tibil hek pék, ha nyen w’a tehe le nu ni nu a gwé toi yi, a nlama ndik nôgôl mambén ma Yéhôva. U nla ki nôgda le u nlama boñ ngim mahéñha mu niñ yoñ. To ibale hala a nla ba we ndutu ngim mangéda, ibale u mboñ mahéñha ma, w’a bana bini bisai le nsañ ni maséé, inyule u ntéñbe i ba liwanda li Djob. (Yésaya 48:17, 18) Lelaa di nyi le di nla lona mana mahéñha i niñ yés?

¹⁹ Kekikel Yéhôva a mbat bé bés le di boñ jam di nla bé boñ. (Ndiimba Mbén 30:11-14) Inyule a yé liwanda jés, a nyi bés iloo bésbomede. A nyi ngui yés, a yik yak bibomb gwés. (Tjémbi 103:14) Ñôma Paul a nti bés mana makénd le : “Nyambe a yé maliga, nu a’ nwas bé bé le ni kôs manoodana ma nloo ngui nan, ndi ikété manoodana a’ néhne bé njel i tohla mu, le ni bana ngui i hônba mo.” (1 Korintô 10:13) Di nla ba nkwoog nkaa le hiki ngéda, Yéhôva a ga ti bés ngui i boñ loñge. A ga ti we “sôkbôk lipémba” inyu hôla we i hônba mandutu. (2 Korintô 4:7) Ngéda Paul a bi mal kôhna mahôla Yéhôva a nti i ngéda mandutu, a bi kal le: “Me gwé ngui i boñ mam momasôna inyu nu a nlédés me.”​—Filipi 4:13.

NIGIL I GWÉS MAM DJOB A NGWÉS

20. Bimbe bilem bilam di nlama kôna, ni inyuki?

²⁰ Ibale di nsômbôl yila liwanda li Djob, di nlama ha bé boñ mam Yéhôva a nkal le ma yé béba, ndi di nlama boñ iloo ha. (Rôma 12:9) Mawanda ma Djob ma ngwés mam Djob a ngwés. Kaat Tjémbi 15:1-5 i ntoñol mam ma. (Añ.) Mawanda ma Yéhôva ma nkôna bilem gwé bilam, ma ñundga “gwéha, ni maséé, ni nsañ, ni wongut, ni loñgeñem, ni liyômba, ni hémle, ni ñemlima, ni hôtnyu.”​—Galatia 5:22, 23.

21. Lelaa u nla nigil i bana bilem bilam Djob a ngwés?

²¹ Lelaa u nla nigil i bana bini bilem bilam? U nlama nigil i gwés mam Yéhôva a ngwés. Jon, i mbéda le u yoñ ngéda i añ ni nigil Bibel hiki kel. (Yésaya 30:20, 21) Kiki w’a boñ hala, gwéha yoñ inyu Yéhôva i ga nañ. Kii gwéha yoñ inyu Djob i mba i nañ, hala nyen w’a kônde bana ngôñ i nôgôl nye.

22. Bimbe bisai u ga kôs ibale u nôgôl Yéhôva?

²² Ngéda u mboñ mahéñha ma mbéda mu niñ yoñ, u yé wengoñle mut nu a nhéa minlômbi mi mambot inyu haba mambot ma mondo. Bibel i nkal le u nlama “engla ni nlômbi mut,” ndi di “engep mut yondo.” (Kôlôsé 3:9, 10) To ibale hala a nene bé jam li ntomb, ibale di mboñ mahéñha mana inyu nôgôl Yéhôva, a mbôn le a ga ti bés “bom keñi.” (Tjémbi 19:12) Jon, pohol i nôgôl Yéhôva, unda ki le Satan a yé mut bitembee. U gwélél bañ Yéhôva inyu bisai bi bem we, ndi gwélél nye inyule u ngwés toi nye ni maliga. Ha nyen w’a yila toi bañga liwanda li Djob!