Njee a bé Hiôb?

Mut wada a bé bégés Yéhôva i loñ Us. Jôl jé li bé le Hiôb. A bé ngwañ mut ngandak, a ban-ga lihaa likeñi. A bé loñge mut, a hôlga diyeyeba, biyik bi bôda ni bon ba nyuu. Ndi, kiki a bé boñ mam ma téé sép, baa Hiôb a bé lama bé boma mandutu?

Hiôb a bé yi bé le Satan Nsohop a mbéñge nye. Yéhôva a bi bat Satan le: ‘Baa u ntibil yimbe ngwélél wem le Hiôb? Mut nye ki nye a ta bé kiki nye isi. A ñemble me, a boñok ki mam ma téé sép.’ Satan a timbhe le: ‘Ñ, Hiôb a kôli ndigi le a nôgôl we. U ntééda nye, u nkôp nye bisai, u tinak ki nye disi ni bilém. Ibale u nhéya nye gwom bi gwobisôna, a ga bégés ha bé we.’ Yéhôva a kal Satan le: ‘U nla noode Hiôb. Ndi, me nti bé we kunde i nol nye.’ Inyuki Yéhôva a bi nwas le Satan a noode Hiôb? A bé nkwook nkaa le Hiôb a nla bé kwo.

Satan a bi bôdôl noode Hiôb ni ngandak bikuu. Kuu bisu i bé le, bôt ba Séba ba bi nip nyaga ni magas ma Hiôb. I mbus, hié hi nol mintômba nwominsôna mi Hiôb. Bôt ba Kaldéa ba nip bémba yé i kamél. Ba nol yak minkol mi mi bé tééda bémba i. Ndi kuu ikeñi i kwél Hiôb: bon bé bobasôna ba bi wo. Ndap i bi kwél bo ngéda ba bé i ngand. Hiôb a bi nok njôghe i ñem ngandak, ndi a bi waa bé gwélél Yéhôva.

Satan a bé sômbôl le Hiôb a nok ndutu ngandak. A bi ôm nye béba kon u bipoo ni nyuu yosôna, Hiôb a bé nôgda njôghe ngandak. A bé yi bé inyuki mam ma momasôna ma mpémél nye. To hala, Hiôb a bi ke ni bisu i bégés Yéhôva. Djob a bi tehe mam ma momasôna, a bé ki maséé ngandak ni Hiôb.

I mbus, bôlôm baa ba lo i noode Hiôb. Ba kal nye le: ‘I nene le u bi boñ mam mabe, ndi u sôô mo. Jon Nyambe a yé kogse we.’ Hiôb a kal le: ‘Me mboñ bé me béba yo ki yo.’ Hiôb a bôdôl hoñol le Yéhôva nyen a yé boñ le mandutu ma kwél nye, a kal ki le kogse i Djob inyu yé i téé bé sép.

Mañge wanda le Élihu a bé a yii nwee, a emblege bo ba nkwel. I mbus, a yoñ hop, a kal bo le: ‘Mam momasôna ni mpot ma téé bé. Bikeñi bi Yéhôva bi nlel nogna yés huum. A ta bé le a boñ béba yo ki yo. A ntehe mam momasôna, a nhôla ki bôt ikété mandutu map.’

Ndi Yéhôva a pôdôs Hiôb, a kal nye le: ‘Hee u bé ngéda me bé hek ngii ni hisi? Inyuki u nkal ni le me téé bé sép? U mpot ndigi, ndi u nyi bé kiki gwom bi bi lo.’ Hiôb a neebe hihôha hié, a kal le: ‘Me nhôs. Me bi nok ba mpot inyu yoñ, ndi nano me nyi toi we. Jam jo ki jo li nloo bé we. Nwéhél me inyu yom me nkal.’

I ngéda manoodana mé ma bi mal, Yéhôva a bi témb a ti Hiôb mbôô wé, a ti ki nye lingwañ ngandak iloo li a bééna ngéda bisu. Hiôb a bi niñ ntandaa ngéda a niñ ki loñge. Yéhôva a bi sayap Hiôb inyule a bi nôgôl nye, yak i ngéda mandutu. To kii leñek, baa yak we w’a ke ni bisu i bégés Yéhôva kiki Hiôb?