PES 1

“M’a yéñ u u bi nimil”

Ntééda ntômba a yé bet hikôa inyu yéñ nimlak wé ntômba

Ntômba unu u nimil. I nene le u bak u nje bikai i wom, ndi u bagba ndék ni ndék ni mii mintômba mimpe. Ndi hanano, unu ntômba u ta ha bé tehe bémba, to ntééda mintômba. Yak u, u nsude. Nano kii u nimil ikété nsôsôgô, homa njéé i nhiôm, mut a ntééda ntômba unu a ta bé. Ha nyen, ntômba u nok kiñ i nsébél nye. U nyimbe kiñ i. Ntééda mintômba nyen a yé yéñ wo. Kii a ntehe ntômba, a ôt ngwéé, a begel wo. Mbus, a hôô ki wo ni libadô li mbot yé, ndi a témbna wo i mbai yé.

NGANDAK ngélé, Yéhôva a nsébél nyemede le Ntééda mintômba. Jon ikété Bibel, a nkal bés le: “M’a tôñ ni mintômba nwem, memede m’a yéñ ki nwo.”—Ezékiel 34:11, 12.

“Mintômba memede me njés”

Bonje ba yé mintômba mi Yéhôva? Bibel i ntoñol le bôt ba mbégés Yéhova, ba gwéhék ki nye, bon ba yé mintômba ñwé. Jon Bitilna bi nkal le: “Loga, di ôm mbom, di ôôp ki letee ni ’isi, di ôm maboñ isi bisu bi Yéhôva, Nhek wés! Inyule a yé Nyambe wés, yak bés di yé bôt ba bémba yé, ni mintômba mi woo wé.” (Tjémbi 95:6, 7) Bagwélél ba Yéhôva ba yé kii mintômba, inyule ba yé maséé i hoo noñ Ntééda mintômba le Yéhôva. Baa hala a nkobla le ba yé peles? To! Ngim mangéda, bagwélél ba Djob ba yé ba ba kii “mintômba mi mi mal tjama”, kii “mintômba minimlaga”, tole ba yé ba “yôm wengoñle mintômba.” (Ezékiel 34:12; Matéô 15:24; 1 Pétrô 2:25) Ndi to hala, ngéda mut a nyoñ njel ipe, Yéhôva a ntjôô bé nye wengoñle a gwé habé mahee.

Baa u nhoñol le Yéhôva a ngi yii Ntééda woñ? Lelaa Yéhôva a ñunda le a yé Ntééda woñ i len ini? Di béñge mana manjel maa:

Yéhôva a nti bés bijek bi mbuu. Yéhôva a nkal le: “M’a jés bémba yem, i tééne ikété bilonge bi mambok ma bikai.” Ndi, a nkal ki le: “Nyoo nyen y’a nañlene i longe linôyôi, y’a jél ki mambok ma bikai ma nlôôha longe.” (Ezékiel 34:14) Kekikel, Yéhôva a mah hôs bé i ti bés ngandak bijek bi mbuu i loñge ngéda. Baa u nla hoñol mbamble, nkwel, tole bilinge linge, bi bi bi timbhe masoohe moñ ngéda u bi nok maliga? Baa hala a bi tinde bé we i hémle le Yéhôva a ntôñ toi ni we?

Yéhôva a ntat, a nidik ki bés. Yéhôva a mbôn le: “Me témbna ki u u bi yôm, me kañ u u bi babaa bandas. M’a lédés u u bé ntombok.” (Ezékiel 34:16) Yéhôva a nlédés ba ba yé ntombok, ni bet nduña i ntét. Kiki ntééda mintômba a nla ha ntômba wé bandas, hala nyen yak Yéhôva a nla hôla bés i mbôôp to ibale bilôk biké gwés gwon bi bi babal bés. Yéhôva a ntémbna ikété bémba yé, nu ni nu a bi nimil tole a njo ni mahoñol mabe.

Yéhôva a nyi le niñ yés i yé i moo mé. Yéhôva a nkal le: “M’a tôñ mintômba nwem ni pagal ki nwo hiki homa mi bi sénda [tole tjama].” Ndi a nkal ki le: “M’a yéñ u u bi nimil.” (Ezékiel 34:12, 16) Inyu Yéhôva, ibale ntômba wé u nimil, a nlehel bé wo ñem. A nyi ngéda ntômba u nhañ ikété bémba, a nke ki yéñ wo. Ngéda a nléba wo, a nkon maséé ngandak. (Matéô 18:12-14) Inyu hala nyen a nsébél bagwélél bé le “mintômba nwem, mintômba memede me njés.” (Ezékiel 34:31) Yi le yak we, u yé wada mu ikété mintômba mi Yéhôva.

Inyu Yéhôva, nimlak ntômba u ta bé ntômba le a nlehel ñem. Yéhôva a nkon maséé ngéda a nléba ntômba wé

“Dilo tjés di témp yondo kikii di ngéda kwañ”

Inyuki Yéhôva a nyéñ we? Inyuki a nsébél we i témb nyeni? Inyule a ngwés le u ba maséé. Yéhôva a mbôn le a ga nôs ki nop bisai inyu mintômba nwé. (Ezékiel 34:26) Hala a ta bé mbônga u yañga. Wemede, u ma tehe bihélha gwé bi mam.

Hoñol ngéda u bi bôdôl yi Yéhôva. Kii héga, ngélé bisu u bi nigil i yi jôl li Djob, ni bitééne gwé inyu mut binam, lelaa u bi nôgda maliga ma? Baa u ngi hoñlak lelaa u bé kôs hogbe ni maséé i kodba ni bilôk biké i makoda makeñi? Ngéda u bé u boma mut nu a ngwés maliga, ndi u añle nye miñañ minlam, baa u bé bé u témb ndap ni ngandak maséé?

U nla ki kôhna maséé ma. Bagwélél ba Yéhôva ba bisu ba bi soohe le: “A Yéhôva, témbna bés i weeni, ndi d’a témp! Boñ le dilo tjés di témp yondo kikii di ngéda kwañ.” (Minlént mi Yérémia 5:21) Yéhôva a bi timbhe masoohe ma. Yak litén jé li témb li kaha gwélél nye ni maséé makeñi. (Néhémia 8:17) Yéhôva a ga boñ nlélém inyu yoñ.

U yé le u kal le ‘m’a ntémb yak Yéhôva.’ Ndi, pot ni boñ, i yé mam ima. Di béñge ni kii nla ba we ngok baagene i témb yak yéhôva, ni lelaa u nla yémbél yo.