MBADGA 7
Lelaa me nlama boñ ibale ba ntinde me i lalna mut?
KII U GA BOÑ?
Hégda le jam lini: Hala a yé ndik sôñ iba le mañge muda le Héter a mpam ni mañge munlôm le Mike. Ndi Héter a nôgda wengoñle a nyi Mike ibôdôl behee. Ba mbéna tilna bikaat, ba tégbahaga ngandak ngéda i kwel ni njel nsiñga. Hiki wada wap a nla yak yi yom nuu numpe a nsômbôl kal! Ndi nano Mike a nyéñ ndik bé sugul mu minkwel map.
Munu sôñ iba ini i ntip tagbe, Mike bo Héter ba bak ndik ba ngwelna moo, ba samblaga ngim mangéda. Héter a nyéñ bé boñ iloo ha. Ndi i nlélém ngéda, a ngwés bé to nimis Mike. Nyetama nyen a mboñ le Héter a nôgda le a yé nlam, ni le a yé muda nu tôbôtôbô. A nhoñol ki mu ñem wé le: ‘Me ni Mike di ngwéhna . . .’
Ibale u gwé ñwii le u nla biiba, ndi u boma nlélém jam kiki Héter, ki u mboñ lelaa?
YOÑ NDÉK NGÉDA I HEK PÉK!
Malal ma yé likébla Djob a nti ndik babiina. Nu a nlalna mut nye ngi biiba a ñôbôs likébla li. Hala a yé kiki mut nu a nyoñ loñge mbot ba nkébél nye inyu sas mahindi
Ibale u leñ puma i ngii, i ntémb ndigi i kwo hana isi. Hala a ñunda le ibale u mbôk mambén ma ngiinda, w’a kôhna bikuu. Jon w’a kôhna nlélém jam ibale u mbôk mbén i Bibel, kiki bo ini i nkal le: “Ni tjél ndéñg.”—1 Tésalônika 4:3.
Bimbe bikuu w’a kôs ibale u mbôk mbén ini? Bibel i nkal le: “Nu a nke i ndéñg nyen a mboñ nyuu yé nyemede béba.” (1 Korintô 6:18) Lelaa hala a yé maliga?
Bôt ba njôôñ yi ba nkal le ngandak boñge ba wanda, i i nlalna bôt bo ngi biiba, i nkôhna bikuu tole mam mabe kiki bo mana:
BA GWÉ NDUÑA KEÑI. Libim li boñge ba wanda, li li bi lalna bôt bo ngi biiba, li nkal le li ntam jam li.
BA MBÔDÔL HA BÉ BÔT ÑEM. Ngéda ba mal lalna mut, ba mbôdôl badba le: ‘Baa mañge muda nunu tole mañge munlôm nunu, a bi lalna ki njee numpe?’
BA NTEHE LE MAM MA TA HA BÉ KIKI BA BÉ HOÑOL. Ikété kété yap ñem, ngandak boñge bôda i ngwés ba ni mut nu a ga sôñ bo, ha bé ni mut nu a ga gwélél bo. Yak ngandak boñge bôlôm i nkal le i ngwés ha bé ba ni mañge muda nu ba bi lalna.
Litode li tôbôtôbô: Ibale u nlalna mut we ngi biiba, u nhôyôs libak joñ, u nimis ki yom i i yé mahee. (Rôma 1:24) Nyuu yoñ i gwé mahee ngandak, u ñôbôs bañ yo!
Unda le u gwé ngui i “tjél ndéñg.” (1 Tésalônika 4:3) I mbus, i kel w’a biiba, w’a bana kunde i lalna nlô woñ tole nwaa woñ. Ha ngéda i, w’a kon maséé i boñ hala i nya i yôni ibabé we bana nduña, kon woñi, tole tam jam u yé boñ; inyule mam mana ma yé bikuu bi nkwél ba ba nlalna bôt bo ngi biiba.—Bingéngén 7:22, 23; 1 Korintô 7:3.
WE U NHOÑOL LELAA?
Baa mut nu a ngwés toi we, a nla boñ we jam li li ga ôbôs nyuu yoñ, to boñ jam li li ga tééñga mahoñol moñ?
Ibale mut a ntôñ toi we, baa a ga noode ôbôs maada moñ malam ni Djob?—Lôk Héber 13:4.